2021年11月26日星期五

順.和の味: 水炊鍋與土鍋飯

又係搵topic 上電台分享秋冬食乜好就諗起呢間嘢,出奇地呢間咁好食嘅和食竟然冇乜嘢人講,佢係我心目中其中一間食水炊鍋同地雞土鍋飯隱世之選。
呢度好多和式食物有得俾你選擇,好似串燒,定食,火鍋等等,基本上你講得出乜嘢都有,而且最好嘅係識嘅人唔多,餐廳又坐得舒服,所以推介下俾大家。不過,你睇得我個page應該都真係好講究飲食的話,我會推介你主力食水炊鍋同地雞土鍋飯。
水炊鍋(みずたき),說穿了就是源於博多的雞湯鍋,普通的水炊鍋大多使用昆布湯底,博多水炊鍋就會用上以雞骨熬煮而成,因為用上雞骨,佢嘅湯底非常清澈而且勁含膠質,充滿骨膠原。
當日就點左呢個日本地鶏のスープの海鮮鍋, 剩係排場都一流,蛤,日本蠔,海老,油甘鮫,日本魷魚,雜菜,二人前,基本上呢淨係食呢個鍋物都已經夠飽,如果你唔夠基本上可以追加唔同嘅食物,例如美國和牛、油甘魚鮫 、日本魷魚、日本蠔、海老,大蝦,蜆等等。
成個水炊鍋有三個食法,第一次先飲一口湯,感受佢嘅骨膠原嘅豐富,用上來自日本嘅華味鳥,淨係飲個湯頭都已經夠照。
第二個食法就係加完海鮮之後,湯頭會有唔同嘅分別,明顯再變得另一種鮮甜,多咗海鮮嘅調教之後又係另一個感覺 ,加上佢全部嘅海鮮都係大部份由日本嚟,好似蠔同魷魚,仲有最出色嘅油甘魚鮫,油甘魚鮫油脂同埋肥美,令成碗湯嘅層次多咗好多,而且樣樣海鮮都超好食。
其實仲加左菜,又多加味,不過玩法無咁唔同。
最後加上日本脆米飯,就煮咗個粥底飯,又係第三種食法啦,我個人最鍾意呢間食法,基本上層層遞進就好似一篇完整嘅文章有起承轉合一樣咁正。
地雞土鍋飯,又係唔算好多地方可以見到,另一間最常見嘅應該就係海港城,但係如果以地雞來講我覺得呢度嘅味道特別出色。用上日本青森縣米製作米飯,以去骨日本雞髀肉,又加上自家調過的竹炭汁去做,基本上佢攞出嚟嘅嗰一刻,全間餐廳都聞到個竹炭香,雞肉又滑又嫰,送埋個飯直頭係一流嘅享受。加多個茶,又可以變茶漬飯。
當晚其實都食咗好多唔同嘅日本食物,幾種唔同嘅串燒都好食,當中最好食嘅就係免治雞肉棒。
另外蛋卷都十分吸引,加少少酒飲,呢餐真心好完滿。
總之,水炊鍋與土鍋飯都係極級推介嘅選擇,特別係想見識水炊鍋嘅朋友,香港冇咩地方可以做到呢樣嘢,快啲黎試吓啦。
順.和の味 中環德輔道中173號南豐大廈2樓3-5號舖

2021年11月25日星期四

THE JANG: 應有盡有

可能你較少睇我寫韓國嘢,但為咗聽日嘅電台訪問,講起秋冬嘅選擇,我就即刻諗起呢個喺K11 Art Mall剛剛開幕嘅THE JANG。
唔知你有冇試過喺首爾冰天雪地嘅情況底下,食個非常溫暖嘅魚蛋串魚蛋湯,又或者滑完雪飢寒交迫下去食個辣海鮮湯麵做晚餐,甚至行行吓街太凍去食燒肉保暖,呢啲情景真係歷歷在目,如果你都有同感證明你都幾掛住韓國。
當然可能你會掛住泰國,台灣甚至日本多啲,但係其實韓國嘢食嘅多元化同埋獨特性都好令人嚮往,呢個THE JANG嘅應有盡有一定能夠滿足你需要。走入去呢個場,你會發現有四間唔同嘅餐廳,分別買好多種唔同嘅韓國嘢食,THE JANG 呢個品牌登陸K11 Art Mall首次破天荒將五大韓國特色品牌同時間帶俾大家,你就好似去咗韓國嘅地下街或商場一樣,如百年老店韓式中華料理 Gonghwachoon,全港首個韓國粥品品牌 Juk Story,知名連鎖炸雞 NeNe Chicken,熟成專家馬場洞烤肉專門店 ,同布帳馬車熱炒自家品牌 Jang Pocha,基本上梗有一款適合你。
當晚由於太掛住韓國,基本上我哋食盡左每一間唔同嘅嘢食 ,不如一齊睇吓。
Nene炸雞聽得多,甚至你都食過,海炸雞四重奏有四款唔同醬汁嘅炸雞,不過都係點左芝士後嘅炸雞最令我歡心。
Juk story 係我最期待嘅其中一間店舖,因為未試過喺香港食韓國粥,應該仲未食到真係好好食嘅韓國粥,仲記得之前喺首爾食過一次早餐非常開心,你知道佢哋好出名食一啲養生粥品, 今晚都有呢類選擇,係莞島鮑魚同章魚醃辣白菜粥之間,我選擇左前者,莞島鮑魚煲得非常之棉襪,啖啖都吃到鮑魚肉,而且嗰啲飯好煙韌,好有口感,食完全個人都好暖,聽店員講章魚醃辣白菜粥其實仲好食,下次有位一定要再試。
Gonghwachoon就點了炸醬麵同炒碼麵湯,如果你好似我一樣咁愛食麵,你一定好鍾意呢個品牌。炸醬麵同你喺韓國食到嘅一模一樣,不過最愛都係炒碼麵湯,個辣海鮮湯暖到令你上心頭,呢幾日咁凍嘅天氣食就最啱。
Jang Pocha呢個品牌主力係好似食街頭小食一樣,鐵板熱炒海陸空有魚糕湯,辣炒小章魚為主題,加上甜辣炒豬皮,辣炒豬腸,香辣無骨雞腳,春川鐵板炒辣雞,個人特別喜歡嘅係個豬皮,同你平時食香港嘅豬皮完全唔同,特別有咬口。
單點了個秘製滷豬腳,其實非常之大份,凍吃的豬腳並唔係好似豬腳小姐嗰種style,唔會有好強大嘅蒜味,不過兩個人真係冇亂叫,我哋食唔晒要打包左走。
馬場洞當然最出名係燒烤,選左一人一個燒烤餐,豬同牛各選一款,韓牛嘅魅力當然非凡,基本上我諗都唔使多講,只係你有位食幾多嘢。
尾聲當然要叫啲米酒送,當日試嘅呢款係呢個group每間唔同嘅店舖都會擺一款特別嘅米酒,飲落去米香勁濃,而且唔會酒精度太強,送燒肉一流。
The JANG - Pocha & Korean Cuisine 尖沙咀河內道18號K11購物藝術館1樓107號舖 相信睇到呢度你都真係花多眼亂,如果你有思韓國之情,就快過黎感受下好似去咗韓國咁嘅感覺。

