2015年11月30日星期一

(韓)風再起時 I

有時候,你吃過一次好吃的食物,你會念念不忘,特別係一些潮流的食物,你想想前排那個蒸氣火鍋多麼流行,就如羅生門一樣,你又識我又識,總有懷念過,共嗚過的時刻。

炸雞係另一個今年沒有停過的潮流,朋友約我下星期放大假食tea,佢話有間好野推薦我,睇到條openrice link時,我想起那個星期日的下午,與炸雞的風的初見。



如school food 一樣,其實Goobne chicken 都係來自星星的你,我老媽日睇夜睇的韓劇故鄉,我唔知呢間有幾出名,最記得剛剛school food 係香港好紅而排幾廿條街之時,係濟洲問人有冇分店嘅時候,佢地話其實school food 係韓國普通受歡迎,但在香港卻大放異彩。

有時候事實就係咁奇怪,但吃過school food 幾次的我都覺得點解有呢個情況發生,難道韓國太多好野食?

星期日下午5點,比陳綺貞的三點遲兩個小時,理應係餐廳最少人流之時,但這裡卻人頭湧湧,全部都係型男索女,啲客都係,女嘅唔係熱褲就短裙,你以為落左Mangum,或者係嘉芙或諾士佛臺。

好不容易等了又等半個鐘,等到了。

一坐底就點Gochoo badsasak ,韓式烤雞,係呢度的主角,食過朋友話呢度炸雞好出名又一啲都唔肥,因為以好健康的方式和材料去做炸雞,還有以韓國特有之青陽辣椒享調,一百六十元一大份雞,一碟有八九舊雞,你兩個人真係食到個嘴會覺得好疲累,雞脾全部啖啖美味的雞肉,而雞翼就是惹人憐愛的惹火,你唔會覺得食唔哂,因為加埋酒精的影響我諗食多兩碟炸雞都得。






特別注意係雞皮係炸得唔算太高的油份,青陽辣椒的醬汁和雞皮特別夾得很,特別配合今晚我所叫的啤酒飲品。



Heineken Rita ,睇過名都知係喜力margarita的混合體,當然喜力都係較淡的一種啤酒,當溝埋margarita 就係加易飲醉的一種飲品,而且呢度嘅倒吊直插的飲品都較為大杯,同飲真露和米酒感覺完全不同,大大杯,越飲得多越易醉。



Somersby apple cider Rita 這個選擇應該更加是潮流尖端,但更加女性化的選擇,太淡了,男仔應該冇咁鐘意,不過同樣道理,咁大杯如果飲得多都好易影響神智,可能都會食多幾舊雞,而且外表的確樣子係Somersby apple cider Rita靚少少。

Gol-baring-Yi $180,是我們看到螺筋麵呢個咁古怪嘅名字而想叫的,原來佢係用甜辣醬伴海螺配筋面,海螺多到好似去左海灘咁,那個筋麵非常彈牙,有口感,𡁻下𡁻下個感覺非常得意,不過要特別留意係佢個醬汁非常辣,唔係個個接受,佢嘅辣係除左食個一下之外,係慢慢延續下去,那個辣好過癮,呢種絕對係地道的美食,值得一試。







一路食,基本上人龍冇停過,我成日話餐廳五點幾到六點邊會有人,呢間餐廳打破了我對地球的認知,原來那個韓風熱潮完沒有休息過,可能休息過一下吧,就只有一點的時間,而家佢係旺角開左分店,連我媽媽這個不講潮流的人見到後也要吃炸雞,你說那風再起時有多強勁吧....

Goobne Chicken
尖沙咀赫德道4號The Hart 2樓

What happen in LKF...

星期五,有幾耐未試過happy Friday 飲幾杯。

一班朋友黎到LKF happy hour,我還是在上環工作的時候,都試過下,當回到分行工作後,已不覆再了。

難得今天有人約happy hour ,又難得早收工,久休的我當然要去下啦,七點前的老蘭,沒有人飲到嘔,沒有人腳步浮浮,一切都十分正常,係呢條不知幾多人曾飲醉過的,溝過女,喊過笑過的夜場,想起幾年前和前度分手後逢六日都clubbing的日子,

今晚來到曾未去過的California tower ,Zentral Club係呢度新場,如果你仲停留係那些Level, play, mangum ,仲以為葉朗程會係呢啲場蒲的時候,唔好意思,潮流focus已經係新場了。

識早嘅人會問,點解咁早clubbing ,原來最近逢星期五下午6時至晚上10時,呢間嘢5樓會做happy hour,烈酒,紅酒,白酒,香檳,還有多種其他mocktails及cocktails,都一樣買一送一,做到咁平,絕對係蒲精佳音。



