2021年4月27日星期二

京都勝牛 :老了

是日放假,就搵啲想食而周末有好多人排嘅地方試吓。
黎到銅鑼灣嘅京都勝牛,點了兩個餐,霙花翼板牛排套餐同東京風里脊豬排鍋膳套餐。
同其他吉列店一樣,呢度沙律、飯、麵豉湯任點任加。
翼板牛煎過後不錯,點芥醬油同山椒塩最突出。
最開心嘅係呢度有個爐俾你整件牛扒,又有得食又有得玩。
而東京風里脊襯滑蛋烏冬就真係一流。
日本仔整蛋真係一流,個烏冬撈蛋好食到不得了,豬扒都彷彿變成配菜。
最重要係價錢平,食得嘅大學生落嚟食九碗飯都係百零蚊,乜本都回哂,可惜我遲咗十幾年黎。
另外呢度嘅花茶都幾唔錯,有興趣都值得飲下。
京都勝牛 銅鑼灣謝斐道535號Tower 535地庫B01號舖 望住隔離三個男仔大吃一番,我只能慨嘆,老了。

雲壽司:唯有約定和大哥喝醉

有位大哥,每個星期六日都要食廚師發板,唔貴唔食,最開心嘅就係同富二代一齊去貴價壽司店打卡打到下世紀。
佢哋最鍾意就係book城中最難book嘅日本餐廳,然後點解咁難book?因為富二代個個禮拜都有訂位,嗰度直情係佢嘅飯堂,唔講唔知以為係佢屋企個廚房。
當然,$3000一餐午餐不是我們這些凡夫俗子可以做到嘅事情,我聽到都覺得荷包痛,當然亦都有人認為可以同佢哋食到飯就覺得自己都係變咗上流社會,然後係10萬個為什麼嘅哲學問題。
小時候媽媽教你做人都係要同乖學生埋堆,因此你近有錢人都變有錢人呢個頓時變成大道理。
最後某個星期天突然間想食壽司, 冇book到城中名店又想平平哋食餐壽司,又唔想去壽司郎排隊排到天黑,幸好我們還有立鮨店同雲壽司。
$380一個午餐 ,有10件壽司,有一件海膽,有一件手卷,再有一碗麵豉湯。
靚嘅壽司有拖羅、有海膽、有剝皮魚、有赤背,應有盡有,整體水準都唔錯,唔使訂位唔使排隊,話想食就食,當然我同你話好好食好食過四季酒店嘅saito,我擺明就係玩嘢啦。
只係用一個平價錢換來一刻嘅快樂,這樣嘅生活多好,幸好我們還有這些平易近人的壽司店,證明我們還有吃壽司嘅權力,就算我不是含住金鎖匙出世嘅富二代。
可能呢篇唔係一篇食評,係討論一篇哲學、經濟同富二代嘅新詩。呢一刻我以為自己醉了,唯有約定和大哥飲醉。


雲壽司 (聯成商業中心) 銅鑼灣謝斐道506-508號聯成商業中心地下B號舖

鼎家喜筷:年輕的鼎爺

如果你同大部分人一樣。未必捨得食鼎爺的私房菜,而家位於荃灣海之戀嘅鼎家喜筷就可以一戰。
可以食到鼎家出品,而且係年輕嘅輔線,啱晒一班相對唔會食私房菜$1000位起錶嘅年輕人,同我三年前食嘅私房菜相比,呢度輕鬆casual得多。
剛巧去荃灣行街,聽過朋友I小姐介紹呢度嘅火焰原隻燒鵝髀,非常有興趣,晚餐又唔使點樣排隊,仲使考慮?
最喜歡係呢度嘅裝修理同平時嘅中餐廳唔同,好多漫畫化嘅裝修同裝飾,食燒味飯仲要有沙律餸,都幾得人鍾意。
本身諗住食呢個火焰燒鵝髀,但其他餐牌都好吸引,最終放棄。
先點了燒味夾饃雙拼,一個係叉燒做主角,一個係燒鵝做主角,吃到嘅係大漠嘅風情 ,估唔到咁有風味。
沒有叫火焰燒鵝,反而食嘅係原隻柑橘燒鵝髀飯,全因嘅就係佢嘅柑橘醬,雖然冇火焰咁搶鏡 ,但係味道絕對一流取勝,市面亦都少見,燒鵝皮充滿着金橘嘅香味。
加點左涼拌麻辣蒜香手撕貴妃雞撈丁做主食,呢個絕對係夏天首選,辣辣地,又有麻辣香,最重要個撈丁,同貴妃雞一樣搶鏡,大家鬥彈牙。
呢度嘅飲品都唔錯,叫了芝士鐵觀音,加上一杯花茶,你完全冇諗過做燒味為主嘅茶餐廳,可以有呢啲咁靚嘅飲品。
最尾推介嘅係呢個北海道5.0牛奶雪糕配鮮果窩夫,呢個絕對係驚喜所在,相比全盛時期嘅茶木做得更加好,北海道牛奶雪糕固然搶鏡,但係窩夫確實喺冇期望之下,好吃得深深印在腦海中。
整體水準都真係幾出色,咁樣有飲品又主食又有甜品都係$200一位,仲要係位於一啲都唔平嘅海之戀商場,嗰度餐廳全部都唔係低檔次 ,相對比較下以呢個水準絕對值得幫襯。
當然如果你係喺荃灣蒲開就完全唔使考慮都可以試,但如果特登要去荃灣食,就要考慮加多啲景點了。
鼎家喜筷 荃灣大河道100號海之戀商場3樓3012號舖

