2020年6月28日星期日

宮保:下次我要食龍蝦叻沙

當我留意到呢間餐廳的時候,完全因為那碗巨大嘅龍蝦叻沙,F大哥都有返咁上下食量,佢話呢碗野四個人都食唔哂。

愛吃的叻沙又愛吃龍蝦的我當然對呢間野好有興趣,於是F先生叫我去食生日飯,當然唔駛諗,即去。

喺登龍街嘅宮保,其實經過好多次,不過又冇乜特別留意,原來係由陳伶俐丈夫劉頌銘開設的一間新加坡餐廳,主打吃砂鍋宮保菜式。


砂煲由新加坡訂造番黎,其實呢度最出名嘅並唔係龍蝦叻沙,反而喺呢度嘅砂煲田雞粥。

同兩位新朋友食飯,由於我哋三個人都未試過,所以食一啲F先生都未食過嘅野。

坐低先飲杯話梅檸檬梳打,令我想起嘅買馬來西亞街頭嘅風味,味道不太甜,剛好。


前菜係辣椒黃金蛋,呢個菜,好少係香港見到,好新鮮,都幾特別,辣辣地,好開胃。





蝦醬雞轉彎,呢個都幾特別,蝦醬味道不會太濃,可以一戰。


雖我不太好魚,但油浸筍殻的美味,不油又不會過熱氣,筍殻的肉汁好鮮甜,愛筍殻的千祈不要錯過。




新加坡菜點可以錯過招牌海南雞飯,過江龍係唔係一定好?天天海南雞飯已經告訴了你答案,呢度嘅海南雞飯相信唔會好似君悅酒店咁好,我會話同我另一最愛嘅好時沙嗲差唔多,雞夠滑,薄薄的雞皮加上不錯的油飯,幾滿意。




參巴蝦米炒通菜,那有不好的理由,不好是因為太少吧。


由於今日要試多幾種不同的菜式,我們最後沒有叫龍蝦叻沙,吃了加東蝦叻沙,雖不是油麵,也沒有是鰤鮯,但味道也可接受。




主角係砂煲宮保新鮮田雞粥,用上砂煲煲粥,係呢度嘅最signature之作,有細煲和大煲給你選擇,以新鮮田雞來做主角,味道辣辣地,加埋落個粥到,成個粥即刻提升了不少水準,而且隻隻田雞都好大隻,強壯嘅雞腳令人好滿意。





麥片蝦,香港好少做得好,呢度嘅麥片蝦的確令我想起喺新加坡吃到的水準,係冇得飛嘅日子,算唔錯啦,又唔貴。



尾聲甜品點了柚子雪葩和班蘭雪芳蛋糕,班蘭雪芳蛋糕 當然不錯,柚子雪葩似曾相識,應該在某個地方吃過的來貨,無乜特別,要吃一定食班蘭雪芳蛋糕。



整體感覺幾好食,但最重要,下次要吃嘅係龍蝦叻沙。



Restaurant : 宮保
Address : 香港銅鑼灣登龍街36-48號登輝大廈地下E-F號舖

月:阿占的哀的美敦書

如果跟近來你有聽過嘅dear Jane 嘅新歌,你應該聽過乜嘢係哀的美敦書。

你有聽過呢首觀音兵悲情歌的話,可能你會明白點解我會攞嚟做呢邊食評的主題。

阿占不是觀音兵,佢係一個有美滿家庭嘅老闆 只不過佢嘅私房菜月準備搬舖,今個月會光榮結業,佢落下的哀的美敦書,我當然要接,離別前當然和幾位親戚朋友一齊食。

其實食過幾次,不過每次都係和一班朋友食今次第一次和屋企人嚟食,本身諗住除咗打邊爐之外都加啲西餐,因為意粉好精彩,不過份量太多,嗰晚直頭連呢個餐都食唔哂。

先選擇湯底,西班牙海鮮湯鍋、花膠雞鍋、麻油雞鍋、冬蔭功雞鍋、椰子椰皇雞鍋、咸菜胡椒豬肚雞腳鍋、番茄牛粒湯鍋、芫茜皮蛋大地魚湯鍋、蘿蔔豬骨湯鍋絕對令你眼花撩亂,基本上每次我都一定食西班牙海鮮湯鍋,呢個完全係好似西班牙海鮮湯嘅做法,只不過佢唔係冷凍version ,勁多洋蔥番茄加上濃烈嘅龍蝦湯頭,又係未食已經要不停飲。



西班牙海鮮湯,需另加$100 ,不過值得加。

另名也試了花膠雞湯,需另加$150。之前我試過買油雞都非常精彩,不過要小心,麻油雞真係會搞到邊爐都唔使打。

花膠雞真係非常之精彩,呢邊有雲耳,花膠,超嫩滑嘅雞,還要加上勁好味嘅魚唇,呢個魚唇真係好少地方有得見 好有咬口絕對係人間美味,大推薦,枱上冇乜邊個唔讚不絕口,條條花膠食到個口都有骨膠原口感。