就如今晚,同一班朋友飲酒,認識左一個年青的後生仔,我覺得都幾靚仔,佢都係做銀行,不過私人個隻,仲要係盤房做,意思係同人炒炒炒個啲,佢見我地咁大班人,就撩我地玩,因為happy hour時有呢個玩。

玩之前,叫左杯Basil Lemomade,味道非常清新,cocktail 呢家嘢,多滴少滴味道都會唔同,$80有兩杯,青檸汁,香茅糖漿,泰國青檸,薑汁汽水,不多不少剛剛好,酸酸的好開胃,就如係泰國的感覺。



見到Beer Pong,人人都好開心,呀私人銀行個靚仔不斷叫我地玩,佢係咁叫我地玩,一打一打啤酒咁叫,原來好似葉朗程話,私人銀行啲仔係以銀彈黎溝女。原來做零售同私人個格調真係差好遠....




我朋友都唔差,叫左左Champagne,二千一蚊一支Moët ,飲得好痛快,我還是最喜歡香檳。

見到007的特別版Vodka,勁靚,我都唔記得左飲左幾多,之後去到猜嘅部分,都係跑沙地飲啤酒多。






玩到一半嘅時候,朋友叫左啲嘢食,Iberico Ham $320,18個月西班牙黑毛豬,吃了幾舊,送酒剛好,不過玩很太開心,唔記得影相。

Cold Cut Ham Platter $290,有辣香腸,Italian Ham,法國火腿加厘茄,仲有火箭菜及法式麵包,吃過辣香腸,好惹味,有平時吃意大利餐廳的水準,冇諗過clubbing 的場都會有呢類嘢食。

其實我都冇乜食過嘢,一舊起兩止,我只係記得飲左好多,本身諗住飲一陣,點知由七點飲到十一點到都唔捨得走,私人銀行仔仔和另一位新朋友還想再飲,不過明早要起身,結果去左吃糖水,私人銀行仔仔還和我交換了電話....

第二朝起身,我們沒有再聯絡,本身尋晚好好傾,當酒精清醒過後,原來發生過的可以沒有發生過,我們沒有再聯絡....

也許這就是LKF的魔力吧。

What happen in LKF, just stay in LKF。


Secrets 5F
中環德己立街32號加州大廈5樓

2015年11月27日星期五

鄰家叔叔

記得中學教文學老師教我,人都係有惰性,特別係冇節制的人,可以話係一盤散沙,因為懶洋洋的性格定性了自身成就,你個人有幾勤力,就註定有幾成功,你個人有幾懶惰,就註定難成大器。

我說過我討厭自己的懶惰,當做左三十年人後,我後悔了,為什麼我不用功,為什麼不努力,為什麼不好學,結果而家成為了一個社會不起眼的一員,高不成當然是事實,低得黎都唔係好就。生活習慣都懶,有時候是我的慣性,特別是,我常常都係要幫朋友諗食乜食乜,其實腦汁少啲都會好辛苦,所以自己食飯最好就以簡單為主。

特別係,有時你會想explore下自己屋企附近的食物,呢間日本野,成日都經過,係麻甩的士司機的朝聖地明珍隔離,默默地努力著,如果他們成日都係幫襯食幾十蚊的蒸飯,那麼呢間日本野都幾難定位,至少呢邊客可能會覺得食日本菜還是高消費玩意。

當朋友D話我知,有次食飯識左呢度談笑風生嘅老闆,仲食左好好食的藍龍蝦,還有這裡可以有類似上岸,鮨文之類的omaksase,我立對佢好有興趣,也沒有太多想法,過去試試係乜野質素,試下就在你家樓下或附近吃omakase的感覺。

星期二,當然是人流不多,基本上,如果連旺角尖沙咀都少人的日子,你係人流冇咁旺的餐廳吃飯,絕對有條件坐得好,吃得舒適,如果好彩,還可以和廚師交流下。

這裡的負責人,就叫佢N先生,他不是那種英倫紳士,也沒有那種貴氣,如果住你屋企隔離那個是鄰家女孩,那麼呢個應該係粗獷的大叔,會豪爽地話你知食乜食乜,而且處處流露像爸爸般的霸氣和粗高豪,他不是那些溫柔的壽司師傅,如果你細個識長腿叔叔,而家呢個應該係係鄰家叔叔。

