2021年1月28日星期四

權八居酒屋: 下午茶巡禮

差不多個多月無堂食,食肆為自救,大家都進攻外賣或者afternoon tea/early dinner 嘅戰場。
上星期介紹完1957 & CO嘅十里洋場盆菜,今日講下佢其一個brand,權八居酒屋,一個精美又抵食嘅下午茶。
冇錯,嚟緊仲有幾個1957 & CO下午茶巡禮可以推介,因為實在係超值抵食之作,唔推都對唔住自己。
星期五嘅晏晝同屋企四個人四點幾食下午茶,碰巧假期,感覺特別休閒,同平時權八居酒屋嘅感覺截然不同,多了一份懶洋洋嘅感覺。
聽朋友推介食呢個下午茶,$388二人份,非常豐富,於是乎午餐都冇特別食得多嘢,集中留肚試下呢度嘅出品。
先來兩杯飲品,咖啡、奶茶、可樂連酒精都可以揀,選了一杯手工啤酒再加一杯清酒,happy Friday就是這樣煉成,平時係老銅,兩杯酒加埋都要百幾蚊。
下午茶分三部曲,先睇第一份。 先上場的日式小食有枝豆、飛魚子蟹肉沙律、三文魚壽司丶吞拿魚壽司丶芝麻炸蝦反卷。
本來想等成個set單影相,但呢度上菜十分井井有條,你食完頭款先會上主菜,咁我就唔客氣啦。
枝豆和蟹肉沙律當然係正常水準,最鍾意嗰舊吞拿魚壽司,超級肥美,反卷嘅炸蝦,乾爽彈牙,雖然不是什麼特別前菜,可能你會覺得冇乜新意,好似好普通,但係你都吃得開心。
, 第二盒嘅鹹點同主菜上場,有炸鮮蟹肉餅,唐揚雞柳、串燒燒雞翼、蒜片豬頸肉、日本番薯、杏鮑菇拼車厘茄燒粟米等等,陣容鼎盛,樣樣有返咁上下水準。
當然先要講串燒,呢個係權八嘅得意之作,次次食串燒都完全冇失望,無論雞翼、豬頸肉,甚至粟米等等,都絕對係平時夜晚晚餐吃到嘅水準。
唐揚雞柳,送酒一流,夜晚你咁樣食絕對唔係咁嘅價錢,就係呢一點已經值回呢個下午茶嘅價錢。
炸鮮蟹肉餅,出奇地好食,不過食完就非常之飽。
尾聲的甜點有椰汁南瓜白玉子丶蜜瓜糯米糍丶芝士蛋糕同是日精選蛋糕,特別喜愛椰汁南瓜白玉子,食到泰國甜品嘅清新風味,不會死甜。
蜜瓜糯米糍同芝士蛋糕都小巧精美,味道當然也不錯,可惜前段食得非常之飽,甜品都已經冇乜位吃了。
不過係咁舒適嘅環境,坐低慢慢食,又點會有壓力,飲多杯都仲得,直到六點,飽暖滿足才回家。
返到屋企飯,都唔使食,大概呢個應該係個多月來不少朋友嘅寫照。


