2021年10月26日星期二

Oyster station:黃金時代

試過土瓜灣Oyster station 幾次,分店越開越多,一間又一間,最新分店開到去銅鑼灣。
黃金廣場外分手之後就可以上去食海鮮,九樓全層,可以話係oyster station最大嘅分店。
兩個人嚟呢度食下午茶,由於夜晚要留力,因此點左幾個新鮮海鮮試試就算。
午餐其實只是$60一位左右,多種唔同嘅意粉,肉類選擇,都幾吸引,不過我哋目標就係食海鮮。
$10一隻蠔係呢度嘅必吃點,今日當然唔例外,半打係常識。
點了日本帆立貝,即開即食,好新鮮好甜味,點那個酸酸的汁,好適合。
另外點了一隻蝦,蝦頭炸過,個身刺身上生食,太正。
叫多隻日本來嘅赤貝,相對比較細隻,比起平時喺壽司店吃嘅相對冇咁有彈跳力。
由於食藥,冇得飲酒,如果唔係送杯白酒,應該係一個幾好嘅下午,食完後剛好在時代門外再聚。
蠔站 銅鑼灣銅鑼灣軒尼詩道502號黃金廣場9樓

2021年10月24日星期日

Giovanni Pina: 周日不在床上

丘世文話周日係床上最好,我同意一半,有時太為食都要早起身,為嘅係星期日早上嘅sunday brunch。
我可以話你知呢個係基本上係全城最平最抵嘅意大利brunch,有前菜有甜品任食仲有個主菜,都係$398一位,剩係食前菜同甜品飲你食已經平到無朋友,太離譜,Gelato,意大利嘅蛋糕cake同semifreddi任你食,平時⼀件單點都$40起,根本剩係甜品都回本。
如果你唔好甜品又細食,食前菜seafood and salad bar任食都係$198,當然我唔建議食呢個,因為加多$200多好多嘢,而且就咁一個主菜或者一個甜品都唔止呢個價錢,除非你真係同錢作對,如果唔係一定係食 full set brunch。
未食前菜一人一杯生果汁,清清腸胃。
前菜嘅沙律已經係好好,除了最基本嘅凱撒沙律,仲有羽衣甘藍可以任食,仲有其他蕃茄橄欖青瓜等等,質素全部不錯。
海鮮有青口同螺,好高質,特別係青口,好fresh,唔係一般酒店自助餐嗰啲貨色。
仲有牛肝菌湯,但係唔飲得多,飲完會好飽。
最重要係有好多種唔同嘅cold cut platter,喜歡食肉嘅一定鍾意,老實講前菜選擇唔算好多,但係樣樣都好精美同埋精挑細選,我覺得尚算滿意的。
主菜選擇了carbonara 同呢度最出色嘅薄餅。
意粉係自己手做,煙肉係條狀好特別,蛋黃味唔係好重,幾好。
最正嘅係呢度嘅開放式廚房可以睇埋佢點幫你整。
上次喺尖沙咀分店食個薄餅都知正,今次見到個火爐就明白更加要食,香辣雞胸銀魚柳手工羅馬薄餅,芝士拉上黎個下,已經知道值回票價。
其實甜品嘅選擇多到一個點,如果你為咗食甜品而來,必然精彩,我地每人食咗兩球Gelato,平時單點都已經要接近$70,仲有呢個分店獨家提供的semifreddi,我哋試咗兩隻味,蛋白同蜜糖果仁都各有千秋,如果你未試過呢個意大利風味一定要食。
可惜餐廳剛剛開業,仲未有酒牌,如果唔係,飲埋free flow香檳,仲正,就好似同日有一家大細加個婆婆,食左四個小時,每人食咗最少四round gelato,講真,點會輸,我相信,呢度一定好快爆場,係未有人講之前你快啲試下。
Giovanni Pina Ristorante, Bar & Pasticceria (華懋廣場二期) 中環德輔道中135號華懋廣場二期地舖

TA PANTRY:重新認識

如果你睇得耐,你應該記得我曾經寫過Maison ES,那次為了老闆生日,搞左場function,不經不覺,咁就過了四年了。
呢幾年,都未有再來過,呢幾年試過出面有名的,米芝蓮的日法dining,都係較大型的名字,同呢度較warm較家庭化嘅經營,完全唔同。
還記得上次在Maison ES都係選了Chef Esther 喜歡嘅菜式,同Ta Pantry一樣,佢都係為身邊所愛嘅人設計菜單,吃到嘅都係精心挑選和有心機研發過嘅菜式。加上head Chef Eric的加入後,今次Ta Pantry成個menu再重新出發過。


食正餐前,當然有牛油同麵包,兩樣都係不錯,配上香檳,將你自己嘅胃全開。

“Le Japonais",似曾相識,那個魷魚,只能夠說太開胃了,上次同樣吃過的感覺,剩係呢個已經有足夠的回憶了叫我回到過去。
Yellowfin Tuna Akami以黃鰭赤身呑拿魚背為主角,今次呑拿魚用上upgrade左嘅貨源,加上了Iberico ham,係品嘗呑拿背嘅時候更吃到脆脆iberico ham 嘅味道,用上橘子汁,又有甘甜馬糞海膽作伴,口感更有特色。
上次來搞老闆生日也試過呢個Maitake,今次同樣有吃,同樣的處理手法,不過味道更加昇華,黑松露味道更濃烈,那個炭烤舞茸菇的味道燒得更出色,加上那些鵝肝泡泡同傳統日式蒸蛋做法,合成一起更好吃,呢個係Chef Esther老公嘅最愛,當然會做得更加出色。
Japanese Black Abalone用上肝醬和魚子,染上了肝醬的日本黑鮑的彈性可以話係一流,味道又夠濃烈,加上海帶粉和醬汁的自家寬條麵非常迷人,彈牙而且香氣逼人,不過,最令人覺得美味的就一定係隻黑鮑,就是切左幾件上都感受到佢嘅size非常大隻。
Wagyu A3 Sirloin 2 Ways,一個係吉列,一個用上黑蒜醬汁,各有千秋的感覺,同Chef Esther 一樣,我還是愛上吉列方法,呢樣嘢叫我想起東京街頭嘅吉列牛扒店,也叫我想起那個時候想飛就飛嘅日子,喺未有旅行嘅日子,就喺呢度感受一下鹿兒島和牛嘅好吧。
Crêpe 可能你會諗起法國嘅薄餅,但係日本街頭嘅手法又會有截然不同嘅感覺,用上了栗子蓉,麻糬,焙茶雪糕同沖繩黑糖漿造成嘅班㦸叫人吃完一定不會內疚,唔會太甜卻有令人幸福滿滿的感覺。
尾聲Petit fours,是常識吧。
同上次來這裡一樣,同樣吃得非常滿足,只不過今次不是公司飯局,吃得更加無壓力,更加可以enjoy到可以重新認識Chef Esther的理念。
Ta Pantry Private Dining & Catering 灣仔電氣街1號地舖