2020年12月22日星期二

嚐捌:鄰家的驚喜

上次吃越南野嘅時候,先至發現到呢間姊妹店,同上次So Tam一樣,喺銅鑼灣有一個非常唔錯嘅環境,配合幾優質嘅價錢,基本上沒有不試的理由。
餐廳主力食粵菜,加上又有點心又有好多精選套餐下午茶等,又做緊折,都幾受人歡迎。
餐廳格局同 So tam基本上一樣好cozy,有種好舒適嘅休閒感覺,好似星期日去咗咖啡店坐一樣。
當日試咗幾個前菜,有梅酒秋葵、蔥油蟲草,和風山藥,三個前菜都好開胃,尤其是山藥加上胡麻醬,感覺特別。
加入左梅酒嘅秋葵原來係有咁嘅化學作用,自己喺屋企都可以試吓整。


蔥油蟲草就更加口感豐富,有蟲草有木耳又有甘筍同萵筍絲,加上蔥油之後,更迷人。


朋友喜歡吃炸物,於是點了香芒炸蠔,椒鹽魷魚酥同香茅墨魚,我個人較喜歡香茅墨魚,送啤酒一流。

聽人講呢度嘅點心都幾好食,當中最出色一定係呢個芝士燒賣,香港燒賣關注組嘅成員,絕對值得嚟探訪一下。
另外有色蝦餃個樣真係好精美,而且入面充滿着滿滿嘅蝦肉,好食。
素菜餃相對賣相同口感相對冇咁突出,不過都可以一吃。
點了非常之有新意嘅饅頭肝醬,呢個完全係好似西餐咁嘅配搭,豬肝醬好好味,當然非常邪惡,怕肥嘅人可能未必夠膽食太多。
冬天一定要食羊腩煲,呢度嘅羊腩質素都很高,而且個湯又完全唔鹹,加上其他冬菇,筍都非常入味,每件羊腩都炆非常之軟綿綿,又唔會太肥,絕對推介。
相對花雕醉雞雲吞煲份量細少少,但係咁凍嘅冷天氣整碗湯食粒雲吞,都幾滿足。
完全冇諗過食一間餐廳會意外咁發現另一間餐廳嘅驚喜,呢間嚐捌開得出奇地低調,希望捱過疫情,之後一定會更上一層樓。 嚐•捌


銅鑼灣羅素街8號英皇鐘錶珠寶中心2樓

2020年12月21日星期一

So Tam: 胡志明的越南火鍋

朋友K先生係越南通,今年冇得去旅行,呢位朋友則不斷咁話我知胡志明市同蜆港究竟有幾好玩。
K先生係愛酒之人,佢亦都分享左唔少越南飲酒嘅經驗,特別其中一次,佢話係酒吧飲酒的時候,外賣越南火鍋去酒吧食嘅經典事件。 東南亞嘅火鍋,我淨係記得喺清萊試過,反而,我真係未試過食越南火鍋,香港越南菜多的是,可惜卻好似從來未見過有火鍋,大概香港人最叻都係淨係食越南牛肉河。 於是,從我得知銅鑼灣開咗一間新嘅越南菜SO tam,仲提供很少見的越南火鍋,就已經bookmark 左,於是約幾個朋友一齊去食。
位於Times Square附近,地點超級方便。當晚人數夠多先食得多野,不過疫情關係都分左兩枱坐。
坐低先要杯越南滴漏咖啡,提下神。
越南菜嘅前菜點少得牙車快,香港其實唔係好流行食呢個以雞絲、海蜇同生菜絲所做嘅開胃前菜,我覺得幾特別,至少為今餐開下個胃。
不過我自己較鍾意青木瓜鮮蝦沙律,淨係食爽口又新鮮嘅蝦肉加甜美嘅青木瓜已經值回票價。
細細個最鍾意食嘅係越南粉包,到我咁大個都依然咁鍾意食呢樣小吃,呢度叫做手拉粉卷,感覺夠好夠美味,熱辣辣食感覺特別好。
呢度嘅越南炸春卷真係做得好吸引,剩係吃表面個脆皮已經夠正,一個字,得。
通常食印尼嘢先至會食串燒,呢度竟然都提供串燒拼盤,豬肉,雞肉同牛柳各點了兩串,我最鍾意食嘅必定係雞肉。


特別係佢嘅醬汁唔可以錯過,市場上少有用魚露為主角的醬汁,增添了不少越南風味。

牛油椒鹽軟殼蟹,食完滿口牛油香,蟹肉又大件,絕對係必點嘅菜式之一。
豬頸肉法包,令我想起渡船角。
講開牛油,佢嘅蒜蓉牛油雞翼又係好正,一個人一隻絕對唔夠喉。
食咗咁多煎炸野就好想試吓佢嘅西貢啤酒,呢度仲要提供兩個版本,我選擇左低卡路里版,飲都飲得健康啲。
咖喱雜菜煲配麵包,讓你清清腸胃,個咖哩都不錯,不算太辣夠香口。
越式豪華火鍋,選咗蟹湯,有菜有魚有魷魚有牛肉,仲可以加唔同嘅配料,個蟹湯非常之鮮甜,而且咁大個火鍋都只係$248,如果可以加越式河粉應該更加完美。
呢個非常傳統嘅越式鍋底,令我諗起如果身處喺胡志明嘅酒吧,究竟可以點樣係酒吧外賣火鍋呢?係唔係叫緊六個六嘅時候,突然間就夾舊肥牛黎食?
我想只有K先生才知道了。
到底幾時先有得飛越南?我想不要諗了,不如嚟呢度食火鍋更加實際。