你講一聲,佢會以一個優惠價為您做過土爪灣式的omakase。

好吧,就試下鄰家叔叔的發辦吧,我好懶,寧願省點腦汁。

就像西餐一樣,坐下就有前菜有三款,黒豚荔枝卷,唐揚銀鱈骨和日本紫薯釀花膠,睇樣子就知道叔叔係唔取巧的人,佢無興趣同你將啲野整到好靚,外表不是重點,就如佢同間舖一樣,我較喜歡黒豚荔枝卷,荔枝爆出來的清甜和豚肉相映成趣,唐揚銀鱈骨炸得不算乾身,不過骨較多,唔係個個鐘意。日本紫薯釀花膠係不錯的配搭,新鮮的味道引人入勝,是幾有創意的前菜。

冰菜沙律你吃過沒有,大概很少用冰菜吧,那個爽口不已的感覺,幾有新鮮感。



有常識也知道是渴湯的時候吧,鯛魚湯,我覺得呢個魚湯絕對好足料,平常鯛魚湯會幾腥,一不小心就會處理得唔好,但我覺得呢個剛剛好,平凡得黎有點特別,就如這裡的負責人,你看見呢個叔叔絕對不知道原來佢可以煮得一手好菜,從來不能以貌取人又一實例。





然後就係今晚的主角,刺身併盤,而其實我地今晚黎就係為左藍龍蝦,其餘配角都唔餅北海道帶子,韓國象拔蚌,梛威三文魚,日本油甘魚,阿根廷劍魚,剩係個樣子已經令你驚嘆了吧。藍龍蝦刺身絕對係極品,你一定會喜歡的甜美,其蝦膏都特別過人。







日本油甘魚厚切上,肥美又濃味



三文魚就較為普通北海道帶子象拔蚌是絕對新鮮的彈牙,阿根廷劍魚的魚味深得我心,全部和藍龍蝦做成了幅美麗的刺身圖。






芝麻雞翼,呢個唔係度度都可以整得好食,自從吃完名古屋最好吃的炸雞翼後,對呢個手羽先有個新的解釋,乾身冇乜油但所有味道全濃縮左係小小的雞翼裡面,你就知道如何分辨到好吃的了,芝麻唔係就咁係上面,而係黏著係雞翼上面,簡單的手就造就了美味,鄰家叔叔也不是省油的燈。






鹽燒香魚,呢個魚個樣係非常非常地道,係日本家鄉的地道,如果你係那些中環由日本人主理的餐廳就可能會見到這種樣子呈現的香魚,我覺得好有風味,是那些日本小店的感覺,香魚的魚皮燒得好香脆,雖然魚細細條,但好好肉,也是令我驚喜的一個菜之一。





和風油甘魚魚骹,焗廿分鐘的油甘魚魚骹以汁燒過後,啖啖也是肥美,特別係其魚肉唔係一般的滑,魚骹的關係,係啖啖如吃面珠的滑般,不過都係有點腥,和風汁再煮久一點更好。




澳洲草飼和牛T骨,沒有吃肉的牛係乜野味,我想大概也會健康一點吧,和牛煎得剛剛好,是那種五成的分界線,是幼嫩的粉紅色,令你會衰十一的那種天真無邪的幼嫩,難想像牛可以這麼的可愛,我不夠膽說係鄰家叔叔煮得非常的好,我知道那件牛必定是非常好的質素就是了。





最後上場係以藍龍蝦刺身外的頭尾用來做呢一個粥,美味鮮甜綿綿的粥底,還有什麼投訴。



\




長腿叔叔你好嗎?我不知道你好好,但鄰家叔叔的發辦卻是近乎八十分的好,以一個平絕的價錢就吃到一些精品,你也值得來到土瓜灣探下鄰家叔叔吧。

楓.新日本料理 Maple Japanese Restaurant
土瓜灣落山道1A號地下

2015年11月25日星期三

中國人飲宴的藝術

十一月係去飲的月份,今個月我被炸了四次,基本上除了一次朋友的老公係外國人的原因外而吃的是西餐,基本上全都是typical 的基本飲宴,還要是酒店或酒樓般的飲宴。

其實,這類一圍圍的酒宴,我們也不知吃了幾多次,多朋友結婚的真是食到悶,如果一班朋友去食你又試過未呢?

