2020年11月27日星期五

餃掂:壽喜燒餃

坦白講,喺太子分店食過一次,雖然印象不算非常深刻,味道中規中矩,可以encore,但都要睇啱時間地點人物。


就係呢個假期咁啱行開去西環,就特登過嚟餃掂嘅最新分店。


來這裡的主要原因,有個很愛餃子嘅朋友喺佢個blog度寫咗西環分店有種分店限定叫做壽喜燒牛肉餃,佢話非常好食,絕對值得專程一試。


於是和朋友食完午餐之後就過嚟來吃下午茶,第一樣點的當然是壽喜燒牛肉餃。

我們點了煎的,因為朋友說煎餃味道最突出。
肉汁勁多,咬下去出來味道又香又濃嘅壽喜燒味,都真心好食,價錢都唔算太貴。
由於我哋頭先嗰餐唔算太飽,我哋決定點多一個湯餃,清清地,當然係佢手本名菜大滿貫素餃。
豐滿嘅素餃,非常大粒,呢個同太子分店所包嘅餃,一樣出色。
龍鳳蛋,睇樣好似普通,但吃落去,又幾滋味。
另外要補補佢,當然要點佢嘅狀元九鼎湯,相信對於呢一個signature我唔需要點多介紹。
另外特別一提,忘記了太子分店有冇醃蘿蔔,但係呢度同劉森記一樣有好大樽醃蘿蔔食。
另外新分店有呢個四川涼皮,辣辣地都幾好食,不過我覺得可能四川冷麵應該更出色,見隔離枱叫左碟冷麵,非常大啲,而且水準好似好高,留待下次有機會再吃吧。


簡單兩個人嘅下午茶$200到,飽到嘔,都幾滿足。不過同朋友講嘅一樣,最深刻的必然是西環分店限定嘅壽喜燒餃。


餃掂手工餃子雲吞專門店 西環士美非路12號文光閣地下C號舖

Vivienne Westwood Café: 當皇太后遇上新豬肉

一直也想試呢間cafe,對Vivienne Westwood大概也是一個中學嘅童年回憶,雖然而家唔會特別追呢個品牌,但係都會有一種親切感。


前排都好多人post過呢度Tea set,可惜我唔係女士,不是afternoon tea嘅材料,最後來這𥚃食個簡單晚飯吧。


今晚Green Monday ,兩個人嘅簡單晚餐,主力係去食新豬肉嘅新餐單,呢期新豬肉經麥當勞宣傳後做到咁Hit,唔少新餐廳都乘機推出新野。


貴為一間高貴嘅Cafe,佢嘅包裝都幾靚,處處都睇到Vivienne Westwood縱影,而且佢嘅餐具都真係好靚,老實講,好自然你會想買番啲返屋企用。
點了一杯rose latte,水準唔錯令我諗起全盛時期嘅habitu。
我飲嘅梳打,都不錯,特別係近來嘅天氣,彷彿冬天飲雪水,我想起了永不開封的汽水嘅鍾無艷。
Vegetarian Spaghetti Bolognese,個樣非常對辦,你絕對感受到個鑊氣,夠熱得來意粉又夠彈牙,最重要呢個肉醬係新豬肉,食完完全唔會有內疚感。
當然好事之徒,又會話其實新豬肉都係唔知係乜。
係呢個年代,好多食物都係加工,又點限於呢一個品牌。


叫英式全餐都幾適合我,因為完全唔使諗,Vegetarian English Breakfast,樣樣齊,最重要係嗰條由新豬肉做嘅香腸,其他如蕃茄,丹麥多士,等等食物質素都不錯,絕不像外間早餐一樣非常求其。

