2020年7月30日星期四

粵:我在酒店吃米線

還記得上一次來屯門黃金海岸嘅粵,已經係五年前嘅事,那餐晚飯驚喜不斷,吃得非常高興,什麼格蘭焗釀鮮蟹蓋、雲海麒麟星斑卷和鳯躍天仙,樣樣都係有姿勢有實際,係當年吃過一餐不錯的一個經驗。


五年來,來過黃金海岸幾次,但都未有機會食番粤,今晚終於有朋友提議嚟呢度食飯,一於同埋老婆過來吃晚飯。


事先沒有特別提議過食乜嘢menu,又冇話特別想食番嗰陣嘅菜式,相反,就叫師傅提議下有乜嘢新菜式可以食,同五年前排場不同,不過今晚驚喜更加大。


席上有朋友有值得慶祝嘅事,先飲杯再祝大家身體健康。



先上場嘅係香糟鮑片伴海蜇頭,鮑片好爽,雖然唔係好大隻嘅品種但係配上香糟,味道獨特,同海蜇頭嘅爽相映成趣,最重要夠凍,最適合而家大熱天時食。





鍋貼大蝦多士伴鮮果,蝦多士的品質同做得好出色嘅港大同學會最高峰時期有過之而無不及,加上那些甜到不行的鮮果,又係令人回味,再加啲秘製嘅汁,好開胃。





然後是燒味的時間,鵝肝片皮乳豬件加蜜汁叉燒,從來冇諗過鵝肝襯乳豬係會咁夾,加埋個米通,個皮脆到落地有聲,好特別。





蜜汁叉燒平日吃得太過多,精彩的比比皆是,今日呢個相對水準正常。




飲一口鮮松茸鮑魚燉雞湯,固中鮮甜甜在心,松茸鮑魚燉雞,勁多料,吃料都吃不停。



然後應該係是晚另一特別嘅菜式,蜜汁火方伴油泡碧綠帶子。





蜜汁火方好靚,就咁食太鹹,夾個飽再加脆脆,另一個好味嘅食法。



碧綠帶子,雖然用油泡,不過都可以解火方嘅輕微油份,隨帶子附送嘅蔬菜,鮮甜得來時間又正好。



個人私心都幾喜歡呢個陳皮韭菜生煎雞,聽朋友說上次食呢個菜式嘅時候陳皮味非常出眾,今日反而唔夠勁,韭菜生煎雞味道當然出眾,不過如果陳皮味強多一點嘅話應該整體會好好多。




金湯西紅柿燴上素,又係另一個夏日傾情嘅菜式,平時食菜來來去去都係果幾樣,但呢個配搭就非常新鮮 ,整個西紅柿甜到食糖咁,加上了入面嘅菇和菜類,再飲淡湯,好refreshing,直頭冇諗過會咁好食,絕對是一個大驚喜。



單尾絕對係點題作,雲南石窩風味過橋米線,之前係嗰個人嘅FacebookIG post相後,好多人即刻問喺邊度,排場咁大嘅米線應該好少見,可以比較係長沙灣嘅雲南風味人家,但當然嗰種排場同呢個係兩回事,我也不說什麼過橋米線嘅前世今生了,但呢度係你面前用石鍋加上煲熱嘅湯,加上十五種不同配菜(多到我都費事寫),即整即食熱辣辣最好。




