2022年7月23日星期六

bamboo Thai:泰高興的生日飯

以前細個就會成日話俾人知自己生日,人大了相反其實每年好少食生日飯,人大咗,其實都冇乜嘢想慶祝,有人話,其實你好似好少食生日飯,我話係呀因為我覺得冇乜值得慶祝。
不過每年七月,都總會有朋友話食吓飯啦,因為疫情嘅情況,朋友見得就要見,有時都唔知仲有冇下次,想多謝同我食飯嘅朋友,都寫下記錄下。


今晚選擇左bamboo thai,之前曾經非常受歡迎嘅餐廳,一件火山排骨,帶領起全港食大排骨嘅熱潮,C小姐話食,我當然奉陪。


加埋好耐無見嘅W小姐,三個人,都足夠叫好多嘢食。


大蝦米紙卷,點下個泰式辣汁,薄薄嘅米紙卷包著嘅係超爆嘅蝦勁多嘅蔬菜,一口都未必食得哂。

招牌冬蔭公雞翼,係朋友C小姐嘅推薦,完全諗唔到冬陰功同雞翼點解會夾得到,食落去又幾過癮。
黃金蝦餅,又係配辣汁一流,如果你愛熱氣野,一定鐘意佢。
沙嗲雞串燒係C小姐最愛,食泰國野又點可以唔食串燒呢,雞最適合個個食,瞬間就食晒。
叫紅咖哩燒牛肋骨以為係普通嘅菜式,點知佢一整大條牛肋骨上場,好震撼,牛肋骨都啖啖肉,質地不錯,同火山排骨有過之而無不及,點蒜蓉包最好。
鹹肉炒芥蘭,個鹹肉先係精粹,鹹肉將全碟菜都添上了色彩,愛已變了這世界襯衣,鹹肉就似愛,不會弄得太鹹,但剛剛好。
我同W小姐選了我們必食的泰式生蝦刺身,雖不算太大驚喜,不過食泰國野就如儀式,呢個是必需,不是嗎?
火山排骨係呢到嘅signature ,相信好多人都見過,幾年無見,水準還更上一層樓。我相信而家你地見過嘅成品都係抄Bamboo Thai,今次個汁更香更開胃,排骨就算細都好大件,我地三個人都差唔多食唔哂,重點個汁真係靈魂,仲有一定要用手食,佢仲包埋手套,不用手套食真係對唔住舊排骨。
尾聲我都係想吃點澱粉質,越式海鮮檸,湯底唔算強都估到,但蝦肉爽口,檬粉彈牙,無乜錯嘅空間,飽肚叫呢d最適合。
席間,朋友都關心我近況,呢幾年都好多煩野,不過我選擇自己過得好便算了,以前成日乜都話好,人人話我yes man好辛苦,到而家做自己反而人人都擔心,世界就係咁,都係唔好煩,食番啲甜品開心下,第一次食芒果糯米飯係一個生日蛋糕,多謝C小姐的準備,估唔到呢到都有咁特色嘅生日蛋糕,多謝你為我想多一步。
Bamboo Thai (朗豪坊) 旺角亞皆老街8號朗豪坊8樓02-03號舖