凱悅軒:雲南菇菌聚

又係時候分享吓啲時令嘅菜式,講番啲少講過嘅類型,呢餐食左段時間,但無放上Meta,今日覺得好啱呢個天氣,所以放上黎。
趁放假嘅時候,最好就係同識食嘅朋友一聚,呢期太多主題,食大閘蟹食白子食海膽食蛇羹食羊腩煲,選擇多到不得了,但朋友反而提議食菇。
凱悅軒嘅雲南山珍特色小菜之前好多人已經講過,食就真係今年第一次,通常菇菌類興趣相對冇其他食物咁大,但每年都總會食一次,前兩年喺Sharaton天寶閣食過,今年就選擇係附近嘅凱悅軒。
下午時分當然全滿,個個都食點心放題,我哋就主要集中食雲南菇菌宴。
前菜吃了涼拌川味羊肚耳菌,完全冇諗過食菇菌都可以咁樣食冷盤,咁就令我諗起嗰啲地道嘅川式小食,又惹味又開胃。
黑虎拳菌淮山杞子花膠燉螺頭湯,絕對係我呢到最欣賞嘅燉湯之一,之前都試過飲過幾個燉湯但呢個最出色,飲完成個人好似做完拔罐艾灸一樣,暖流走全身通左你嘅任督二脈,食埋舊好似拳頭咁大嘅花膠就勁滿足。
當日最滿足嘅係羊肚菌海蝦炒滑蛋,呢個真係炒得超靚我相信佢嘅蛋應該係用上日本蛋,羊肚菌同蛋香同蝦炒得淋漓盡致而又唔會太老,而且個蛋汁仲係好Juicy,呢個又係足足可以食一碗白飯,好食到我直頭想入去問個廚教我點炒。
鮮姫松茸雲耳炆三黃雞,聽個名都知道一定係惹味之作,睇埋個樣,用上沙煲來上,雞件剛剛好夠嫩,加上雲耳同埋淡淡好大條嘅松茸,真心好食,就咁食才感受到夠美味。
鴛鴦雞樅菌炒鴿甫,都不錯,造法相對簡單啲,但雞樅菌嘅美味令人都會記得呢個菜式。
朋友話一定要食嘅雲腿鮮姫松茸星斑蒸豆腐,賣相相對唔會好搶鏡,就如你我屋企嘅家常小菜一樣,但係當然加上嘅係星斑,過於非常鮮甜,一口連埋豆腐同埋金華火腿一齊食,但都難掩鮮姫松茸嘅香氣。
另外叫咗石鍋帶子羊肚菌繪絲苗,呢個真心好得,又係石鍋上邊熱到不得了,帶子兩邊係微微有焦香,最正當然係嗰啲飯焦,呢個飯完全俾羊肚菌嘅香完全帶領著,好得。
最後我哋都敵不過隔離枱係咁叫點心之衝動,點了幾個點心,有蝦腸,有小籠包,當然仲有超飽滿嘅蝦餃。全部都係水準以上,唔會因為任食而水準差咗好多,怪不得呢度嘅任食點心成日都爆場。
尾聲再加個乾炒牛河,又係非常之好,炒到一滴油都冇。當然亦少不了呢度最出色嘅叉燒。
甜品叫咗個桂花圓玉燉桃樹膠,秋冬食一流,而朋友係甜品粉絲,當然也不錯過酥皮流沙盞。
呢個Menu應該會做到12月底,食菇菌唔係淨係八月先食,有興趣就要試下,唔一定下下食蟹食羊食日本嘢,食菇菌仲可以養生,聽講餐廳都爆,要食就快。
凱悅軒 尖沙咀河內道18號香港尖沙咀凱悅酒店3樓