粉果佬：呢期最hit的燒賣

如果你喜愛燒賣，你應該知道Facebook有個群組叫香港燒賣關注組。 有好多燒賣迷分享好多燒賣嘅資訊，前牌講燒賣中嘅Hermes金龍，又有勁多人講叁拾士多，然後蘋果日報又報導佢同點心紙嘅恩怨情仇。 再講到另一個名物高山粉果燒賣，又係一個羅生門，係飲食圈咁多年第一次見呢一個食材可以紅得咁厲害。 來自舊日高山粉果燒賣嘅新店粉果佬呢排又係紅到發紫，上星期六五點，你會見到有五十幾人喺大埔昌運中心排到癲，為嘅就係一口燒賣同粉果。

幸好當天買到最後一件粉果，試到傳說中的水準。

恩怨情仇唔多講，呢度唔係上映緊溏心風暴，粉果佬咁大年紀都依然係呢個淡市再投資開新鋪都幾令人佩服，日日仲要準備餡料，搓皮到蒸燒賣，全部由佢同其他員工一手包辦，燒賣因此水準都算高。 燒賣嘅主角有肥豬肉、蔥頭、冬菜同少見嘅鯊魚肉，粒粒都非常小巧，而且人手做，唔係用機整，係值得讚嘅。

十元六粒，粒粒味道都非常煙韌無比，都幾好食，價錢都平過林記。 另一名物粉果，同樣人手搓皮，加入粉葛，豬肉和芹菜，個皮相對非常之薄，和平時食開嘅粉果感覺完全唔同，平視我覺得厚皮嘅粉果感覺麻麻，因此相對我都幾鍾意呢度粉果嘅形式。

另一樣要讚嘅就係佢嘅辣椒油，無論配燒賣或者粉果都非常值得推薦，好食到我買咗樽返屋企用嚟打邊爐。

不過總括嚟講，如果有機會行過又唔使排隊，值得試下，以十元可以吃到不錯的美食，還好吧。 另外一個話題，又係問呢間餐廳係藍定黃，唔好意思，我手頭上冇證據，冇fact check ，我只能夠用口check啲燒賣好食與否，如果你想再深入探討呢個問題，我幫唔到你啦。 粉果佬 大埔安慈路4號昌運中心地下32號舖

Staycation series (2): Alva Hotel飲食篇

如果之前你有睇過我嘅食評，你就知道幾個月前我去過源峰食過一餐Omakase，那次感覺，非常有驚喜。 今次再訪，的確非常期待，但今次package提供的雙人日式關西晚餐，同上次唔同，基本上我會話係一個日本菜巡禮。

點解咁講？你睇吓今晚食乜嘢就知。 個餐包一杯清酒，自家品牌，好貪心諗，如果有一支，多好。

前菜的三文魚籽薯仔沙律，小巧得很，不過原來這只是序幕。

本日刺身有3種，最愛嘅當然係拖羅，還有赤貝，我們手多，想試下師傅嘅壽司，就叫咗兩件，和上次嘅水準依舊不錯。

平時食和牛壽喜燒，你吃到牛嘅油脂香，今日食咁大塊嘅和牛又點會品嚐唔到呢樣嘢，總之，好正，個壽喜燒嘅湯又唔會太甜，加上其他配菜，好想食個白飯或烏冬。

當然如果你見到個Menu你都覺得冇可能再叫烏冬，因為銀鱈魚西京燒立刻上場，仲要個銀鱈魚大份到直頭係a la carte嘅份量，和剛才嘅和牛一樣，油香盛放。

天婦羅盛合先係一個大災難，我想講災難嘅原因係我們下晝食得太多，呢個set實在太大份，太驚喜，基本上可以話係食咗三個主食一樣，有蝦有青椒有其他唔同款式嘅蔬菜天婦羅，絕對係美味到不能不吃，就算幾飽都會繼續食落去。

尾聲的松葉蟹伴淡醬油橘酢涷，入口大大啖的蟹肉，加上那啖啖酸酸的橘酢涷，中和了剛剛天婦羅，壽喜燒同銀鱈魚嘅飽肚感。

尾聲的三文魚籽海膽丼味噌湯，是最好的結尾，加上了自家製豆腐布丁，咁嘅陣容真係食到你非常飽。

同上次主力以刺身和壽司為題的廚師發辦有不同，但今次佢個餐更以mass market 為目標，如果你追求食啲靚嘅刺身壽司可能你會有失望，但又係個句，咁嘅價錢嘅staycation package ，絕對無得輸。 而且食飽之後，你可以喺餐廳外嘅bar吹下風，欣賞廿八樓上城門河同石門嘅景色，特別係呢排秋風起感覺特別好。