前陣子見個個係度食蟹粉吃得不亦樂乎,我明白為什麼朋友會選擇在這裡吃個晚飯。

為什麼會記下今晚的經歷,因為今晚真係幾特別,一來好少一班朋友會以咁樣形式食飯,仲要朋友手寫左菜單,呢個經驗我真係從未有過,以Non-婚姻黎講可以話係第一次。

是日晚飯地點,就係天后地鐵站一分鐘唔駛就到嘅御名軒。

可能我真係收帖收到怕,有時候食朋友的婚姻技癢想寫篇婚禮的祝福,不過我覺得好似唔係幾好,所以都係寫下這餐晚飯分析下中國人飲宴的藝術

1.燒味四部曲

一係食燒豬第一擊,一係食燒味併盤,通常飲宴會播林海峰的經典,或者係麥嘜最靚嘅豬腩肉, 今晚沒有燒豬,吃的是雜錦貨色,你要乜就有乜。海哲,油雞,叉燒等,是人人小時候吃過的選擇吧,沒有什麼好不好,呢啲就如開會的business as usual ,是必備的選擇吧。






2. (炸)海鮮(卷)

喜歡海鮮的我一直也認為應該唔好食咁多炸野,通常吃要一舊炸海鮮卷就會好飽,今晚我們沒有這類菜式,反而叫了個蒜蓉粉絲蒸扇貝,這道菜剛剛蒸得好,粉絲吸盡扇貝和豉油的精華,好食,估唔到呢類酒樓也煮得不錯。






3. 有西芹的菜式

對,你有冇留意去飲一定有得食西芹,係廚房冇新意太懶嗎?唔夠膽講,但奇怪每次飲都有人唔食西芹,然後就有好多剩係枱面,然後帶子,珊瑚蚌等就會好快沽清,今晚的西芹的菜式唔錯,冇乜油,配菜蝦球雙蚌都不錯,這個西芹蝦球雙蚌絕對係有質素。




4.雞(蝦)

正常一定有雞食,仲要係炸子雞之類,唔好意思,我們都係海鮮愛好者又少吃肉,唔叫雞,我們叫了茄汁海虎蝦,大大隻的虎蝦煎得好,爽口而茄汁味滲透進入蝦肉,有點不錯驚喜。






5.翅

我做不了那些走翅的推動者,我自己係幾喜歡食翅的一個人,當然,明白到應該食少啲就係應該少啲,相反,有少以素翅去呈現或滿足我對吃翅的喜好也未嘗不是好事,就是你俾十八座的火鴨翅我一樣吃得高興。喜歡這裡的翅較為"杰"身,每淡都好實在,有時候淡得不喜歡落醋的我也要落去調味,但呢度完全唔駛。





6.菜

點可以沒有菜呢,每個飲宴都可能會有那些菜係雞前或後俾你有助消化,今晚沒有什麼魔術,就是給了吃最簡單的,有時候,呢類款式反而最受歡迎。



7,蒸海魚

又係飲宴的一個必吃之項目,魚呢樣野,貴有貴食,平有平食,呢條班仔可以說蒸得剛好,完全唔老,魚肉鮮甜,配合蒸魚豉油絕對係中國人的豐富飲食智慧之展現。不過,曾經在酒店飲食蒸魚食到火都黎,肉又老,又太過鹹,豉油就好像將魚浸死一般地鹹,你真係會好後悔要俾咁錢人情,原因係點解朋友會信錯酒店的師傅.....



8.飯和同炒麵

兩者之間,你會選擇什麼,通常我都會選擇食炒飯,朋友和我一樣,當真是心理學皇者,他也就選了呢個炒飯,藝術係,去飲通常要食到飽,如果俾成千蚊仲要去宵夜,咁樣除左自己心情唔好之外,也令主人家尷尬,咁又何免呢,食飯就最隱陣。呢度炒飯也算每粒彈牙,味道不錯而且大大碟,係香港區以一個較平的價錢有咁大碟嘅單尾飯絕對係好抵食。




不過有時候,我會連伊麵都食埋,可惜今晚女仔多,食唔到炒麵。

9.楊枝甘露,呢個算係少的選擇,相信冇乜去飲會見過,呢度楊枝甘露質素唔錯,當然沒有好像那次在唐閣小聚咁好食,起碼人地系出名門,係那些勁都不得了的師傅的手法強勢,咁樣屈機唔係幾好,呢個都算完美了今晚的晚飯經驗。




10,生果

今晚吃的生果,不是你一個個攞得走的橙,反而是一碟碟的切好又擺得漂亮的生果。

如果你發現近來的你來同我都係飲左好多餐,除了荷包有啲痛,有時候也可以是高興的,至少朋友開心的大日子,我們也要替他們高興,每次我又好喜歡睇個餐單食乜,好唔好食,有時候也看出主人家的心思,餐廳的好壞,中國人飲宴的藝術絕對係唔簡單,有時候食飯以呢個形式叫野都唔錯,起碼不用想太多,畢竟腦汁也是最珍貴的成本吧。


御名軒 Royal Legend
天后電氣道22-52號金殿大廈1樓