2021年5月30日星期日

沖繩漁民食堂:電影中心飯堂

去百老滙電影中心睇戲前通常都會係附近食下飯,經過呢間沖繩漁民食堂,幾特別,放棄了隔離的牛肚河。
開頭以為呢度係食魚生丼飯,但原來呢度係主力食炸物。
兩個人,一人點了一個吉列炸物飯。
我點的吉列豬扒溫泉蛋飯,豬扒幾大塊,炸得幾好,同喺尖沙咀嘅吉列餐廳唔大分別,但呢度價錢平好多。
吉列炸蝦溫泉蛋飯原來更好食,撈埋隻蛋,同隻爽爽嘅炸蝦,成碟飯眨吓眼就食完。
日式餃子幾特別,有軟骨做主角,如果煎得脆一點,應該更迷人。
百老匯電影中心附近可以食嘢嘅地方唔多,呢間餐廳的確俾咗一個其他選擇,唔一定要食牛肚河。
沖繩漁民食堂 油麻地新填地街143-151號俊逸豪園地舖

Pier 1929:全城最強下午茶

還記得灣仔碼頭嗎?之前嘅築地山貴水產市場已經華麗轉身,變成左Pier 1929,開返幾日已經係城中熱店,六月訂枱已經全滿,到底有乜咁大來頭,不如一齊睇下。
係呢個陽光嘅普照週末,來到Pier 1929,無數嘅打卡位,女士應該可以玩足一日。淨係入口位置有唔同嘅異國風情位,又有參考倫敦嘅鮮花走廊Annaalbel’s Mayfair都夠你卡打到手軟,加上唔同嘅特色區域,女士們一定樂而忘返。
去過築地山貴都知道,穿過走廊之後,餐廳擁有270度維港無敵海景嘅大堂,淨係呢個大堂又係影相影到傻。
講番呢間餐廳有啲咩食,Pier 1929推出了花朝月夕下午茶,典型嘅三層架下午茶,包括左多種唔同嘅鹹點甜點,仲有welcome drink玫瑰汽酒,仲會有專人推住美食餐車為你無限添加六款鹹甜點,咁嘅陣容都只係兩位$598,怪不得六月已經全滿。
飲品方面,仲有可以加錢無限添飲俾你慢慢享受呢個環境,無酒精飲品有咖啡,茶,果汁,汽水,冇酒精雞尾酒,喜歡飲酒嘅朋友仲有好多種唔同嘅雞尾酒俾你任選,而且仲有多種香檳、紅酒、白酒,望住醉人嘅景色,一班朋友喺度享受一個下午或者晚上實在非常寫意。
食物方面,我自己個人最鍾意芝士和牛迷你漢堡同鮮蝦芒果迷你牛角包,可惜冇得添加,想再食就要黎多次。
其他六款鹹甜點例如自家烘焙英式提子鬆餅、士多啤梨鮮忌廉蛋糕,法式檸檬撻,巴馬臣火腿蜜瓜香草包多士、煙三文魚酸忌廉撻配黑魚籽及雞肉批,質素都好好,都值得加碼。
佢嘅甜點提拉米蘇雪糕筒同雲呢拿吉士拿破崙配紅莓都好好,為你尾聲有個甜美回憶。
睇到呢度,我諗大家應該都一定會有返咁上下興趣,附上訂位嘅Link 俾大家,記得注意黎緊七月訂位情況,快啲黎打卡。
https://inline.app/booking/pier/1929?fbclid=IwAR3sG0RaR9wLYiOOUFp4_r1kgA90SFsNI6OdsZFOXPH4IKOSJI1w3efBZtw
Pier 1929 灣仔灣仔碼頭2樓

2021年5月25日星期二

洪記潮州滷味:食街新貴

北帝街做左食街咁多年,基本上講得出都有得食。


相反,就真係一次都未見過潮州嘢,咁耐以來都算第一間。


好記得可能因冇潮州嘢食一段時間,一開門呢度真係水洩不通,連外賣都要排隊。


今晚都係,要斬料,咁就諗試吓潮州嘢。


傳統嘅鵝肉鵝片滷水都應有盡有,價錢都唔算特別貴。


當晚見咗滷水豆腐,鵝掌同鵝翼整體質素都幾好,咁大份都係一舊水。


加餸一流,點下鹵水,最少送到兩碗飯。

呢期食街新貴,真不錯。


洪記潮州滷味 土瓜灣北帝街33號地舖

Break: 朝聖成功

聽過Break呢個大名好耐,不過就係一路都無時間特登過黎食,對我黎講,地方始終唔算太就腳。
剛巧有個星期六,食母親節飯前的一個下午有少少時間,心想不如過嚟試吓。
正因個日喺觀塘嘅下午,為去Anaglog睇吓黑膠碟,才會順便過來。
終於可以一睹呢度嘅南蠻炸雞同慢煮叉燒飯嘅風采。
南蠻炸雞配田園沙律,BREAK嘅名物,又點可以唔叫。
炸雞的確做得好好,乾身唔算油,吃下去不會有勁油膩的感覺。配上田園沙律,更加清爽,就算夏天吃呢個主食都非常適合。
慢煮叉燒飯,一粒粒嘅肥叉,燒得好吃,一啖放入口,點會唔好食,但隨之而來,係懊悔,太肥了,不過真係太正,就算後悔,都要繼續食,另外,個餐附上嘅點心,幾個食,不過次次不同,講多都無謂。
加隻蛋,再撈飯,人間美味。
聽講呢度嘅咖啡亦都係其中一樣名物,本身想叫佢哋揀番個正嘅咖啡黎飲,不過天氣太熱,還是凍飲吧。
Very Dirty,dirty 不用多介紹吧,點very呢,大熱天時,更凍更奶,咖啡味無咁濃就是了。
信州白葡萄氣泡咖啡,又係清新到一個點,白葡萄的甜美,加上了氣泡咖啡的撞擊,令人幻想自己迎著海風,曬太陽,飲杯凍飲,正。
如果經過,值得上黎食下野,過番一個下午,有靚咖啡有好嘢食,雖然唔係話有超靚嘅環境,但絕對可以坐返幾個鐘。 break 觀塘海濱道77號海濱匯1樓13-14號舖