2015年5月17日星期日

思念是一種很玄的東西。

對,去年在馬來西亞旅行的時候,久久還記著黃亞細的雞翼,和那些動人無比的叻沙。

雖然呢個係一個好悶既國家,但我每一會兒我就會想起那些娘惹美食,思念是一種很玄的東西,就是這種想念,令我特別會留意香港有什麼好吃的娘惹美食。

你曾經告訴我,在我們的母校附近有一間娘惹美食新開的,你不下三四次告訴我,你去吃過幾次,而且吃到和老闆很熟稔,你會建議佢派傳單,建議佢做marketing ,全因你喜歡那種味,全因你欣賞老闆兩公婆的簡單風格。

於是,在西環這晚飲完杯酒後,突然,思念的情緒油然而生,在openrice裡看看這間店的開放和關門時間,剛剛好,可以來個晚飯,於是,過來一解我的雙重思念。

思念有雙重,大概,有感情的你會明白

呢間舖叫娘惹嫁到



店很小,當晚八時坐了五個人已經滿座,幸好,有一枱差不多走了,等了幾分鐘就可以入座,後面的一對情侶,唔好意思了,另外個張枱應該冇咁早走。


等位途中,想想吃什麼罷,本想叫娘惹蟹白咖哩麵,但原來要自己攞蟹過黎,冇得食。





叻沙是必吃的,除了叻沙那麼就叫多個老闆不斷說好吃的雞腿飯罷。

甲必丹咖哩雞腿飯,看樣子也知道對辦。老闆不斷同隔離枱稱讚其雞腿有幾好吃,我就知道冇選錯。雞腿的肉軟綠綿綿,輕輕用筷子夾一下已將骨肉分離,令我想起上水的林德記雞翼河那些銷魂雞翼,一樣軟得連冇牙都可以吃。




那個咖哩深深地註入雞肉裡,美味無限。加上每碟飯有半隻烚蛋,香草飯和青瓜,香草飯粒粒有米氣,煙韌之餘沾上咖哩自然是更美味,青瓜清爽juicy又新鮮,消取了只有雞腿的肉感,健康清新一點。





唯一不好處係太細碟,好吃得我一粒飯也沒有剩,不過,正常,就算馬來西亞的地道碟頭飯,也是這樣䄂珍的。






吃鮮蝦叻沙,是我最期待的一刻,因為你說這是最好吃的。雖然沒有螄蛤,但其樣子已告訴你沒有螄蛤佢還可以是一碗好的叻沙。

最出色的不是其鮮蝦,佢只係有較普通的表現,它只是普通的蝦肉,最出色的應該係其馬來西亞深海魚蛋。

魚蛋來自馬來西亞,肉質極度爽口,有彈性,每一啖都充滿魚味,每粒魚蛋裡面其組織都係充滿滿載而歸的鮮魚肉味,有著從前香港魚蛋粉全盛時期全是大地魚為主的魚蛋那個年代的氣息


不是本身吃了點東西,我想叫一碗剩魚蛋來吃,不過,夜晚流流,唔夠膽食太多才作罷。

講番碗叻沙,除了魚蛋出色外,其他配菜都非常合作,豆卜,芽菜,油麵,烚蛋都做了個很好的綠葉,全因其湯底係十分出色的靈魂,每樣索左其叻沙湯底後都令人開胃得很,特別係其油麵,沒有用馬來西亞本身的麵種,反而用上中國的油麵,是十分聰明的選擇,因為油麵能把所有精華都發揮得淋漓盡致。





飲一口湯,濃濃的叻沙充滿奶味又香又惹味。

吃到大半,後面那對小情侶也等不及了,因為好多食物已告沽清。

其實我來的時候八點多,很多食物都已經沒有了,如果你看完文章專程過來,請你打電話過來,免得像他們一樣,我幸好吃到最後一隻雞腿。

不過,其實我都唔係幾好彩,想叫野飲,什麼吸引力無窮的斑蘭特飲,香茅特飲,全部都明天請早。





本身還點了個咖央多,不過可能人手不夠,本身想係餐前小吃,卻係吃完飯和叻沙後才來。

我吃過新加坡的阿坤,也吃過香港的,的確味道好不好見人見致,我是喜歡的,在這裡見到的咖央多還加上斑蘭,係一大驚喜。



麵包鬆脆得很,自製斑蘭咖央多士味道新奇且不錯,斑蘭多士一拿起,就斑蘭醬汁瀉到手上,很喜歡那斑蘭的幽香,令我想起新加坡的那個出名的斑蘭蛋糕,不知何時,再有機會吃呢。