我相信咁樣食法,酒店方面真係呢度認第一,無人認第二,特別外號雲南米線嘅朋友,一定要來試試。




唯一一個缺點,我會覺得可以有少少炸醬辣辣地會惹味啲,希望下次黎會有辣度可以選擇。


甜品當晚吃的有南安子燉桃膠,玫瑰火腿酥餅和香芒凍布甸,特別係南安子燉桃膠貴氣逼人,女士最適宜吃。



玫瑰火腿酥餅都好食,但會太肥太油,最後的香芒凍布甸,當然係消暑傑作。





呢個酒店食米線嘅經驗,不錯,咁新鮮絕對要試,不過暫時都只得兩人一齊先可以黎到,要記住啦。


粵 
屯門香港青山公路1號香港黃金海岸酒店低層地下

2020年7月29日星期三

焱丸水產:學半澤直樹吃飯

冇得去旅行之下,唯有睇電視止飲食癮。

呢幾個星期,連旅遊飲食節目都係睇得7788已經夠慘,最慘遇上全日禁堂食,連好多餐廳外賣都唔做,要休息返一段時間,飲食業冰河時期,更加雪上加霜。

今晚睇左第一集半澤直樹,見到佢放工之後同朋友去居酒屋,飲番杯啤酒,食下串燒,多麼好。

可惜而家放咗工,就只有返屋企,邊有得多姿多彩,冇人想變成四個號碼,然後俾人指點你去個邊到邊到。

諗起月頭先至食左餐焱丸水產,那個時候疫情還沒有那麼厲害,成間餐廳都坐滿人,直頭好似半澤直樹嘅場景一樣。

嚟到呢度個氣氛好自然就一定要飲酒,選了非常有趣嘅柚子啤酒,都不錯,又唔會太甜。

老婆點了梅酒highball,夠凍夠strong,好飲。


前菜當然係要叫刺身,刺身都係一啲大路嘢,雖然唔係好靚,又唔係話超級好食嗰種,不過價錢又唔算太貴,尚可接受,海膽,帶子,三文,呑拿和池魚,最合理的拼貼。





另外點了麻醬蕃茄豆腐沙律,開胃首選。


蟹味噌甲羅燒喺呢度嘅首本名作,基本上次次黎親都一定要食。



你可以選擇加黑松露,價錢一樣,味道口感都複雜一點,不過個人來說,我覺得剩味噌都好好食。




一口放入口,好幸福,呢個絕對係又平又靚嘅選擇。


來到咁好氣氛,當然要燒下野,海鮮選了鮑魚和帶子,店員即刻係你面前燒俾你睇。





鮑魚夠新鮮又大隻,帶子磯燒同樣出色。



由於兩個人唔敢食太多野,再加多個北海道海鮮炒飯就剛剛好,可惜呢個炒飯就比較重手,吃落都過鹹。


當晚本來還想叫多些海鮮,可惜胃口不大,而家有少少可惜,諗返起都唔知幾時先有機會再去,想學半澤直樹食居酒屋磯燒,你都係留返係屋企睇電視吧。

焱丸水產 
尖沙咀棉登徑23號華楓大廈地下5&6號舖

Springfield:寫於7月28日禁堂食令前的最後一餐

這是香港有史以來飲食界值得記錄的一天吧。

我諗,全香港人都未試過經歷沒有堂食的日子,當然很多人也在討論,冇堂食又算得啲乜嘢,抗疫當然緊要多。這不是時事節目平台,政治也不談了,也不想談抗疫緊要還是食飯緊要。又或者有冇議員幫飲食界出聲呢啲咁嘅問題,世界已經太亂,出少句聲當幫忙。

只不過想講愛吃的人通常想最後一餐食餐好,這個下午大家點忙都會抽空出去食一下午餐。

幸好剛剛工作需要,我要到灣仔工作,所以就抽空來到這間心儀已久的餐廳食個靚午餐。

好彩沒有失望,這個下午,我來到Springfield春園和牛粉專門店。

更好彩係入到黎先得知原來呢間餐廳由聽日開始會關門,直到另行通知,真係多謝政府,你想係踎街去郊野公園食碗越南湯河都冇機會。


選擇唔多只有幾個,我最後選了最貪心的選擇,最多野嘅大滿足全配料牛肉河,食完睇吓會唔會真係大滿足。


材料有和牛湯底、火炙和牛、澳洲牛肉粒、慢煮牛肉條同蘿蔔粒。


平時好多人,不過今日一入去就有位,而且我仲要係第一個,正,多得政府先唔使排隊,哈哈。

仲有間餐廳提供嘅辣芽菜非常非常好食。


記得跟佢嘅指示食,整體感覺好好。



如果愛看芫荽、紫洋蔥的話,記得要多啲,好配合個湯。



先試湯底,同你喺越南食到嘅有少少分別,清新要溫婉,牛骨香,牛肉味隱身於湯中。


香料一碟有金不換,青檸同鵝蒂,將香料放入個湯到品嘗又係另一個層次,加幾條河粉,又一個層次。


先試牛肉,好正,唔算肥,牛味好重,而且好大塊。



你個人最愛個慢煮牛肉條,好淋,肉味四射。


牛丸個複雜性非常精彩,似牛筋丸個狀態,有口感而且有層次。


呢度推介食河粉而唔係食金邊粉,一定要信。而且河粉可以話係必選,完全同怡保河粉嗰種質感有異曲同工之妙。



蘿蔔就得兩粒,相對較少。而且真係較細粒,而且相對其他品質太好之下,個蘿蔔就顯得格外普通。


飲品來講相對較貴,但係聽日就冇堂食,對自己好啲飲杯青檸可樂。


成碗湯都飲埋,吃到碗底朝天,這個應是常識吧。


黃店黎講,整體質素好高,佢開番一定要支持。

下餐係幾時,我都唔知,只能說,聽天命吧,最重要還是希望係唔封關嘅一天,我地可以在家自保吧,香港疫情淨係可以佛系受控吧。

Spring field 
灣仔汕頭街25號地舖