2021年7月26日星期一

YAMA: 吃串燒去

帝都本身已經有兩間日本嘢,一間櫻田,一間係吃開中菜的玉庭,各人都會食番自己的日式首本名菜,一個鐵板燒,一個吃shabu shabu,而新開的YAMA吃日本串燒。
最開心係當晚見到好多好耐冇見過嘅朋友,可惜參加唔到餐廳嘅開幕典禮,一去到已經可以開始晚飯。
先吃嘅Japanese "YAMA"Salad,以其名點題的山日式沙律,由於太遲來,朋友只是留咗俾我,但係都已經好好食,可惜當晚唔係個個都係愛草人,如果唔係,我實會要求食多一個沙律。
煙燻甘鯛魚伴酸汁,甘鯛魚當然好,加上酸汁,直頭係消暑嘅良方。
中吞拿魚腩拼油甘魚刺身伴山葵啫喱,靚到不得了,有調味之後,當然水準更加唔同,山葵啫喱記得唔係第一次見到,但呢個可愛得來有強烈嘅山葵香,吞拿魚同油甘魚比拼起來,好像中吞拿魚腩技勝一籌。
來到這裡的重頭戲,爐端燒才是主菜。先試雞腿肉,當然係精彩,唔會太乾身,吃到肉汁之餘,個人覺得雞腿肉必定是串燒嘅最佳食品。
另一個重點係自家製免治雞肉,加隻日本蛋,基本上係每間串燒店嘅基本功,將成件雞肉用蛋黃蛋白沾滿。
通街都係和牛三文治,呢度當然都要有,“山”吉列和牛三文治,未吃先打卡,朋友們都研究究竟麵包同牛肉嘅比例點樣先係完美,但牛肉嘅出色會令到成件三文治會有唔同嘅評價,對面嘅朋友食足四件依然有胃口,青春真好。
老實講,脆米炸蝦丸水準就真係好麻麻,蝦丸係幾爽,但脆米夾落去個味就有少少奇怪。
野菜蕎麥麵就好有驚喜,加上了魚籽同秋葵後,蕎麥麵的彈牙同係京都食嘅一樣。
味噌汁唔係簡單,配上了特別海鮮,加上海生草蜆後的味噌湯,更加多元化,草蜆好細隻,但鮮甜到一個點。
結尾的南瓜椰子奶糯米糍,唔係我嘅朋友,但吃落去都幾好。
如你在沙田,要吃日式串燒去,實去呢到,新地方,新美食,值得去。
YAMA 沙田白鶴汀街8號帝都酒店1樓

2021年7月25日星期日

老厝邊: 哪個寶藏

前排介紹過的哪個,唔知你試咗未,不過嗰日係排緊隊之際發現咗同一條街,有一間台灣野同樣排到天花亂墜,呢間叫老厝邊。
星期一嘅晚上,都要排隊你已經知道水準應該同老厝邊差不多。
秘製麻辣牛三寶麵,不會是勁辣的麻辣,反而係淡淡的香和麻,入口你唔會即刻覺得好辣,辣味慢慢係你嘅舌頭裏滲透出嚟。
牛肚,牛筋都有超水準表現,個牛筋炆到非常之淋。麵條就不過不失,又係會飲晒成碗湯底以後碗底朝天的類型。
全晚最愛一定係大腸麵線,個種感覺同我喺西門町第一次食到阿宗麵線一樣,有蒜香有點點辣同米線嗰種漿口感覺,完完全全係台灣嘅街頭風味。
最正係佢嘅大腸唔會太肥,細細舊,就算小米線都有五六舊嘅大腸俾你食。
如果今晚嘅食物來講,最失色應該係滷肉飯,非常有趣嘅係呢度嘅大嘅滷肉飯大碗到好似個湯碗咁,於是點過小嘅就夠,滷肉肥美,但就係唔會令你很驚喜嘅那種味道。
聽講個蛋餅係呢度嘅出色菜式,點了培根起司蛋餅,如果我同你講同台灣嘅質素一模一樣,我就係不實報導,但蛋餅整體水準已經算跟得上,特別係拉絲部份,打卡一流。
而且嗰舊培根真係煎到好脆好香,無得輸。
要了杯熱的古早味冬瓜茶,當然無乜特別,都係正常嘅貨色,冬瓜茶你想有幾特別。
如果同哪個對比,呢度嘅食品種類多元化好多,而且有幾樣特別出色,我冇吃呢度嘅便當,所以唔可以話呢間一定好過哪個,俾個機會我去食多次,再話你知,但係以台式小店嘅水準,呢度合格有餘。


老厝邊 大角咀埃華街92號地下

2021年7月13日星期二

Factory Event space:自家造腸

一路都係腸仔同午餐肉嘅fans,以前細個嘅時候真係好鍾意食呢兩類加工食品,但係人老咗越來越少食,因為怕肥怕無益。
越嚟越流行講健康,新豬肉嘅午餐肉已經係一個好好嘅示範,市場上呢啲傳統認為無益嘅食物都開始有唔同種類嘅健康出品,不過最健康嘅相信應該係自己整嘅。
朋友介紹黃竹坑嘅Factory event space,呢度有學整香腸嘅sausage class,鍾意食又鍾意煮嘢食嘅人基本上一定會鍾意。
一行六人就黎左參加一堂好玩又有趣嘅課堂,又有得食又有得玩。
上到黎有香腸專員為大家講解成個過程,介紹啲機器點用等等。
主要用豬肩肉去做腸嘅主角,你唔會唔知道你自己整嘅香腸到底夾雜左啲乜嘢肉類,一定食得健康,亦都唔會係加工食品。
將豬肩擺落攪肉機搞碎,整左之後就加調味。
提供咗好多唔同嘅調味料俾你,如果你鍾意芫荽,蒜,蔥等十多隻嘅調味料,可以俾你去調教自己喜歡嘅香腸味道,任你選擇,最後仲可以加啤酒或者紅酒作為香腸嘅主軸味道。
將腸衣放入機入面,過程都幾好玩,再將碎肉灌入腸衣,呢條腸嘅初形就完成。
當然最後一個最重要嘅過程就係將啲腸分返一條條,變成一紮,原來都幾考功夫。
我哋立刻試咗幾隻唔同嘅腸,每個人整嘅味道都有啲唔同。
玩完仲可以係度食飯,呢度有好多種唔同嘅午餐都可以試吓,期間又叫左啲小食,特別正嘅係煙肉帶子,呢度嘅自家出品腸仔,都唔錯,不過當然我個人都係鍾意食返自己整嘅。
特別宜家冇得去旅行嘅時候,呢啲又好玩又有得食嘅活動就最啱大家參加,有興趣就去Facebook了解下。
Facebook: Factory Event Space