這刻,我在想,除了叻沙外,不知你喜不喜歡這個多士,多想打個電話給你,或者那刻就告訴老闆,因為你的推薦,我今晚登過來,不過,太突兀了,就讓思念放在心吧。

幾個小時後,我send了張相給你,告訴你我去了這裡,不過,你好像不怎樣雀躍,或者,是我想太多吧,我以為你因為我愛屋及烏而高興,就如我愛林德記一樣。



對,思念是一種很玄的東西。

單身男女中,像方啟宏一樣,唱著我願意也不代表程子欣會選他,我還是應該去吃多碗叻沙。

看見老闆兩公婆的恩愛,簡單,我會想,其實,思念並又不是很玄,是每天的努力經營,像他們經營這小店,我相信後面的心機和意志並不太少。

思念太多,對身體有害,還是單方面思念叻沙,起碼我會有一點慰藉吧。


娘惹嫁到 Nyonya Coming
西環薄扶林道29C- 29D 廣德樓地下A3店舖

你會懂的黑白椰子~

我好少鐘意食麥當勞,但每次佢有新野,我都會不期然去試一下。

上次蝦堡其實我係十分喜歡的。不過,上次時間,人物,地點,全錯,我放棄了寫一篇食評的機會。

在手機找找,原來我發現有影到個盒,呢個飽,菠蘿爽口清甜,蝦肉新鮮美味,呢個飽,好值得食,但係promote期已過,下次出,再食過



到今天,黑白漢堡的reboot,我再次提起勁寫一寫佢。

每次麥當勞再出新飽,總會貴貴的俾錢去潮聖,我不是人氣博客,俾錢食飯應是常識吧。



這天番工怨氣沖天,於是吃點東西平衡一下,不能去遠的地方食飯,就選麥當勞罷,還可以試試呢個黑白漢堡的風采。


記得與弟弟在日本的burger king 曾經出過一個黑色漢堡,佢連塊芝士都係黑色,型到不得了。我記得最正係包皮,唔好誤會,唔好心邪,唔係人體奧妙展,唔係講人身體既一部分。那次的漢堡包的包質乾爽有嚼口,而且有絲絲的鹹味,應該係將麵包後期再加左一點的magic,配合黑芝士,一塊黑漆漆的牛肉,我不禁在涉谷街頭與弟弟合唱黑色誘惑,"潮流今期偏愛黑”,口中咬著漢堡,高歌一曲。

時間來到九個月後的香港,我見到呢個黑漆漆,還在芝麻在上面點綴的漢堡,我覺得好吸引,我又想起張智霖的黑色誘惑。好,就選你做我的午餐罷。



工作關係,買番去食,可以任影唔嬲,如果唔係,我係麥當勞係咁影人地會以為我係那些宅男餐餐影,雖然我本身都有啲宅,但係麥當勞影飽呢個動作的確會惹來途人目光,仲要係番工地方附近,都係放棄,外賣黑堡呀,唔該。

呢個餐個packing 真係好靚,慢慢拍,慢慢吃,慢慢J,唔好意思,J呢個字太高登,陳慧琳先應該J,我應該話外賣返去,慢慢欣賞。我開頭以為,其實呢個餐係同chocolate cross over ,那個黑底白點白底黑點個style 好似佢啲衫,其實大概麥當勞可以諗下出副產品,絕對賺錢過賣飽。

唔好講咁遠,食下期待已久既黑色誘惑先。



第一啖,唔對路。



上次話說食Burger King 個飽好好食,個飽皮乾身而美味,唔知點解,呢個飽好濕好濕。兩塊大大的牛肉好juicy好美味,配合那塊煎得香脆的煙肉,係唔錯既,不過過鹹亦都係其中一個致命傷,奇怪既係麵包既底部有類似薯蓉既野係個底,不過錯有錯著同生菜一樣分擔了其鹹味,令整個飽的味道冇咁重。不過,個飽係幾大份,而且非常足料,好飽。




除了漢堡飽,識食當然要吃Shake Shake 薯條啦,陳慧琳話"Shake Shake Shake your body now 一易即見效",對唔住,廣告對我影響太深遠,就算我好少睇電視,總之,一shake薯條我就會想起佢,今次我仲為左食shake Shake 加大左個餐去攞佢包Shake Shake 粉。I am loving it