2021年4月19日星期一

段純貞:獨門二十三香

段純貞,幾個月前已經聽過,當刻登陸香港,記得喺荃灣分店一位難求,我冇諗過連牛肉麵都要排隊。
我以為日本拉麵魚生飯排隊喺常識,想不到台灣嘅牛肉麵都係風潮。無辦法,香港人,想旅行想太久了。
以二十三種不同中藥造嘅湯底,好令人有興趣,同類朋友我想起林東芳,更叫人想念台灣。
聽人講銅鑼灣分店相對少人,是日放假,唔使排隊,就最好黎食,三點正好直入。
原味牛肉麵,睇個樣都幾好,最傳統嘅牛肉麵樣子,台灣嘅感覺。
用上幼麵最好,湯底濃度一流,蒜,薑,豆瓣同蔥嘅味道共冶一爐,好有台北的街頭感覺。
牛肉用上特別嘅牛腱心肉,勁大條,味道濃厚,基本上吃呢件牛腱心肉,都值得來一程。
麻辣嫩五花牛肉麵,上枱嗅到那個麻辣香已經夠了。選擇了手工粗麵,個人來說,兩個都不相伯仲,不過粗麵更掛湯。
點多一個鹽酥雞,水準正常,可能牛肉麵太搶鏡,呢個炸雞相對冇乜特別。
飲品方面,同老婆一人試一杯,胚牙珍珠奶茶同荔枝乳酸飲料各有所好,好處嘅係兩杯飲品都唔特別甜。
如果唔使排隊,可以再試多次,獨門二十三香,係幾特別。
段純貞牛肉麵 銅鑼灣謝斐道535號Tower 535地庫B01號舖

2021年4月14日星期三

The Food Gallery: 超級海鮮聯盟

冇食過朗廷酒店自助晚餐已經一段時間,聽講佢個自助餐重新包裝過,朋友講開就立刻起身去試下。 剛巧朗廷酒店有推出一個staycation系列包呢個超級海鮮聯盟自助餐,就不如介紹下呢個buffet。 呢度嘅自助餐一路以海鮮為主角,種類多而且都係貴價嘢,有波士頓龍蝦、新西蘭生蠔、大蝦、小龍蝦、青口、翡翠螺和加拿大蟹腳,基本上如果你喜歡海鮮,淨係食海鮮都絕對可以回本,而且海鮮質素同之前有過之而無不及。
熟食方面當然有貴價嘅香煎鵝肝,肉眼扒、北京片皮鴨、紅燒牛臉頰,仲有蛋黃醬焗三文魚。
刺身方面有三文魚、油甘魚、吞拿魚、八爪魚、北寄貝、鯛魚和帶子等等,陣容都算幾齊全。
最推介嘅係每晚有兩輪即叫即燒嘅中式脆皮乳豬,呢個乳豬真係燒得幾好食,不能錯過。
最重要係而家喺OpenRice有優惠券,75折到五月尾,我見場內嘅人一家大細全部都食得好高興,如果你想一家人開開心心食下自助餐,呢個絕對係超值之選。
如果你兩個人staycation,試下呢個package 都唔錯,聽講仲有房,自助晚餐,Food Gallery自助早餐同lounge assess,講多句呢度嘅貴賓lounge真係唔錯,成個package都係$1888起,有興趣就去KK day望吓。
The Food Gallery 尖沙咀北京道8號香港朗廷酒店大堂