2020年9月23日星期三

龍逸軒:點心爭霸戰

呢排飲咗幾次茶,不約而同食左幾間酒店嘅中餐廳,既然市場咁多唔同嘅優惠,不如就同大家簡單介紹吓。

星期一至五,食肆從來都多優惠,酒店中餐廳嘅點心爭霸戰越嚟越激烈,九龍酒店剛推出星期一至五,4人同行$988, 平均每位成人$247,仲係已經包括加一服務費及茶芥,兩個時段有差唔多40幾款點心俾你任食,可以話近來最優惠package


如果你冇四個人,係eShopcoupon,平均一個人都係$272到,同樣包括加一服務費及茶芥。又或者如果你同我一樣,平日要返工,冇可能周中嚟飲茶,星期六、日及公眾假期都只係$ 285.5一位,都唔錯。



由好多種唔同嘅即叫即蒸點心到炸物到湯羹到精美嘅前菜小碟再到粉麵飯,仲要有各種唔同嘅中西食甜品,如果你有返咁上下食力呢個絕對係超值嘅Offer,不如一齊睇下有乜食。


先講點心蝦餃燒賣當然係首選,不過佢嘅上海小籠包都非常唔錯。





腸粉有兩種,叉燒腸粉同上素腸粉都係大件夾抵食。




叉燒包同珍珠雞有位都可以試吓。



另外上素卷同粉粿都係非常精美,好食得來打卡又適合。





如果要講最愛嘅蒸點,一定係蟹肉菜苗餃,蟹肉波濤洶湧咁飽滿,好食。


煎炸野方面完全唔輸蝕 XO醬炒腸粉同蘿蔔糕都係水準之上。





另外沙律醬蝦多士基本上食兩碟已經值回票價。


另外叉燒餐包,炸春卷,腐皮卷,鹹水角等等都係愛煎炸野嘅人士必選之作。








湯羹相對較少選擇,雪耳魚蓉羹同埋是日湯品得兩種你選,個人覺得魚蓉羹抵好多,又足料。




前菜先係重點,叫一碟蜜汁叉燒又係叫你回本了,而且質素絕對唔輸蝕其他五星級酒店嘅酒樓。



另外有好多唔同嘅小菜例如椒鹽魷魚酥,小排骨、青瓜、雲耳、豆腐粒、海蜇、醬蹄等等,講真全部都係有板有眼,平時你喺普通酒樓叫都係至少頂點類嘅菜式,你去完食呢個飲食點心,好難返轉頭去嗰啲連鎖酒樓飲茶。






