金紫荊生記粤菜廳：SEAFOOD LOVES SAKE

各位愛清酒的朋友們應該一個月前都已經看到SEAFOOD LOVES SAKE 呢個活動，非常好奇下，見到原來佢有唔同嘅餐廳合作，於是係云云餐廳中選左一間自己最喜歡嘅餐廳，試下呢個清酒同送廣東海鮮嘅Menu。

選了會展的生記，全因會展公關話我知生記係呢度開左分店，好耐無食過的生記，應該不用多說多介紹吧，滿心期待，選呢度，當然係想食得有保證。

當晚個Menu食咗好多嘢，而且仲要有四支唔同嘅清酒佢做Pairing，仲要有人講解。

前菜係醉鮑魚，海中蝦同鴨舌，兩個海鮮都有淡淡酒香，鴨舌平時就送啤酒，但今日送上七賢絹之味，純米大吟釀就非常匹配，因為鮑魚嘅嫩，海蝦嘅豪爽，完全俾支酒帶出其水準。

七賢之前其實試過飲sparkling，我自己就唔特別好呢個牌子，但純米大吟釀嘅花香就令人耳目一新，原來送肉類都可以提鮮，絕對改觀。

開段嘅清新過後，就開波試下重口味，先來特色燒味雙拼，生記另一出色作品。

黑毛豬叉燒拼燒鱔，配上天吹山配純米大吟釀，又有乜光景？

以雄町杜鵑花的酵母，其花香叫所有枱上嘅人都驚豔，配上兩個強而有力嘅濃尾食物，硬碰硬，化學作用更強。

叉燒唔算太肥，但黑毛豬嘅味道燒得非常香，燒鱔味濃豐腴，肥美嘅鱔肉係清酒襯托底下更鮮甜，一口鱔，一口酒，回甘更強。清酒嘅酸度亦都令你吃完叉燒同鱔肉兩件同樣咁有份量嘅食物後都唔會太飽。

金紫荊生記特色孖寶係我當晚最期待嘅作品，香煎手剁蓮藕餅拼鍋貼大明蝦，我記得兩個作品多係舊分店食過，回憶中味道十分好，今晚更加期待。

配上了千代壽虎睡 ，同樣係純米大吟釀，有點辛口的尾，配上鍋貼大明蝦，更出到佢鮮嫩香口味同清爽，每啖爽口嘅蝦肉，完全唔會過油，同曾令人迷倒港大同學會最好表現時期的蝦多士，有異曲同工之妙。

香煎手剁蓮藕餅應該食先，味道相對淡，但剁蓮藕餅做得非常細緻，每啖你都吃得出心機，完全係生記力作。

香煎海鹽馬友件又係我期待嘅作品，香煎海鹽馬友鮮嫩就不用多說，最重要煎嗰層魚皮令到人吃到有幸福嘅感覺，加上特別處理過嘅蔥花，係我呢幾年食過最好吃嘅馬友之一。

達磨正宗三年配上馬友，可能你會覺得又係硬碰硬，香醇而又濃烈，原來又係另一種感覺，我自己個人較喜歡熟成酒，醬油感就如吃緊一碗拉麵一樣。當然由於只是熟成三年，佢又唔會係好重味，但同樣帶出馬友嘅濃烈。

之後的玻璃貴妃脆皮雞，雞肉嫩如少女不用多講，我依然用熟成嘅達摩來送酒。

再上一道香辣和牛粒，絕對係討人歡心之作，食完和牛粒完全唔會太油，和牛的外層有少少脆脆嘅感覺，入邊係吃到和牛嘅油香，襯返第二支嘅花香，正。

梅菜王蒸菜心，清新一下，但又有少少野性。因為，又係送乜酒都得。

香蔥砂鍋鮑魚焗飯，焗飯粒粒都咁靚，一粒軟，一粒硬，有口感之餘好好玩，好食到不得了，我直情想成個砂鍋飯咁上黎自己一個食，呢個飯基本上飲任何一支清酒都咁襯。

甜品有菲林卷、太極馬拉糕及精彩的渣渣，但前段吃得太飽了，三個甜品感覺都不錯，唯一可惜，如果有一杯更加甜嘅清酒送甜酒，應該更加好更加完美。

返屋企再上網睇呢個活動原來仲有好多其他餐廳可以選擇，等我再研究吓，如果愛清酒嘅你記得研究吓。

金紫荊生記粤菜廳 灣仔博覽道1號香港會議展覽中心博覽商場