家後:不用排隊的星期日下午

一路好想試堂食家後，呢個星期日天氣凍到不得了，又再落雨，終於唔使排隊就試到。

由於唔駛排隊，當然食得就食，基本上全部餃子又湯又煎都試過晒，當中有幾個特別好食。

洋蔥豬肉用煎形式可以話係不得了，其他芹菜豬肉，芫荽豬肉同韭菜豬肉，都係兩吃皆宜，最推介呢度嘅煎餃一啲都唔油膩，而且食幾多都唔會太有飽肚感。

就咁飲佢嘅湯底都好好味，仲有個牛腩唔錯，可惜無位食豬手。

不過最重要係呢間餐廳除咗餃子出名之外，佢仲有好多值得你欣賞嘅作品，最出色當然係芝士蛋糕，當日一口氣試咗原味，開心果味，咖啡同焙茶味，每樣味道都有個人嘅特色同好處 ，我自己個人就最鍾意原味，雖然價錢相對較貴，但係真係值得一試。

最後要推介呢度嘅日式飯團同大腸羮，特別係個大腸羮，你唔會覺得好油膩好肥，清新得來有口感，送一口日式飯團絕對夾到不行。

家後 深水埗基隆街211號地舖

凱悅軒:大澳小遊

舊年大澳一定係其中一個最熱熱店，不過疫情關係，都無乜機會去，而家就黎街都無得出，大澳好似更加遙不可及。

除左欣賞景色，當然最重要就係食野，大澳以海味、乾貨、不同種類嘅醬料等特產而聞名，去得就一定會試晒咁多樣特產。

凱悅軒主廚好好人，知你未必係疫情下去到大澳，黃師傅由一月到三月為你呈獻大澳特製風味菜單，等你去唔到大澳都有得食到大澳嘅美味，上兩星期周末就試咗呢間餐廳。

  先上場的係蒜香醬油秋葵吊桶仔，呢個由大澳出產的新鮮小魷魚，絕對可以吃到大澳的風情，每隻魷魚感受到陳醋及薑蔥的香同調味，幻想到大澳海風趨向你面龐嘅感覺。

轉個頭就吃酥炸九肚墨魚餅，呢兩樣夾埋好少有，九肚淡淡的香同墨魚嘅口感，混合得好好，如果可以送杯啤酒就正。

  大澳蝦膏鮑魚滑雞煲用上西餐呢期好愛嘅三黃雞，仲有高級嘅南非鮑魚，煲入面除左呢兩個主角仲有大澳蝦乾同大澳蝦醬，加點調味如指天椒等等，個煲霹靂啪喇嘅聲響，點會唔好食。

你一定食過馬友，今日食呢條係我食過好味嘅一條之一，唔算好大條，但係皮脆肉嫩又滑，而且鹹香一流，絕對係愛魚人嘅選擇，我自己就最鐘意魚皮，就咁食同送威士忌真係一流，可惜下晝冇得太hardcore。

我最愛一定係呢佢金湯岩米釀原條花膠筒，花膠筒係出自石澳，加上了日本嘅珍珠米，以燴飯嘅形式，加左南瓜帶乾瑤柱及雞脾菇粒讓口感更紛陳，賣相又靚又好味，好似我鍾意食花膠嘅粉絲就一定鍾意。

大澳三寶蒸肉眼筋鴛鴦飯又係肯定未喺出邊食過，三寶包括魷魚乾，銀魚乾同蝦乾，平時可能你會覺得一定係撈米粉來吃，但係原來加上糯米同埋日本珍珠米個口感又係另一個世界，鴛鴦飯加上唔同嘅乾貨，口感一流。

啫啫蝦乾肉碎芥蘭煲，呢個充滿鑊氣同廣東氣息嘅美食，一吃就知好得，最正係每件蝦乾都好有咬口，加上肉碎炒菜嘅獻汁，送白飯一流。

甜品再唔係平時食開嘅選擇，反而有來自大澳嘅迷你缽仔糕，一口吃下去，又滿足又快樂。

食完之後仲更加想去大澳，結果返去再睇多次<大叔的愛>止下咳吧，等疫情冇咁嚴重，再周圍走啦。 凱悅軒 尖沙咀河內道18號香港尖沙咀凱悅酒店3樓  

Coffee or Tea: 變奏的煲仔

以前應該睇過我介紹觀塘裕民坊嘅Coffee or Tea，咁快又再講呢間形象似係六本木嘅茶餐廳？因為之前睇過有介紹有全新冬日餐牌隆重登場，呢個咁冬嘅天氣，食煲仔飯就最正。

平時你食煲仔飯嘅地方通常係較市井和地道嘅地方，但係咁靚咁打卡嘅餐廳又好似係另一個感覺。

今晚為佢黎，當然要食足咁多款，四款變奏的「生鐵」臘腸潤腸烏魚子煲仔飯、西班牙莎樂美腸及台式香腸煲仔飯、窩蛋牛肉煲仔飯和法式梅子油封鴨脾煲仔飯，同你平時食開傳統煲仔飯完全不同，個人最愛油封鴨脾同西班牙莎樂美腸，前者個味絕對同煲仔飯激夾，莎樂美腸的油脂和辣味則加上港式豉油都有好特別嘅效果。

法式梅子油封鴨脾真係又soft又夠柔軟，雖然個價錢真係唔平，但都值得一吃，至少同平時你食開嘅不同。

最尾的臘腸潤腸烏魚子煲仔飯，係港台合作嘅神作，烏魚子同臘腸潤腸竟然有一種說不出嘅奇異感覺，你完全諗唔到佢兩個夾埋個味道各自搶鏡得來又合拍。

窩蛋牛肉煲仔飯雖然普通，但係又做得好好，特別係個牛肉同飯焦底，加點豉油，不得了。

最後飯底都要講多幾句，用上泰國米絕對唔會丟架，先蒸後燒特別令個質感更突出，加上炸蒜和蔥，生抽和甜豉油，真係停不了口。

甜品都有新創意，椰子味奶油忌廉賓同開心好多係重點，椰子味奶油忌廉賓係重新感受到兒時的回憶，滿滿的奶油忌廉叫人十分興奮又滿足。

開心好多嘅特別，在好少見咁精美嘅樣子同味道都令人深刻。以開心果醬搽的牛油果多士，係坐隔離個女仔推薦必吃，食完都無乜失望，愛開心果同牛油果，一定要吃。

最尾飲下咖啡，之前推介過幾種，今次特別深刻係呢個竹炭Latte，飲完真係飽到激滿足。

下次黎，無番咁多人要小心，因為一定會好飽，千祈唔好好似我地咁貪心。

Coffee or Tea 觀塘協和街33號裕民坊YM² 1樓101號舖