尾聲嘅粉麵飯先至正,之前已經食過四川擔擔麵麵,就算你冇位都絕對值得食。




最愛佢嘅乾炒牛河同埋麻辣牛鬆茄子炆伊麵,只不過當日真係冇位。靚女K小姐話炒飯都好食,可惜,搵機會下次再試下。


中式甜點有例如桂花糕同勁好食嘅燕麥香芒糕。





而且仲要有雲呢拿雪糕同朱古力雪糕,如果喜歡西方甜點有意大利芝士餅、芒果拿破崙和藍莓芝士蛋糕。


老實講咁樣嘅陣容,兩個鐘俾你任食,絕對係抵到冇朋友。


呢啲有今生無來世嘅價錢絕對可一不可再,有興趣就就快啲訂位或者上e shop睇下。


龍逸軒 
尖沙咀彌敦道19-21號九龍酒店2樓

2020年9月20日星期日

凱悅軒:傳統粵菜的巡禮

有多久未試過下午和幾個朋友悠閒地吃個午飯。

正因為年假加上小意外,這個星期休息,呆在家很久,又悶又心情不佳。朋友約食飯,難得係想去已久嘅凱悅軒,而且仲有位很久冇見嘅朋友,大概是時間出去休息下。


想試凱悅軒都一段時間,有朋友話過任食點心非常不錯,有朋友前排吃過話有點失望,我自己無去過,冇得作準,用舌頭感受最穩陣,才作定論。


加上有黃皓勤師傅剛加入左凱悅軒做新任主廚,佢對傳統粵菜感嘅迷戀,加上對其色、香、味俱全嘅講究同要求,令我非常期待佢九月推出的全新香港傳統特色菜菜單。


餐廳感覺係幾舒適,雖然地方不大,但空間感幾充足,特別係當日有點陽光透入餐廳,當日又唔太曬,好有周末嘅感覺。


第一個菜式食蜜餞燒鳳肝,吃下去就知道呢個係傳統菜式嘅變奏,就像見到金錢雞這個老朋友一樣,不過樣子不同了,靈感則來自以馳名傳統粵菜金錢雞,呢度嘅雞肝燒烤了20 分鐘後加上蜜糖輕輕一烤,加上了那個醬汁,絕對係令人讚好,佢外面微微焦香但入面卻保持了獨特的質感,惹味可口。



你見乳鴿以為無乜特別傳統廣東菜,對不起,比你想像複雜得多,羊肚菌瓦礃煀乳鴿,乳鴿先釀入預先煮熟的羊肚菌,加上了冬菇,紅棗和雲南火腿,加上個乳鴿肉質鮮嫩,係咁多精彩嘅功夫下又點會唔好食?






一路都好鐘意像桂花炒星班魚絲呢類非常考功夫嘅菜式,無番咁上下功夫唔得,師傅連續多次快炒,炒到雞蛋至粒粒分明狀,吃下去口感一流,和件件極有口感的星班魚絲同芽菜的口感好襯,我在想如果芽菜都用上怡保嘅芽菜,個菜式就可以話係完美。




尾聲來個魚湯浸菜苗,簡單得來又可以吃到師傅手功,魚湯甜到不行,加上菜苗條條都夠新鮮,簡單而隆重大概就係呢個意思。



冇黎過真係唔知道,原來呢度嘅中式甜點非常有名,當然四年前同系沙田18嘅甜品都幾深印象,不過今日感覺更佳,台上每個人都推介呢個酥皮流沙盞,外表烤得金黃剔透,外層酥皮脆得來剛剛好,入面嘅流心同牛油絕對無得挑剔,和bakehouse 嘅出品有異曲同工之妙。



平時我好少食冰糖葫蘆,但呢度做得唔錯,佢冇好似我喺北京食過嘅冰糖葫蘆個外層咁甜,草莓嘅甜度和酸度同個外層糖衣配搭得剛剛好。



好少會見有家鄉茶粿呢類甜品提供,自然就會想起上環街市個位只買茶果嘅阿婆,呢度嘅小巧玲瓏,食完又唔會太膩,女士絕對可以放心食多兩件。



傳統糖水我哋叫咗楊枝甘露同蛋白杏仁茶,相對蛋白杏仁茶係我最愛, 楊枝甘露有其他地方更精彩,當然你可以話杏仁茶唔係應該海景軒做得更好嗎?我又覺得水準算係直逼海景軒,呢個先至係我最欣賞嘅地方。



可惜當日還未可以四人以上嘅飯局,餐牌上面有其他特別嘅傳統菜式,好似蝦多士、焗魚腸、水晶牛肉等等都非常吸引,唔係度度都可以搵到呢啲咁嘅美食,我在想,配合呢度嘅staycation$1000嘅額度可以俾你用,不如來吃多次,加享受返一個Hyatt groupstaycation


但當我想起咁多年我都仲未試過Hugo’s,我又有少少掙扎,so why not both ?


凱悅軒 
尖沙咀河內道18號香港尖沙咀凱悅酒店3樓



2020年9月11日星期五

Lion rock:獅房菜

要中菜做到像omakase和西菜般美得令人心曠神怡的地方,相信都只有酒店米芝蓮星級中菜才能做到,想要又好味,又靚又有主題,講真,唔係太多。

上星期在Lion Rock吃過江肇祺師傅和帝京軒的一個新菜單,聽師傅講呢個菜單經過左一年嘅精心鑽研,呢一系列嘅菜式都非常有創意而且配合唔同國家嘅獨特食材,新鮮感一流。