兩個品牌加起來,皇太后遇上新豬肉,化學作用不錯,至少不是千篇一律適合女性的afternoon tea的餐廳。
愛素食的來試這餐單也不錯。


Vivienne Westwood Café 銅鑼灣百德新街27-47號Fashion Walk 1樓F-8號舖

祥香茶餐廳: 沙爹牛與奶茶

F先生知道我放假,第一日假期已經叫我一齊出嚟食Tea。
由於同日係西環有嘢做,於是選餐廳嘅責任放咗喺佢手上,大哥話食乜就乜,我當然跟隊。


祥香茶餐廳,穩陣到不得了嘅選擇,兩個男人假期傾吓計茶餐廳,當然係不二之選。


睇返iPhone嘅紀錄,原來上次食呢間野,已經係六年前嘅事,同樣地方,已經人面全非,還記得上次過嚟食,印象一般。


碰巧呢排有個叫做香港沙爹牛麵關注組,竟然冇特別講開呢間餐廳,本來冇諗過寫篇野,就分享吓呢碗沙爹牛吧。


如果<美男子與香煙>係你了解太宰治的機會,大約我們這些凡人了解呢首歌嘅MV了解到女主角雪嫣的人生,美男子和香煙那種沉迷,越戒越愛越愛越戒彷彿終身逃債, 原來有樣嘢上癮,就會不斷咁追求,點戒都唔會戒到。


就如我哋去茶餐廳,就算知道自己食過十萬七千次六百次,你去到都係會毫不猶豫地叫沙嗲牛肉麵加奶茶。


來到祥香 ,F先生話可以揀豬扒飯,最後我都係食返令自己開心嘅comfort food,二人同樣吃沙爹牛,和雪嫣一樣,繼續沉迷美男子。


呢度嘅沙嗲牛麵好得意,放上枱嗰一刻,你以為自己叫咗剩麵,原來沙嗲牛肉係底。


翻開個底,呢度嘅沙嗲牛肉非常深色,好濃好杰,同舊式茶餐廳一樣湯唔多,你絕對唔會溝淡咗個味,嚴格上來講你可以話係食緊一個沙嗲牛肉撈麵。

當然主角係大光麵,喺香港茶餐廳食嘢長大嘅人,應該會鍾意大光麵多啲,其實出前一丁係富裕嘅80後選擇,代表你有錢有生活質素,可以加多幾蚊食一個貴啲嘅早餐。
今日成個沙嗲牛肉麵嘅質素都比六年前好好多,感覺更深刻。
奶茶還可,不過杯唔夠熱,感覺扣咗啲分。
個餐配嘅火腿同煎蛋加餐包亦都唔係太多特色。
$38一個午餐,喺西環算係一個唔錯嘅佛心價,當而家所有嘅連鎖餐廳隨便一個特餐都差唔多$50嘅時候,基本上我唔明點解唔選擇去呢啲有香港特色嘅茶餐廳。 然後我見到係嗰個所謂嘅關注組有人推介敏華冰廳嘅時候,我就知道原來女人對美男子嘅定義同男人對沙嗲牛嘅定義各有不同。