2022年6月16日星期四

鵜舞: 進擊的串燒

七年前來的時候,同五個朋友飲到天昏地暗,那個年代,沒有咁多Omakase,居酒屋沒有成行成市,當時住嘅荔枝角無咁多餐廳,鵜舞嘅出現叫呢頭街坊有多個番家鄉的選擇。
多得呢兩年無得飛,食日本野變得係旅行的藉口,想去旅行就食番相應的國家食品,日本菜當然特別多,特別係居酒屋,特別想起去完旅行一班人搵地方飲杯野的日子。
今日來到呢間餐廳,主要因為聽講天婦羅師傅非常不錯,仲要有個新的串燒師傅下田豪馬,呢排特別愛吃串燒,完全唔需要考慮,有人book位當然要去支持。
一坐低就飲杯佢地自家浸的梅酒,講真,都幾認真,浸一年效果,收貨。
上次食咁細膩的蒸蛋係鐵板燒店,呢度同樣做得咁好,前菜係北海道海膽鵝肝日式蒸蛋,滾熱的溫度,蒸蛋的滑順,海膽的濃醇,鵝肝的霸道,全部都組成一首交響曲。
季節刺身有油甘魚腩、帆立貝、金目鯛、大拖羅魚腩同石鯛薄切,全部調味剛好。
博多明太子玉子燒作為前菜,你自然會想起築地的場外市場,同蒸蛋一般,做蛋做得幾出色。
前段當然吃串燒,一口氣點了鹽燒特上牛舌、阿波尾鶏雞翼同燒九州宮崎香腸。
阿波尾鶏雞翼當然最強,個隻香氣同皮脆肉嫩,可以話係近來吃過最好的。
燒九州宮崎香腸,我呢啲愛腸之人,點會唔愛上,近來成日吃到宮崎食材,令人更會想去呢度旅行。
鹽燒特上牛舌味道夠,不過如果一塊厚切燒嘅話,感覺會更佳,吃到juicy的肉汁,感覺更佳。
呢個朴葉味噌燒宮崎和牛都幾令人難忘,我忘記了係邊到見過朴葉,香氣未算四射,但那個宮崎和牛配味噌就真心好正,少見的配搭和香味,味噌的發酵同酒香非常高聯繫,立刻飲杯梅酒,更配合。
北海道喜之次係時令野,當晚經理推薦全因新鮮,味道當然係好正,也忘記了上次幾時食了,但絕對是近來最好一次。
燒厚揚豆腐有兩種,一個係蔥花,一個係薑,鹹魚青菜,各有所愛,我兩樣都支持。
直路食啲飽野,辣呑拿魚腩卷辣辣地反而更開胃,可惜食得太多,唔係我自己可以食一碟。
叫了蒲燒鰻魚釜飯,放上枱面共30分鐘,用盡視覺同味覺嘅效果,煙韌嘅日本米,加上那個迷人的醬汁,肥美的鰻魚,完全不能抗拒。
一場嚟到點可以唔食天婦羅,天婦羅丼飯有唔同種類嘅天婦羅俾你食,有蝦,鰻魚,南瓜等等,相對同樣出名嘅串燒,各有千秋,可能我記住四季技勝一籌嘅天婦羅店,但係用價錢黎講,呢度係超級出色嘅天婦羅質素。
尾聲的水信玄餅同雪糕不用多說,送上甜美句號。
因為師傅加盟後,我記得比起前幾年食串燒嘅水準提高咗好多,如果下次再嚟我會希望可以飲下清酒,同friend慢慢食唔同種類嘅雞串燒,係時候約約串燒愛好者吧。
  「鵜舞Umai」 地址: 九龍荔枝角長義街9號D2 PLACE ONE地下2號舖 @umai.HK https://goo.gl/maps/5qiBG4YZfy1sSPvA8

2022年5月9日星期一

點一龍:川味晚上

有睇過我個blog咁上下嘅年資,一定記得我講過川流同雲陽,咁你又點會唔記得陳啟德師傅。
好耐冇見嘅德哥,前一排係鰂魚涌搞咗一個限時Crossover嗜辣晚宴,可惜太遲join唔到,耿耿於懷等咗半年,佢終於再次出場,同點一龍合佢親自監督嘅川味menu。
辣一定要有飲品,呢到有不少台式飲品選擇,也有冰凍的啤酒。
兩個人的晚飯,都叫咗好多個唔同嘅種類,如果你多啲人嚟食,基本上可以掃晒成個Menu,先上場嘅夫妻肺片,最深得我心,因為辣度最強,而且切得薄薄的牛腎,牛肚,令我想起的是之前德哥嘅拿手好戲燈影牛肉。
看到重慶口水雞的紅油已經眼睛發光,雞肉當然夠滑,雞皮同個紅油才是最夾的柏檔,呢一刻我即刻想食碗白飯。
雲片白肉層次最高,吃下去你會食到糖味,原因德哥詳細講左,主力都係因為其辣椒嘅原味令到你食到有少少原材料嘅甜味,而白肉肥瘦各有千秋,看你愛什麼位置,我就全吃就是了。
看歌樂山辣子雞以為會好辣,少年,你錯了。感覺完全唔辣,而且雞皮勁脆,又香口又有少少辣勁,之後我攞咗啲辣椒番去再炒左個意粉,勁正。原來歌樂山係重慶一個地方,google一下後,更想去來個辣味之旅。
一上次就聞到香味嘅水煮牛肉,牛肉唔會太大舊,每口剛剛好食到嘅係牛肉同水煮渾然天成嘅合拍,我同德哥講就係爭薯粉,佢話太飽食唔到野,所以今次決定唔加薯粉,可惜,不過,唔食薯粉應該都可以食到兩碗飯,哈哈。
魚香蝦球係今晚零辣嘅食品,爽口嘅蝦球,甜甜的嘅酸汁,特別開胃,係食咗咁多刺激性嘅食物之下,呢一個菜式絕對可以中和你嘅味蕾。
馳名擔擔麵,那口麵條十分對辦,係我喺雲陽食過之後同樣再吃到嘅同樣美味,就好似見到老朋友一樣。
尾聲又點會唔食紅糖糍粑,小巧一口,同喺川流食過嘅形象唔同,嗰種煙靭,令人一試就愛上。
有興趣嘅,搵多幾個朋友過嚟三五成群試餐牌,不過今晚最開心都係再見到德哥,因為原來除咗呢個menu,佢仲有啲新搞作,有興趣要PM我話你知。
點一龍 (海港城) 尖沙咀廣東道3-27號海港城港威商場地下G103號舖