2021年3月30日星期二

玉庭:咖啡樽的汽水

係我寫個千幾二千篇嘅食評當中,記得用上呢個題材,應該唔係第一次。
說穿了咖啡樽裏的汽水就是形容喺西餐廳食中餐,日本居酒屋食中式點心,你去嘅餐廳唔一定代表你食緊嗰樣嘢。
香港多fusion菜,但係就好少餐廳身兼幾職,小店可能都會多,但酒店餐廳真係好少見。
睇得多我寫野嘅讀者可能都會有見過我寫玉庭,位於沙田嘅帝都酒店餐廳,本身食潮州菜中菜為主,我聽到話呢度有涮涮鍋,直頭急不及待要黎試,實在太有趣啦。
今次佢呢個promote全部用上自家日本菜櫻田嘅來貨,因此,絕對不會令你失望。
前菜先上精緻刺身拼盤,當然不能錯,用上櫻田靚刺身,正到不得了,款式當然唔會話好似乜嘢高級刺身船咁多,但以呢個價錢,有蝦、帶子、赤貝、蠔,全部精彩高質。
涮涮鍋餐有兩種選擇,一個食牛一個食海鮮,我哋多人,剛剛好叫兩個set分甘同味。
全牛拼盤可以話係所有牛魔王天堂,五種牛肉佐賀A5和牛,九洲薩摩A5和牛,澳洲M7 和牛肉眼及頂級美國安格斯牛小排,全部好似候選佳麗咁係樓梯度俾你任點任選。
個人最喜歡嘅當然係最油份高嘅佐賀牛和口感濃烈的薩摩A5和牛,牛肉眼及頂級美國安格斯牛小排則以質感取勝,當然看你係什麼派別嘅朋友,相對我都係較為鍾意油份強嘅牛肉較得我歡心。
至於海鮮方面,氣勢冇咁凌厲,但係樣樣海鮮都非常高質,波士頓龍蝦有2隻、南非孔雀鮑魚有4隻、大蜆8隻和北海道帶子8件。
野菜拼盤一客才是主菜,由娃娃菜、小棠菜、番茄、青菊、南瓜、蕃薯、小青椒、秋葵、京葱、大根、冬菇、杏鮑菇、金針菇同稻庭烏冬。
你可以話好似喺Aeon同Donki一樣行咗一轉超級市場,啲菜嘅質素全部都係靚料,真係好似行咗一轉日本超市咁,我同我老婆基本上淨係食呢一個拼盤都已經非常之滿足,講真喺超級市場買到呢個陣容一啲都唔平,又唔使買又唔使煩,幾正。
先講咗火鍋料先講湯底,可能你會覺得奇怪。但寶物沉歸底,湯嘅選擇多到一個點,壽喜燒湯到利尻昆布湯到辣味噌豚骨湯,又或者其他特別的野菌舞茸湯,柚子清酒大蜆湯,木魚鮮人參雞湯,鯛魚濃湯,蕃茄鮮蝦濃湯,北海道3.6牛乳蟹湯,多到咁真係眼花撩亂。
最後我哋要咗牛乳蟹湯同鮮蝦濃湯,這兩個最配牛肉同海鮮。
先飲牛乳湯,又甜又滑,真係好似飲奶咁,另外鮮蝦濃湯就滿佈蕃茄味,如果有機會聽聞清酒大蜆湯都係大推,記得呢度嘅湯底都係重點。
另外推薦呢度配搭嘅清酒久美の浦-純米吟釀,店員話係哈密瓜般的濃濃果香,送海鮮特別適合,冇辦法抗拒唔叫一支。


以今晚嘅陣容你計,水準真係好高,當然價錢可能有少少貴咗,但係配合地點同埋員工超級殷勤嘅服務,我覺得,值得一試。


玉庭


沙田白鶴汀街8號帝都酒店1-2樓 港鐵沙田站 A3 出口

2021年3月29日星期一

尚上下夏:你是芫荽黨嗎?

疫情依然反反覆覆,外出食飯嘅意欲始終都受到影響。
特別係打邊爐,有時都係prefer喺屋企簡簡單單,街市買少少嘢,就可以整個火鍋,唔使出去同人迫,又唔使趕頭趕命10點前要返屋企。


