2022年3月27日星期日

香格里拉:太大期望

呢幾日人人講川之味,排兩三個鐘食碗米線究竟係咩玩法?我唔知,不過都係期望有一日佢會重開,記得個豬軟骨真係好正。
要唔排隊又食好味嘅米線,仲有一間非常出名係觀塘嘅香格里拉,你又有冇試過?
聽過佢嘅大名好耐,上星期終於食到,試咗佢嘅麻辣,叫左中麻辣,還不錯,真心幾辣。
可惜當日食唔到豬紅,其中一個菜式炸醬都唔錯,不過聽講天水圍麗江嘅炸醬係世一,有冇人試過可以講下?
米線的確幾掛湯,飲一口,幾好。雞脾肉係必點。
另外叫咗個沙嗲湯又係好特別。反而更加少見,比麻辣更加出色。
總體冇外界講到咁神,反而佢嘅串燒都同樣好出名,特別係燒豬脾,又唔肥又好食,蝦卷相對普通啲。
總體感覺太,大期望都係會失望。
香格里拉米線專門店 觀塘牛頭角道345號地舖

安南:新三層架下午茶

都有一排無去過安南,1957達人又係時候出發,介紹下新嘅三層架下午茶。
每天下午三時至五時三十分提供,係我食過最平嘅下午茶,多個不同的鹹點如安南春卷、嫩豬肉木瓜沙律、越式蔗蝦 、炭燒豬肉棒濱海、鮮蝦豬肉米紙卷,樣樣都做得唔錯,個人特別愛豬肉棒濱海。
不過最好食係越式大頭蝦扎肉炒粉絲,平時通常都係食越式牛河,呢個炒粉好有火喉,最重要個汁好正,大頭蝦又勁新鮮,淡淡係新鮮嘅蝦肉。
甜點係椰汁糕、斑蘭拉椰糕、越南咖啡奶凍,仲有椰汁粟米糯米,樣樣都非常好食,加上可以係荔枝特飲、熱情果梳打 、越式清補涼同越南咖啡選兩杯指定飲品,每人都係百幾,仲要有非常舒適嘅利園入面有舒服嘅環境,點可以唔去。
安南 (利園) 銅鑼灣希慎道33號利園一期4樓

2022年3月13日星期日

鮮入圍煮: 不得不推的花膠雞湯

相信好多人都聽過呢間鼎鼎大名嘅火鍋店,但係你又知唔知而家佢喺尖沙咀都開咗一間新分店?
身處尖沙咀厚福街呢個飲食戰場,火鍋店反而係一個幾新奇嘅選擇,冇晚餐時間,午餐來個花膠雞湯亦都唔會太離譜吧。
呢間餐廳相比旺角店細好多,但係都有個好似行街市咁嘅setting ,風格一致,不過可能疫情關係,今日海鮮都都好少。
兩個人,點了半隻花膠雞湯,小的大約$288,淨係飲過湯食雞同花膠都值得。
湯夠甜夠熱,雞味濃郁,花膠數量很多,雞肉非常之嫩滑,飲到差唔多飲晒都未捨得開始打邊爐。
加豬骨湯開始食正餐都半飽,先來個牛骨汁濃湯牛丸,淡淡爆汁,正。
當然有醬料,一位$15,平唔平見人見致。
點一些新鮮蔬菜,皇帝菜同新鮮淮山,不能不推,唔算貴,質素足。
爽口花膠鮮肉雲吞,呢個真心唔得,好少覺得雲吞完全唔好食。
尾聲加個稻庭手打烏冬,成件事就好完美了。
午餐來火鍋,包場咁滯,真係要支持下飲食業,再唔係叫外賣都可以,成餐飯見到不斷有好多人叫外賣,喺疫情底下亦都不失係一個好嘅選擇。
鮮入圍煮花膠雞海鮮火鍋 尖沙咀厚福街8號H8 8樓

海三碗:傳說要排兩小時的一碗麵

呢間海三碗,只賣三碗麵,一款漢堡,算係飲食界出名,但據聞普遍最紅之時間,至少排一個鐘。
而家疫情當然就冇咁誇張,但之前去過見到有條隊,要排唔夠膽亂黎。因為餐廳只得六個位置,同埋據說老闆慢工出細貨,冇得快。
上星期,五點幾黎到,剛好有位,一個人又係食late lunch。


三款麵有,分別係海蝦濃湯,胡椒豬骨濃湯同金華火腿煲雞濃湯伊麵,我點了海蝦濃湯,可惜冇海牛堡,下次再食吧。

5分鐘到就有得食,唔會等好耐,都幾出奇之前點解會要排一個鐘。
上枱一刻,先飲一口湯,的確好似之前聽過啲人所形容,好似有好幾千隻蝦嘅感覺衝入你味蕾一樣。
伊麵真心唔算好掛湯,但係整體來講,水準不俗。
試下個牛,加上蔥花,蝦米同牛嘅油脂,的確幾香幾精彩,牛質素認真不錯,我估海牛堡應該不錯。
外帶回家俾屋企人試下,胡椒豬骨濃湯同樣精彩,唔係好辣,胡椒味唔係激重,同伊麵反而好似夾少少,但外賣用左時間,可能有分別,下次有機會堂食,再試真d。
個人覺得唔錯,老闆係幾有心機做的,但要等位等半個小時,真係唔好啦,除非,你熱愛排隊。
聽老闆講,疫情少人左,而且外賣會到八點,有興趣嘅呢排可以而家試吓。
海 三碗麵 尖沙咀金巴利街1D-1L號地舖