SO TAM


銅鑼灣羅素街8號英皇鐘錶珠寶中心2樓

2020年12月18日星期五

LAGOM KAFFE:台北某個地方

一個人me time,最後找間好坐的cafe。
大家都聽過台北來的桔梗,位於油麻地的香港店當然非常出名,係黃店嘅表表者,估唔到咁快,又有第二間分店開張。
Lagom,一個咁特別嘅英文,原來來源於瑞典語,意思為「不多不少,剛剛好」,呢個字代表左瑞典人對生活態度,而剛巧放假,一個人靜靜來到呢到吃個lunch,就感受到那舒適的剛剛好嘅感覺。
坦言,油麻地的桔梗同樣非常大,但可能地區關係,而且又多人,你沒辦法感受到像台灣一樣文藝嘅氣息,相反,Lagom呢度光線充足,而且位於相對不多人嘅牛頭角,正正就好似去咗台北大安區一樣。
桔梗上次嘅嘢食的確唔係太大驚喜,因此我並沒有特別抱好大期望,人人都推介呢度嘅三文治同燉牛肉意粉,但唔知點解好似燉牛肉意粉唔係好夾呢間餐廳,我卻偏偏選咗松露干貝意粉。
上枱嗰刻,賣相非常之精美,三隻帶子都煎得非常之靚。而且一上枱就聞到個香氣。
唔會太濃烈嘅白汁加上大量嘅黑椒同蘑菇襯托下,個意粉比桔梗出色得多 ,不消一會便吃完。
再加杯dirty ,可惜當日下午,未有酒提供,呢度亦有好多以咖啡為主角嘅Cocktail,下次一定要試下。
意猶未盡加多一個甜品,點了焦糖蘋果,伯爵茶和檸檬窩夫,即叫即整嘅關係都等咗一段時間,不過出嚟嘅製成品會叫你忘記等候左咁耐嘅時間。
窩夫非常之脆,三種味道夾埋非常清新,我一個人都可以食晒成份窩夫,平時食甜品我一定冇咁勇猛,你可以想像呢度嘅甜品真係唔錯。
坐低上下網,睇吓書,咁就一個下晝,的確坐喺呢度令我自己想起身在在台北某個地方。
想起本身今年預算在台北過除夕,才發覺自己原來係牛頭角,灰左。
才記要拿起電話,係時候要取消張機票了。
Lagom Kaffe


牛頭角觀塘道348號國際貿易中心1樓101號舖

川流:二人火鍋

好耐之前已經聽過川流有得打邊爐,可惜就係未試過,近日夠凍,食呢度嘅新火鍋Menu是常識吧。


知道呢度嘅新Menu,全因C小姐極力推介,呢度新推出嘅貢布胡椒牛腩鍋。

如果你有睇過我去川流嘅食評就知,對於佢嘅貢布胡辣羹,我係愛不惜手,於是知道用呢一個主題去做火鍋嘅時候,非吃不可。


喺而家嘅情況底下,當然最好兩個人吃火鍋,唔好嘅當然係冇得食咁多嘢。

原來呢度嘅四川火鍋,除咗牛腩之外,仲有好幾個選擇,例如酸菜桂魚鍋、山城毛血旺、沙薑雞鍋、紅燒魚頭鍋、三十三香辣雞鍋 ,選擇之多實在令人頭痕,隻隻都好似好好食,不過最後我都係選擇牛腩,無辦法,貢布胡椒太吸引。


前菜還是那樣咁搶鏡。

反而配料嘅選擇就唔算太多,開頭我覺得係缺點,但係當個火鍋,嚟咗之後我就知道完全唔係一個問題。
你見到呢個鍋底之後,佢再送上一大碟牛腩,牛腩係好似平時你出去食牛雜粉麵店你叫剩牛腩嘅三碗份量 ,我同老婆見到個份量都真係嚇親,本身仲想叫一碟本地牛頸脊,即刻收返。
先試湯底,貢布胡椒香氣好重,當然冇平時飲開嘅貢布胡辣羹咁辣,飲一口湯,加上甜美嘅大蔥同冬菇,好正,淨係飲呢個湯都飲咗三碗。
將煮熟咗個牛腩放入去個湯度,吸進了個湯嘅甜味,好正,呢度嘅牛,不用多說,騸牯牛又點會唔好食,只不過份量真係太多,兩個人真係好難食得晒。
最正係呢度嘅混醬,唔同嘅辣椒油,再加上仲有得加貢布胡椒,好似我咁每一碗湯都加多少少,特別爽,驅寒一流。
當然要叫啲菜,川流食花生芽係不二之選。
老婆鍾意食魚,叫咗一碟桂魚片,又係份量夠,新鮮又厚身,超好食,加上胡椒湯又係另一番滋味。
最後點可以不加一個寬粉做尾,食完呢個真係飽到上心口。
差點唔記得,呢度一定要叫最正嘅甜品。


藤椒蘭香子意式雪糕,怪味大粬朱古力意式雪糕,同樣咁正,兩個都好難分高下,隨自己口味吧。

最可惜係人手唔夠,我意思係食嘢嘅人手,無論鍋底同配料都比想像中出色,下次如果夠多人食就可以試到唔同鍋底同配料,不過都唔知幾時先至有咁嘅機會。


當然如果你睇到呢度都好想試吓, 二人鍋加上少少配料都可以係一餐唔錯嘅選擇。

川流


灣仔太和街28號灣仔薈賢居地舖