講完晚餐，一定要講吓早餐，staycation package 包自助早餐，有多款唔同嘅選擇你有興趣可以點晒咁多款，最推介嘅當然同St Regis一樣嘅鮑魚雞粥，其他如冷麵餐，奄烈，炒蛋等都不錯，絕對值得早啲落嚟食，而且最重要呢度唔會好多人排隊，因為實行A la carte的點菜方式，更加唔會好似其他酒店咁大排長龍先食到個早餐。

Staycation series (2): Alva Hotel玩樂篇

係沙田城門河附近，當然有好多戶外活動可以玩。

單車公園就係隔離，點會錯過，配合河邊景色做運動，採單車最正。

酒店大堂內，大家可以免費租借單車到單車公園踩。只要俾按金，就可以由早上十點踩到夜晚六點前還車，而且仲要好多選擇，唔怕同人爭，有大人同小朋友車可以揀。

而且如果你同我一樣鍾意跑步，夜晚試吓跑城門河都係一個唔錯嘅選擇。

當然，呢度嘅泳池都係非常之不錯，可惜當晚因為太多人訂左泳池嘅關係 ，無緣喺度游水，夜晚泳池景觀特別正，而且係恆溫泳池，適合大部分人士。

仲有千祈不可以錯過呢度嘅Gym Room，我又係冇及時book，無緣試到呢到最新最潮嘅健身機。

當然，淨係可以沿着城門河跑步同埋踩咗兩次單車，都已經非常開心。

最正嘅仲係可以係呢度嘅一田超級市場shopping，基本上任何性格嘅人都會有一樣活動啱你。 總之係呢間酒店，我相信你入住嘅呢二十四小時，應該都係忙到癲。

Staycation series (2): Alva Hotel 房間住宿篇

原來上次寫完海洋公園萬豪staycation 後，都有一段時間冇寫過呢個topic 了。

無他，香港人，個個人都係staycation 嘅KOL，youtube Facebook 資訊多到滿瀉，剩係小C里先生，都夠大家睇。以講food嘅blog黎講，講staycation著重嘅都應該係酒店質素，價錢同食物嘅平衡同取捨吧。 今日Trip Advisor講開十大最好嘅香港酒店，先想起手頭上有好多package可以分享，不過寫左啲特別先啦，先推薦有郊遊感覺嘅Alva hotel。 位於石門呢間帝逸酒店，之前去過兩次食飯，感覺都非常不錯。除左餐廳介紹以外，呢間酒店住落都覺得非常不錯，一齊睇下呢個以源峰晚餐為主題嘅<想念你．源峰 旅宿計劃>，兩位價錢$1,799，的確係為冇得去旅行嘅你我他提供一個不錯嘅體驗，或者唔應該成日諗住旅遊氣泡，先玩下本地遊，也不錯。 Package 包括一晚豪華客房嘅住宿、源峰雙人日式關西晚餐、Alva House享用雙人自助早餐，餐飯一位其實已經要$600位，基本上個房又係送俾你一樣。（次次都係推薦呢點，因為真心超值。) 之前試過唔同酒店嘅staycation，地點最遠應該可以話係呢間Alva hotel 。 睇吓你鍾意住乜嘢地方，朋友都話如果又住返尖沙咀金鐘區，全部都係石屎森林，冇乜渡假感覺，如果好此道，呢間酒店絕對幫到你。 位處喺城門河隔離，房間都會比香港和九龍區嘅酒店大得多。

整間酒店都用上園林嘅設計，空間十足。

如果喜歡望海，可以選擇望城門河方向嘅房間，視線望城景，雖然景觀上相對遜色，但老實下午我都會出咗去玩，景觀對我來講都冇乜所謂。

最正嘅係個酒店空間感好夠，超大嘅廳可以攤喺度好舒適咁睇電視，當晚就可以係度睇戲，感覺好cozy，真係家嘅感覺。

呢間酒店最欣賞嘅係佢嘅環保概念，以玻璃樽代替樽裝飲用的well，下至用上木製的個人清潔用具，而且由於呢間酒店仲係好新，所有設施都keep得好靚。

成間酒店都仲可以用iPad來控制，好user friendly。 呢張雙人床都非常大同非常舒服，房間又有另外一部電視，真係住到唔捨得走。 咖啡用上illy，相對和其他酒店不同，較特別。

最喜歡雙洗手盆嘅設計，用上好靚嘅雲石令到整個廁所都有格調得多。

總結成個房都非常之乾淨，而且夠大，呢個價錢來講絕對係超值。