風味椒鹽蟹調味粉,呢個真係好鹹,好鹹,同好鹹。幸好本身我呢包薯條咁啱鹽唔多,或者整薯條個哥哥掛著炒股票既關係,或者睇大時代睇晏左眼瞓得很唔記得左落鹽,如果唔係,我諗佢既比例係黃金比例,應該係一比九十九,一條薯條有百分之九十九都係充滿鹽分,如果你當天吃一包,應該係你身體承受既鈉一個月既分量。因此,我吃完幾條後,宣告投降。



黑白椰子pie,相信才是呢餐既主角,見到個包裝,你會覺得好吸引。我有一半都係好想試呢個甜品,全因我喜歡椰子的原因。

咦……咬了一口後,佢個樣,好離奇,好似曾相識。我影低左佢。



男士們,我相信,你懂的。

然後,有一天,我在高登看到有人做我同樣既動作。

南瓜話周記的西多士係中出西多士,中間出奶黃,惹人暇想,我都覺得有幾分神似。

不過,呢個由中間流出既椰子,除左好吃,也更加可以係一個大Gimmick。



呢排有一班係Instagram 既食家,影食物影得好靚好靚,我誠意推薦,買回家慢慢影,影到天昏地暗影張靚相,一定可以呃幾萬個like,不過全部都是男人罷。然後你們的fans會多了一大班熱愛電影既follower 


哎呀,我又講太遠了,講番個PIE,唔好意思,太多口水。

除了個PIE好食,都要再讚個盒同枇個樣,黑漆漆的外表的確吸引人,對比平時蘋果批,樣子有幾分冷酷,外味亦濃郁。

吃了一口,濃濃的椰子味在口中爆發,外脆內軟又保持了一個強烈的溫度,暖暖的枇中流出的椰子內涵豐富,不太甜也不太漏。

今餐,最滿意,還是個Pie,不是因為其外貌,而是因為真係幾好食。坦白說,麥當勞好少有新驚喜,佢最叻就係將蛋,牛肉,豬肉,煙肉,生菜,拆開重組拆開重組拆開重組拆開重組重組拆開重組拆開重組拆開,好似那些股票於港交所玩既一拆八,八拆十六既財技一樣,將呢幾樣野好似大檔玩你估粒骰係邊個杯既技巧般,做到早餐全餐煙肉蛋漢堡豬柳蛋漢堡豬柳漢堡漢堡飽巨無霸等。因此,我覺得佢既驚喜度係好高。

至少,我望到椰子流出黎既樣子,我相信,那個驚喜和Gimmick,如果你由細吃到大,你會懂的。

這個笑面,是屬於椰子pie的。


麥當勞 McDonald's
太古太古城道18號太古城中心二期2樓265 號舖

2015年5月14日星期四

雷霆救兵

從來在我的字典裡面,日本菜都是以刺身和壽司為主,通常熱食都不大留意,而且通常在大吃大喝後都已經飽了一大半,於是甚少留意日本菜的熱食,就算去到一些居酒屋,頑固的我還是釀著要吃刺身才安落,對於刺身和壽司都是百分百的鍾愛。

是晚,一班喜歡飲酒的三五良朋約去一間日本野食飯,全晚我都係諗住壽司刺身壽司刺身壽司刺身壽司刺身壽司刺身壽司刺身壽司刺身壽司刺身刺身壽司刺身壽司刺身壽司刺身壽司刺身壽司刺身壽司刺身壽司,再加上坐底後發現呢度有好多不同種類既白酒清酒等俾你一路吃一路對酌,一於今晚食餐勁既,越危險既地方越安全,太子的警署後面當然也是從最安全渡過的好戰場,起碼,飲醉酒應該唔會遊街,也不會上演佛光街事件,因為應該九秒九速度就被人拉左,如果有對手的話。

想得太遠,還是說回餐廳。這間是一間小型的餐廳,要來吃訂位會較好,要打場硬仗,都要有入場卷。

要吃壽司刺身,必定要口腔乾淨清心寡慾,最好來個雪葩,但當然西餐就話會咁樣,為了食日本野迎接那些海鮮為你帶來口腔的衝擊。首先,來杯香檳清新一下口腔,為刺身頭盤作準備,感覺更relax ,讓舌尖更冷靜,準備打場硬仗。

刺身雜錦併盤上場一刻,冷靜的感覺已經蕩然無存。以乾冰造成的仙景效果非常有霸氣,來自仙景的刺身精美無比,甜蝦,三文魚,帶子,八爪魚,劍魚花,劍魚腩等等在輕煙伴濃情下更顯高格調。最喜歡的當然是劍魚腩,肥美的腩部是魚油的震盪,滑得鮮豔甜美。三文魚又係絕對的豐厚,不喜愛都忍唔住食左幾舊。甜蝦不是特別大隻,但新鮮和那種蝦刺身才有的滑滑感覺己勝千言萬語,有點點蝦膏的甘甜。帶子大大粒和八爪魚都係應有水準,吃完呢個雜錦都滿足了很多。