老實講,呢個價錢呢個陣容,睇完唔係唔book呀,食過下午茶又好,early dinner 又好,總之,無得蝕底。


權八居酒屋 銅鑼灣希慎道33號利園一期4樓

2021年1月22日星期五

餃掂:外賣的晚上

在西環朋友家開P,大家提議買外賣,竟然有人大推餃掂。 完全冇諗過中式嘅餃子,竟然會係朋友玩Poker同誰是兇手嘅時候喜歡食嘅東西。
有湯餃有煎餃,隨你喜歡,想吃健康可以,想吃熱氣嘅又可以。 太太點了至尊松茸豬肉餃,加埋個老火湯,絕對係冇得輸嘅作品。
上次同F先生來個食下午茶,當時嘅侍應大推壽喜燒牛肉餃,可以話話喺fusion菜,味道好特別,總帶着一種甜甜嘅豉油香。
我點了韭菜豬肉餃,當然不能錯過,我成日覺得食韭菜類餃子,一定要食煎先至有風味。
上次已經想食四川涼麵,不過最後叫了涼皮,今次終於食到涼麵,像極了深圳街頭吃的風味,只是價錢不像。
水準同我上次喺太子食嘅還是一樣,難得做咗連鎖店都仍然可以保持到一定嘅水平,值得久不久都支持一下。 餃掂手工餃子雲吞專門店 西環士美非路12號文光閣地下C號舖

十里洋場:玫瑰金盆菜

近來吃過一次唔錯的盆菜。 你睇啲六頭鮑魚、花膠、海參同勁大隻嘅所謂小元蹄等二十一種食材,就知道值回票價。
雖然新年期間盆菜價錢比起冬至時期加咗少少,但依然會送返1957 & CO $500飲食禮券俾你,變相減價,同上次一樣價錢。
不過最重要可以追加生炒糯米飯,又係時候訂多次黎食。
十里洋場 銅鑼灣恩平道28號利園二期1樓101號舖 有興趣嘅就係十里洋場,家上海都有得訂,港九新界,一定有間喺附近。 PS 佢送嘅玫瑰金盆菜鍋好鬼靚,而家屋企仲經常用嚟打邊爐。

2021年1月13日星期三

厚福館: 黃埔,你好

黃埔呢個社區基本上你諗得到嘅餐廳都有,唯獨是就係冇港式火鍋店。
因此,知道厚福館係黃埔落腳後,都幾開心,十二月底試業之後,一直想搵機會過來。
終於呢個下午過來黃埔買東西,就來拜訪一下。
成間餐廳嘅裝修都非常精美,同舊分店當然好大分別,係冇晚餐堂食嘅時候,三點幾嘅下午,呢度竟然可以坐到半滿,可見香港人幾鍾意打邊爐。
呢度嘅午餐以一人一鍋為賣點,你可以隨意加上自己喜歡嘅火鍋配料同湯底。
真龍皇出巡,係龍蝦湯湯底,加上半隻活龍蝦,青口,仲有海蜆。
最正嘅仲有詳細說明教你點食。
飲一口湯非常精彩,大部份嘅海鮮味道都唔錯,唯一要投訴嘅係有幾粒蜆都有好多沙。
追加了花膠,汕頭牛丸,封門柳同牛頸脊,以厚福館嘅水準當然係非常出色,價錢唔貴,可以樣樣試少少叫多啲,最適合三心兩意嘅你。
還點了份炸魚皮,小小一份,幾好食又夠脆,不用怕太熱氣。
呢期除咗流行沙嗲牛肉之外,仲有芫荽。相信芫荽迷最興奮嘅係呢度竟然有芫荽麵選擇。
雖然冇令和酒場個湯底咁震撼,但有芫荽麵都叫一班芫荽迷一定要到訪嘅理由。
另外一位點了龍披金甲,呢個其實係芝士黑松露焗青口海蜆配拉麵底,上枱一刻完全係成碟意粉一樣。
加上俾咗個湯底你,你可以照加配料打邊爐同飲湯底。
如果主力想打邊爐可能食呢個會有少少失望。
另外一位叫了海之戀,同樣係海鮮為主,不過海鮮選擇多元化少少,加上姬松茸野菌湯,飲一口,喺呢個冬日天氣,特別暖身。
三個人每人埋單都係$120,叫左好多野食,以黃埔嘅餐廳水準算幾高。
PS 根據香港沙嗲牛肉麵關注組的post介紹,佢哋特別推介左呢度嘅沙嗲湯底,聽講直逼方榮記,LM下次再試試。
厚福館


紅磡必嘉街121號黃埔花園一期(奇妙坊)地層G9號舖