酒店我被韓風吹

你知道，酒店餐廳，全部都係與酒店掛上關係，好多酒店，佢地食嘅都係摘星的保證，而大部分出名的餐廳，唔係中菜就係日本菜或西菜，你好少會吃到其他的類型。

上次吃過casa Pennington 的海鮮晚餐，質素高而且唔貴，非常令人有好感，朋友D講開，呢間酒店有間韓式餐廳，價錢以酒店定價來講非常抵食，而且辣炆牛肋骨係香港食過數一數二。

當人一聽到數一數二，你就自然被好奇心驅使的情況下睇下究竟葫蘆裡有乜野藥買，特別係韓風依舊強勁的情況下，為什麼酒店咁有先見之明會開韓式美食店呢，一於試下有幾特別，同埋睇下朋友D所說的準確性。

星期三晚上到黎，人不多，原來呢度仲可以食燒肉，基本上係好典型的家庭型店，更有韓國Oppa註場，睇個勢，就算錯亦不會係超錯，至少唔係梨乜梨乜的任食韓燒層次。

叫杯飲品先，這裡有各式不同的飲品，我叫了紅醋汽水和青檸檬汽水，味道幾特別，酸酸甜甜，配搭好少係香港嘅韓式店見到。

韓式四小碟，有泡菜芽菜翠玉瓜和薯仔，我最喜歡係泡菜同芽菜，基本上試埋呢個都知道佢嘅質素絕對唔簡單，至少泡菜的辣和芽菜簡單的美已經告訴你他們絕對不是韓風而開的吸金店，而係真心為你係酒店裡提供第一間以韓式風格為主的有心人。

餐單中有一個好特別的炸紫菜，如果你好喜歡好喜歡好喜歡好喜歡好喜歡好鹹好鹹好鹹好鹹好鹹的紫菜，你叫啦。我真係唔識欣賞呢個炸紫菜，一口鹹勁，絕對唔係人人受得到，我想加點飯或湯我覺得可能會好一點。

辣炆牛肋骨，朋友D告訴我這是好好味好好味的選擇，的確，牛肋骨非常大條，每啖吃下去也是軟綿綿又淋又鬆軟的牛肋骨肉，而其辣味野性又帶牛的強勁味道，還有那些大大舊，全部都吸收了牛肉帶給大家的牛的野性味道，我忍唔住叫碗白飯去佐呢個汁同牛肋骨，非常精彩，不枉我尊乘來到。

人蔘雞湯係另一必點之選，一放上枱已經有陣陣的香味，就正如今晚追韓風一樣，空氣中傳播和散佈的都是人蔘雞的味道，雞非常大隻，又滑又鮮甜，裡面的餡料一向不是我杯茶，但湯頭和雞卻叫人欲罷不能。

韓式炒粉絲，點可以少得呢個必點的項目，唔會好似外間炒得又油又濕，乾身的炒粉絲絕對係像在韓國吃到的地道味一樣，好此道者絕對要試下。

小試牛刀的二人晚餐，試左最基本的韓國菜，粉絲人蔘雞牛肋骨全部合格，呢個韓風絕對係吹得有力度，下次叫多啲朋友可以試下燒肉等質素如何，相信，那韓風一定會吹得更勁更狠。

如果你喜歡酒店餐廳，又希望可以吃到韓式風味，我想大概你可以有個新選擇了。

首爾家韓國料理 Seoul House

銅鑼灣邊寧頓街13-15號隆堡柏寧頓酒店1樓