之前曾經有一排,都會去唔同嘅火鍋店睇有乜特別Offer,例如寬巷子曾經有外賣六折,鼎王又有佢自已嘅特價set等等,基本上,睇你有興趣食邊一間。

始終個別火鍋店有自己嘅湯底同埋邊爐火鍋料,曾經有一排迷上外帶台式邊爐火鍋返屋企,呢排百業蕭條,當然要支持本地創作。


幾個朋友都推介過呢間尚上夏下養生雞煲,屋企簡單四個人,單點了半隻雞煲,加一啲特色火鍋料,咁就一餐。


同之前另外一間港式火鍋店一樣,包裝幾精美,而且都幾乾淨,以呢個價錢來講一啲都唔貴。

雞煲係主菜,攞咗返屋企,煮熱少少嚟食,味道非常對辦,唔算太辣,雞份量多而且都唔算細件。食完先加湯底打邊爐。
湯底有幾個選擇如新春開運奶茜湯,蕃茄二重奏健康滿分湯同開心麻辣辣辣激動蕃茄湯,個個名都好正,開運奶茜當然最精彩,就選呢個,點正法,你明的。
奶茜湯同辣雞煲,夾到不得了,一溝左之後,變左冬蔭公咁嘅味,香港芫荽黨朋友,一定要留名。呢個真心推。
芫荽餐肉餃係我覺得最特別,芫荽味當然強但係一粒粒嘅餐肉令到呢一個餃子口感係前所未有咁強,呢個配搭好有化學作用。
咖啡墨魚丸,又係奇作之一,愛咖啡嘅你,當你食食吓墨魚丸,突然間有一個濃厚嘅expresso喺口中徘徊,你感覺如何。
甜心墨魚丸,說穿了就係有焦糖喺中間做心,相對我喜歡咖啡墨魚丸多一點,呢個口味比較重,愛甜人士應該會瘋狂愛上。
媽媽不吃牛,出奇地,黑豚肉,竟然又大件夾好食。
蝦滑夠爽,相信無人說不好,只不過,相對細件左少少,不過蝦滑上灑滿蟹籽,總算加添返少少分數。
除了火鍋料以外,試吓小食,點了滷水鴨腎,夠入味,幾好食,估唔到一間火鍋店做滷水都做得算出色 。
鮮淮山和雲耳,相對冇乜技巧,不過都幾新鮮。
最後推薦的芫荽煉奶煎蛋卷,蛋和煉奶芫荽原來可以有個咁有趣嘅combination ,食埋呢個點心,我絕對相信呢度嘅負責人應該都係芫荽黨嘅朋友。
我唔夠膽百分百肯定,但至少芫荽黨嘅黨員來到這裏火鍋一定滿載而歸。


尚上下夏 - 養生雞煲火鍋


尖沙咀山林道23號地下

PlumCot: 第二最愛

記得吃過最好的Canelé係澳門的Ritz Carlton,那個味道難以忘懷。
聽過呢間店嘅pastry 都做得非常不錯,上星期朝早剛巧有時間,晨早就入大坑為嘅就係呢度嘅Canelé。
下午通常好多嘢都會沽清,幸好今日乜都有。
最推介當然係Canelé,唔係日日有得賣。外層嘅焦糖香,入面嘅軟熟,如果外帶回家下,烤一下外層,個外層表面脆脆地仲正。
另外招牌的Plumcot Brioche,我個人就麻麻,靚就真係好靚,食落去我覺得平時熱辣辣嘅菠蘿包感覺會好少少。
至於madeleine同Canelé一樣,做得非常出色,earl grey嘅幽香,令人心曠神怡,上星期食完之後都想再黎心思思想買番件再食多一次。
不過最正都係Canelé,是我吃過澳門Ritz Carlton的最美味之外,第二最好了。
Plumcot 大坑新村街10A號地舖

龍苑: staycation 餐廳首選

有睇過下staycation package,首先一定要選擇零房價加lounge優惠。


holiday Inn永遠係首選,價錢勁超值,地點又方便,以酒店餐廳來說,質素不差,價錢又唔貴。


前排幫家人訂左個staycation package ,順便我join佢地食左個飯,稍後可以寫多篇再分享個Offer係大家。

當晚有人帶咗紅酒,話要blind tasting ,佢話夾北京片皮鴨最好。
以一個不錯的價錢,吃到皮脆肉嫩的片皮鴨,不用兩吃已經覺得滿足。
最重要係喺呢個咁舒服嘅環境,同呢度附近另外一間好出名片皮鴨嘅店舖,價錢其實都唔係差好遠,咁喺呢度食就覺得物超所值。
紅燒花菇花膠鵝掌真係好得,似化骨綿掌一咬即溶,花膠大大塊,毫不留情,毫不手軟,大大力打落塊面度應該都會痛。
基本上係龍苑王牌產品,枝竹火腩紅炆龍躉翅煲,估唔到同紅酒都可以好夾,記得平時喺佐敦金山食龍躉翅,價錢都唔平,但呢到又係保持價廉物美,最正係嗰啲枝竹同火腩,入晒味,嗰晚出去講個電話,枝竹已經售罄。
辣子蝦球係我覺得最出色同有驚喜,愛辣嘅人一定會鍾意,你以為辣度係普通貨色,個辣味卻做得非常精準,蝦又大又爽牙,係你味蕾停留咗好耐,送飯一流。
四個人食飯的關係,始終唔可以叫太多餸,失去左中菜嘅意義,記得平時喺度食一圍,八個人以上食飯,食多好多野。
冇辦法,睇嚟呢個日子都會持續多一陣。


最美當然不能不點這裏的甜品,豆腐花係我每次鐘情的,朋友就反而愛蛋散,每次尾聲都係以呢兩個為終點。

冇辦法,呢度就係咁穩定,你一定不會失望,我唔夠膽學家燕姐話勁好食,但俾嘅錢,唔會你覺得唔值。


龍苑中菜廳


尖沙咀彌敦道50號金域假日酒店低層1樓