有兩個signature一定要講咗先第一個就係炸薯條配自家製嘅黑松露醬,呢個係吃不停,如果la vache炸薯條得你歡心,呢度做得更好,仲要係個靈魂黑松露醬。



無乜地方做得好過佢嘅炸厚切午餐肉,外邊嗰層脆到不行,入面又熱辣辣,正,朋友推介點買個黑松露醬,唔好嘥。

不過如果個人覺得占占可以用上韓國嗰隻午餐肉嘅話應該會更加正。




五款時令海鮮,手切肥牛,西班牙黑毛豬腩片,手打墨魚丸,自家製黒松露牛肝菌冬菇餃,炸魚皮和粟米,雜菜籃一位$420的火鍋,真係食到捧住個肚走,樣樣野都好食。






特別要讚手打墨魚丸同自家製黒松露牛肝菌冬菇餃,個墨魚丸好食過好多街邊有名嘅魚蛋粉麵檔,牛肝菌冬菇餃豐滿又大隻,好食,滿滿黒松露牛肝菌香。

手切肥牛有兩碟,我也忘記了邊碟打邊碟係乜嘢位置,總之同我喺李輝記買嘅一樣咁有水準。



五款時令海鮮有鮑魚、蝦、花甲、象拔蚌仔同蟶子,蟶子的品種最特別,其他海鮮已經唔使點講有幾好食,睇相就已經知道。





最後差啲唔記得讚佢炸都超正嘅炸魚皮。



最開心係呢度真係好有屋企嘅感覺,自攜香檳白酒紅酒你來打邊爐真係好有家的感覺。

朋友說下次應該再嚟食西餐,正確下次等阿占搬咗舖先啦。


幸好我在哀的美敦書發出之前來和月最後一次共聚,當晚所有人都非常滿意。

PS突然想起上次和Andy來食飯已經是年幾前的事,那個時候我約在這裏派帖食飯,一年後你離開了,你在天國還好嗎,我在想,你還在的話,我一定會叫你和我吃一次哀的美敦書。

月 
尖沙咀加連威老道71號1樓


去滾:唔滾唔知身體好

唔滾唔知身體好呢句野,就算你冇睇過《大丈夫》呢套戲都一定聽過。

滾呢個concept ,火鍋界一路都玩開呢隻字,不過完全係一間火鍋店體現出來,體驗出創作力量和幻想會嚇你一跳嘅例子,空間原來可以好廣闊。


見過好多朋友都嚟過呢間咁fancy嘅火鍋店打過邊爐,不過我就未有機會試。


上到嚟呢間餐廳,最有深刻印象係呢度嘅裝修,同埋句句精警嘅句子,就連阿爸阿媽見到都忍唔住影吓相。






仲有每位奉送一個肚兜,都幾靚幾特別,可以見到餐廳真係好有誠意。

四個人打邊爐其實叫嘢食有少少難度,不過最好係呢度竟然有四人套餐俾你揀。

選了四人套餐,最好唔使我諗。

我諗首先要讚嘅就係呢個原隻龍蝦花甲海鮮湯,喺月吃過了美味嘅西班牙海鮮湯以外,呢個係另一個香港好深刻嘅海鮮湯。






店員係你面前將牛油煎香,加上其他蔬菜配料如洋蔥和海鮮,原隻龍蝦同好多蝦,蟹,花甲掉落去,再係你面前點火,再滾大約10分鐘。


先飲一下湯頭,那股牛油的靈魂,真係不得了,先飲兩碗為敬。





最重要係海鮮新鮮,龍蝦嘅肉好彈牙,加上甜美嘅花甲,入口無沙兼鮮甜,開頭我見呢個鍋底咁貴,我的確會覺得有懷疑,但係飲完之後,就知道絕對物有所值。

老實講飲完湯,又係已經半飽。


不用想叫什麼菜,蔬菜拼盤最好,乜都有,而且最緊要新鮮。

有點奇怪,喺呢度竟然都會有小菜供應,套餐提供嘅椒鹽豆腐又幾好食,最重要係佢連嗰碟都特別過人。





即日手切陀地靚肥牛,夠肥夠牛香,絕對唔係求其嗰啲美國肥牛貨色,可能你會驚套餐嘅牛會唔夠靚,但我話你知呢度一定冇呢個問題。



黑豚腩肉,可能未必有牛肉咁驚喜,但也不錯。



家人打邊爐一定愛豆品,點了八秒トト響鈴,呢啲打邊爐必備,尤其是咁正嘅湯,一定要有響鈴去吸下啲海鮮湯味。


手剁牛肉餃,應該係自家製,大大件餃內,咬落去全部都係洶湧的牛肉。



另外一個出奇嘅點係,尾聲你唔係食公仔麵或者烏冬去消費個海鮮湯,反而係煲仔飯,呢個煲仔飯都出奇地不錯,飯焦香,加上甜豉油後,我無投訴。

當然我話你聽好食過坤記或者永合隆就一定勢係假,但我又唔係收錢寫,俾錢食,點解要呃你。





可惜當晚真係食到太飽,如果唔係整返個海鮮湯烏冬,成個經驗應該會更加完美。

唔滾唔知身體好,今晚滾完,又點會唔好,有興趣,就不如一齊去滾啦。

去滾 
銅鑼灣登龍街1號金朝陽中心2期Midtown27樓