而且食材嘅烹調同擺盤都係帝京史上最佳,足見成個團隊嘅心機,加上仲要有wine pairing ,基本上冇得抗拒一定要去。


Lion rock 一直以來都係好有氣氛,地方又舒適,同今晚食呢個十道菜 wine pairing dinner,絕對非常適合。



先上場的聶馥以山楂.白朮.蜂蜜入撰,像雪葩般嘅感覺,山楂嘅酸味好醒胃。



品前係樱桃蘿蔔,螢光魷魚,鮮鮑魚,以不同醋調味,椰子醋,陳醋和魷魚,鮑魚都好夾,又係好light,好令人開胃嘅前菜,特別配上這個香氣和甜到均衡嘅白酒,好精彩。







中京以石頭魚,貴妃蚌日本夢美人米和石頭魚煲成嘅魚湯,係非常之清新開胃嘅前菜後將你嘅胃注入一股暖流,美人米煲到好似奶一樣,仲要係有魚湯嘅鮮甜,又點會唔好。




焱菌係另一高貴之作品,羊肚菌.日本海膽.北海道牛乳,可能你會覺得呢幾樣嘢大纜都扯唔埋,但海膽加牛乳其實都天生一對,加上羊肚菌在內,入面再加上珍貴嘅牛肝菌,和蛋白和牛乳一齊蒸熟,那個獨特滋味,非常複雜,加上仲要係菇菌嘅最佳季節,又點會令人失望。



䆐珍也是我當晚最愛,關東遼參,燕麥,雞頭米,每樣嘢都係養生之選,用上了日本嘅關東遼參,入面釀咗西班牙黑豚肉,再加上花菇,燕麥和蝦膠,成條遼參再煎得勁香,加上那口感十足,又對身體健脾去濕,唔單止好食,還要有養生效果。




淼珏應該係海鮮迷嘅最愛之作,本地杉龍蝦,原來係每年本地六至八月之特產,成日話不時不吃,當然而家食就最好,加上綠胡椒,紅花椒調味,旁邊仲有一個小巧的泰國茄子,入面有蝦頭肉同蝦膏,唔會太辣但係又有點刺激。





中場飲杯2018嘅阿根廷新世界酒,喚醒了身上愛紅酒嘅靈魂。



然後主菜係羴補,澳洲羊架加上黑蒜和藥膳,藜麥來煎同焗,唯一一個唔好嘅原因就係當晚擺盤未盡完善,不過羊架之香又令人忘卻了所有缺點。






加上了後來濃烈夠full body的紅酒,更加完美。



雥禽也可以話係另一個完美菜式,呢個菜式煙燻雞和片皮鴨作靈感,以農場本地鮮雞做主角,以蘋果木,茶葉同黃糖作煙燻,風乾後起肉手撕,整得靚靚一件脆雞,底部配上紅火龍果肉,蘋果醬同酥皮造成嘅果醬酥,成個菜式口感都好大對比同多元化。






皛蔬以名貴嘅黑虎掌加上杏仁和黑松露,相信唔係好多地方可以食到呢個Combination ,做出來嘅效果,又香又好味,黑虎掌加上黑松露嘅獨有香氣,點會唔喜歡。


垚苗係今晚主角,以法國鵪鶉和泰國糯米為主,加上意大利黑醋,用上八寶鴨和煎糯米雞做法,用上鹹蛋,乾蔥,鮮蓮子,栗子,叉燒,燒鵝和糯米,沾上蛋醬後煎得好香,呢個絕對係心機菜式,法國鵪鶉令我想起了前排木村嗰套日劇,想起每個主角嘔心瀝血就為咗煮出好味道嘅菜式就更加欣賞呢個菜式。






配上了來自蘇格蘭嘅威士忌,個種嘅香氣,配上法國鵪鶉,好得。





尾聲嘅日本十勝红豆,天津香梨.日本黑芝麻,又係每一樣都精美得很,當然甜品從來唔係我杯茶,係欣賞緊十勝紅豆嘅甜味嘅時候,我還在沉溺在剛剛幾個主菜和wine pairing嘅陶醉之中。



有興趣記得係1031號之前食呢個期間限定菜單 ,菜單分為八道菜和十道菜。加上而家終於可以四個人食飯,大家可以出黎休息下 ,欣賞下大廚一年來嘅心機和成果。



Lion Rock 
旺角太子道西193號帝京酒店3樓