廣島蠔軍鑑,看樣子之澎湃完全吸引到全部人既目光,就如那些36D的女孩就算唔係著低胸你也能感受到其胸前的壓迫感,放入口的一刻,嘩,比見到綾遙賴著泳裝爆出佢既上圍一樣,滿足到不行,那個廣島蠔就好像一架軍艦將其存儲了良久的海水味在你的口爆.發,鮮味源源不絕,感覺就如原子彈拋到廣島的一刻個種震撼,唔好意思,我又用日本明星,又講黃色笑話,又歷史都係想講個種無比的震撼,那種我在外國如日本或韓國才吃到新鮮蠔的那種快感。






蟹膏軍鑑,另一敵軍來襲,口中還未消除的海水味又要接受蟹膏的挑戰了。陣陣的蟹氣漂入口中,濃濃的與海水味纏綿著,蟹膏的強勁氣勢與平時在千両吃到的有過之而無不及。




火炙左口魚邊黑松露壽司上場,頭先個班用左九秒九殺敵,呢個當然也不例外。左口魚識食一定係食個邊,因為油脂夠香夠滑而肉質也算有彈性不韌,配上黑松露簡直係天衣無縫佳偶,左口魚既油脂氣加上黑松露之gas香,全個口腔香得如少女散發的迷人氣味。




油甘魚壽司,也是肥美得無話可說,雖然不是腩位,但其肉質的豐滿程度就如吃細拖羅的柔軟變化,由於太好吃的關係,我不禁吃了兩舊。


中段飲一些清酒,的確是人生一大樂事,如果有美相伴,更好,不過良朋歡聚,是另一意境。



就這樣新鮮的刺身壽司戰場就告一段落了。戰場由冷盤去到熱食。三文魚他他,其實呢個應該係半熱食的過渡,香草柚子汁加上三文魚和大大粒的蟹籽,簡單已經令你更開胃。






接下來既係樣子普通既燒魷魚筒,坦白說,膽固醇之友常中最唔friend係佢,因為味道唔係特別而且垂手可得。不過過左幾分鐘,大顆吃完又吃停不到手驅使我的好奇心,今次好奇沒有害死貓,經燒汁燒過的魷魚爽口彈牙,簡單入味無比。




戰鬥到大家都呈現疲態,但革命尚未成功,同志又點可以繼續唔努力。兩個主菜,轉過身已經隨後突襲。








三文魚柳伴山葵泡沫,名字,賣相均非常一流。其實,我從來不太喜歡吃三文魚,特別係熱食,雖然應該健康一點,但總覺得沒有其他魚質的口感好吃。不過這個沒有煙薰味道的三文魚,經慢煮後其質地在生與半熟中間,其感覺伴上那些清幽的淡淡山葵泡沫,是繼極上刺身盛外另一造型一流之選。







最後吃的係牛魔王必點的西冷牛扒配砵酒泡沫,樣子又係大大份,沒有想過這類日式料理點會有咁特別咁出色既西餐。西冷質素本身出色,其剛剛五成熟的溫度,肉質是粉紅色的色澤,肉味濃而甘香,配一口紅酒,整件事就係我係無線日聽夜聽聽到好乜討厭既perfect match。最重要一提,舊扒好好大舊,呢刻我已經飽到完全戰死沙場。



同枱的女士資質絕對唔少,自古雖然戰場上很少女性上場打仗,我記得應該係得花木蘭。不過今次呢度有幾個女中豪傑繼續戰鬥吃甜品,聽說這類的甜品好出色,於是我試左少少,幾種甜品我對opera最有興趣,其甜度恰到好處,賣相也精緻,可惜我真係飽到只係可以食到一啖,抱歉不能再多談一點……但,枱上的女生全部兩三下手勢便把甜品完全KO,的確,女生力量,真的不容忽視。



對,我忘記了唐朝已經有個女人叫武則天,第一個一統天下的女人而家係無線日日播,提醒你女人絕對不會遜色於男人,特別係在你有需要既時候。

雷霆救兵中Tom hanks 救既係小兵Ryan,我們今晚的戰場,女人救的是Dessert 。


稚內日式創作料理居酒屋
太子通菜街210號地下