神燈海鮮酒家:阿拉斯加黃金金蟹宴

呢個阿拉斯加黃金金蟹宴，由頭到尾係咁食蟹，食蟹食到驚，想唔想試？

雞油花雕蒸蟹身

活膏甲羅燒伴懷舊蝦多士

宮廷蟹爪濃雞湯

星洲麥皮蟹腳

鮮拆蟹黃芝士烏冬

再加一個前菜鹵水掌翼、手拍青瓜、香茜鮮沙薑豬手粒，原價$3688，期間限定現價$2988，如果你有四個蟹癡食，值得去下。

神燈海鮮酒家 佐敦長樂街14-20號18廣場地下及1樓

靖·火鍋：下一站天后

都真係好耐冇試過一人一鍋嘅打邊爐，今次因為係公司附近的新餐廳有人讚過才一試。

又係呢座勁多新餐廳的金輪天地，鐵板燒日本野就多，火鍋就係第一間。睇菜單，用上下一站天后呢個gimmick，真係幾啱。

可惜下午才來，享受不了舒適的海景，晚上來這餐廳就係差少少，如果你記得，呢座好多餐廳都有無敵海景。

一人一鍋叫自己的喜好湯底，完全唔駛煩。

見到隔離食田雞，勁肥美，忍不住點。

牛肉選擇幾多，由於未試過品質，叫過普通來看看係料，感覺都不錯。

好多種不同的丸同餃嘅選擇，隨你喜歡。

炸午餐肉，墨魚滑同蝦滑，蟹柳都幾好。

醉雞好出色，濃濃酒香絕對不能抗拒，唔係好似平時舖頭咁淡淡的味道。

叫了一種海鮮試試，鮑魚仲切片上，幾有心機。

呢度竟然有串燒，整串羊肉試試，一絲絲濃郁的深圳東門味，幾好。

唔知選三色麵同烏冬好，小朋友才選擇，我兩樣都要，配麻辣湯底幾好。

如果好耐無食過一人一鍋，絕對可以試下，而家價錢不會似平時的咁貴，兩個朋友唔想食太多，來就正確。

靖·火鍋 天后電氣道68號金輪天地23樓

泰喜越:黑膠午餐

俾人成日插爆嘅觀塘巧明街，駿業里一帶，無乜事都真係唔會特別去，今日放假冇乜嘢做，就過去行吓街睇吓黑膠，怕塞車，地鐵應該係最好選擇。

本來想選係有名嘅意粉店Pasta zone，但上網碰巧見到呢間新開嘅連鎖泰國越南野，新開張有九折，就試吓啦。

地方非常之大，食品選擇好多，星期六嘅下晝人不太多，我想像到如果一至五應該座無虛席。

有午餐有下午茶，而且價錢相當便宜，好適合打工仔嘅餐廳。

點了推薦的午餐，泰風味大蝦煙肉蛋黃意粉，做得不會太過差，原來carbonara夾泰國風味都幾好。

正常水準的青檸梳打，加七元就有。

喇沙海鮮金邊湯粉，椰奶我個人覺得落得太多，你會好容易食到好飽，但係好多種唔同嘅海鮮，好似有帶子，魷魚，蝦等等，仲有大大隻青口。

老婆點的椰汁紅豆冰，也不錯。

午餐追加泰式冬蔭功湯，我個人覺得呢個點子唔錯，口痕想飲下又唔會太飽，幾好。

我點了綜合湯粉，呢個越南牛腩牛丸肥牛河，唔可以話係好驚喜但係水準都可以接受。

最後我追加多個粉包，好飽滿，幾好食。

全單有九折，每人都係$70左右，合格啦。下次去完Analog買黑膠後，去食個午餐，幾好。

泰喜越 (興運工業大廈) 觀塘巧明街110號興運工業大廈1樓B2號舖

三代目：北角新蒲點

係北角工作左三年，如果要同同事食日本野做lunch，通常都會去兩三間係口袋入面，隨時可以食，不過有新店都會試試，睇下會唔會有新場發掘到。

碰巧見到港運城有新店，叫三代目，眼睛發亮的原因，因為有任飲package，而且，呢度有壽司、拉麵、串燒多種唔同嘅日本嘢，適合任何唔同種類嘅朋友去食，見到咁多元化又有酒飲，一開門就即刻試吓。

$188三種不同的感受之sake，薰、爽、醇，九種不同sake，一個半小時，任你飲，愛酒愛sake的，一定啱。

當日試左幾隻，唔想溝酒，但講真，飲酒的，一定不會錯，來任飲就是。

星期六下午，前菜有兩個胡瓜一本漬同醉漬鮮飽，胡瓜漬物加上紫菜，送酒真係非常之好，不過有啲人可能覺得呢漬物過鹹，但撞正過以酒入撰嘅鮮飽，一淡一濃，絕對係居酒屋嘅水準。

另一前菜，和風燒茄，愛蒜味之人，一定要吃，蒜多到不行，配合燒到剛好淋身的茄子和好濃烈的醬汁，正，食完一定全口蒜香。

玉米芝士條，又係送酒佳物，的確，更顯得呢到個廚做得不錯。

串燒一定要試試，點了個雞拼盤，不用想，有雞胸軟骨、雞肉京葱同雞腎，各有各精彩，不過最出色嘅就係雞胸軟骨，同平時你食嘅雞軟骨係兩種截然不同嘅味道。

一口壽司有火焰牛同海老·膽，兩個都絕對係IG之作，打卡又好，食又好，個人較為喜歡蝦同海膽嘅配搭，火焰牛嘅燒牛相對唔係最出色嘅牛肉，因此比較下去就差少少。

兩個主食，豚肉醬油魚介拌麵同紫蘇燒豚梅肉拉麵，兩個都不相伯仲，我愛紫蘇燒豚梅肉拉麵多點，因為湯好濃，燒豚梅肉又肥又好食，拉麵質感掛湯，很不錯。

叫多個黑糖鮮薑作結，完美的星期六下午。

三代目 北角英皇道500號港運城地下11-13號舖