或許我們都是雪嫣,追求的都是自己執着嘅沉迷,正等於社會都有顏色之分,大家嘅底線都可以好唔同。


基本上呢碗沙爹牛肉麵,在我嘅底線,還不錯吧。

祥香茶餐廳 更改 西環堅尼地城卑路乍街107號

2020年11月26日星期四

He she eat: 年青晚飯

疫情繼續爆發,跳舞跳到就嚟又冇飯食,呢舖真係夏日Fiesta,舉手揮霍情緒由左至右,忘情狂歡呼追擊主音結他,大家都多得佢地唔少。 唔同嘅餐廳都繼續做緊優惠,又或者救亡,因為唔知幾時又會停晚市,畢竟跳完舞最後都要食飯。
前牌朋友介紹我食He she eat,佢話呢度做緊買一送一非常抵食,有興趣就去試吓。
聽過呢個大名無數咁多次,都未去過,一直都係年青人打卡嘅Cafe,朋友話我知,前排經過旺角就去下。 因為呢度有幾個晚餐做緊買一送一,只要你叫一個餐,就可以喺Menu裏邊揀其他價錢平嘅選擇,有飯、有沙律、有漢堡包,有飯,有豬扒,有意粉,兩個人各自揀自己嘅喜好。
我選了香煎加拿大帶子拼鮮蝦半蒜香煙肉扁意粉配黑蟹子紅花汁,意粉質素不錯,勁吸汁,又唔會太肥油膩,帶子煎得好soft好軟熟,蝦都新鮮大隻,幾好。
另外點了匈牙利燉牛筋肉配珍珠飯,呢個組合有啲少見,特別係個珍珠飯,個匈牙利汁撈飯真係幾精彩,牛筋肉有點像羊肉嘅味道,也不錯。
仲可以俾錢單加點心,我們叫了炸單骨雞翼同香煎芝士玉子,特別鍾意單骨雞翼,加上honey mustard ,好正。
套餐點了兩杯特式飲品,每人都係百幾蚊,真係好抵食。
呢間餐廳都幾適合打卡,見到佢呢度有日式梳乎厘班戟推薦,就點一個,有原味,士多啤梨,抹茶,同朱古力味任你選,由於可以加橙酒,所以我都係要朱古力味。
打卡滿分,食落去雖然唔係日本個隻梳乎厘班戟嘅世界級享受,但以呢個價錢,我冇乜投訴。
整體來講,食物水準不錯,價錢抵,怪不得咁多年青人支持。
唯一唔好嘅係,我覺得自己太老,拉高左呢度消費顧客嘅平均年齡。
HeSheEat (白布街) 旺角白布街22號藝興大廈地下4號舖 如果你想個人青春一點,感受多啲年青人嘅氣息,你黎一定冇錯。

2020年11月23日星期一

如:繼續大閘蟹

之前分享過帝京軒嘅蟹宴,今日轉條地鐵線嚟到荃灣嘅如心酒店,因為之前見朋友食過後推薦呢度嘅蟹宴,於是捉緊尾巴,食多餐大閘蟹。
雖然地方有點遠,但都值得過嚟,因為除咗大閘蟹,還有鵝掌,仲有冬天進補最適合嘅蛇羹,又有合時嘅糯米飯。
而呢個咁多元化嘅陣容,價錢都只係每位498,我又覺得真係超級化算,你自己喺屋企訂一隻蟹都要成百蚊,喺呢度仲要有其他正嘢食,我諗唔到有咩理由唔試吓。
先上場嘅菊花五蛇羹,非常足料又夠大碗,喺酒店食蛇羹同係出邊食蛇羹件事真係唔同好多,整體得體好多。
紫蘇葉大閘蟹,四两半,係細細隻,但都算幾好,啲蟹膏都非常高,同上次帝京質素差唔多。
朋友話覺得幾好食,於是我哋追加多咗一隻六两,當然都好正,蟹膏更澎湃,由於大隻好多,蟹腳都大隻好多,又粗又有味。
然後有BB柚皮扣北菇鵝掌,個汁扣得幾好,柚皮幾鮮甜,鵝掌入口個刻即刻骨肉分離,如果唔係有生炒糯米飯在後,唔叫個白飯都對唔住自己。
蛇湯灼時蔬,呢個的確幾特別,唔知係啲菜本身都係好甜定嘅關係定因為有蛇湯嘅影響,特別好食。
生炒糯米飯絕對非常出色,粒粒都有彈性,和灣仔最出名嗰間生炒糯米飯絕對有得揮。
朋友有做功課,加多一份蟹粉賽螃蟹同蟹粉小籠包,完美左成件事,前者啲蟹粉同賽螃蟹融為一體,後者小巧但內裡非常豐滿。
返屋企的確有點遙遠,最後都係選擇搭的士,當晚同吃飯的T先生,佢住樂富,之後亡命飛Van番屋企都話好快。 總結來講,雖然有啲遠,都值得嚟食。
如 荃灣楊屋道8號如心海景酒店暨會議中心7樓