如果你熱愛電影,你應該知道香港電影最強勁的年代, 基本上什麼電影都有人拍, 一套周星馳的西遊記係個個年代可以收五千萬的票房,你要知道, 果陣冇3d,IMAX 嘅票價撐住,可想而知,那個時代,要幾輝煌,有幾輝煌。
七福神呢個名字,我想起的正是那個年代,好似那些什麼賀歲片, 運財童子,家有囍事,恭喜發財等電影的朋友。
當然,知道七福神點解,它們就是日本人的吉祥物, 相信去過日本或對日本有基本認識的人都會知道, 然我想起的不是那個日本保你乜乜乜乜的神, 而係那個美好的香港電影年代。
那個年代的電影,全部好有質素,人人都覺得睇香港電影係正路的, 因為那是茶餘飯後的話題,最重要大件夾抵食,一張飛幾十蚊, 睇得好開心,呢間七福神就包括了以上的元素,你想像不到, 佐敦的街頭,竟然有間這樣的餐廳。
兩個人的晚餐,在放工後睇戲前的晚飯,其實都沒有胃口吃太多, 當然,見到餐牌基本上應有盡有,而價錢又特平, 你就會自然想叫多一點,今晚,我就做一個放縱的男孩, 有乜食乜啦。
刺身拼盤當然是要選擇的。八品刺身盛合,老實說,好過份, 我覺得唔知有冇搞錯,是買到八十年代的價嗎?三文魚,呑拿魚, 帶子,墨魚,海膽,油甘魚,呑拿魚,北寄貝, 咁多刺身都係二百幾,最好當然是一細板的海膽, 講真係超市買都有可能貴過佢,仲要呑拿魚肥美,甜蝦大隻又新鮮, 帶子厚身,油甘魚魚油爆燈,北寄貝和墨魚相對平凡, 最重驚你唔飽,有紫菜和飯,擺得靚靚也是這個價, 我以為回到了八十年代,那個美好的年代。
飲杯芒果活乳酸,味道不錯,乳酸味一流, 也不是那些稀得可憐的甜品,朋友叫的熱檸檬菊花蜜, 也是如茶餐廳價一樣咁平。
清酒煮海蜆,呢個係今晚的最大亮點, 清酒味係火力強勁的煮法把海蜆都煮熟, 每粒海蜆都充滿了強烈的清酒味,好鮮甜,好肥美, 好味得我差不到把酒都飲完。
神戶野菜炒,呢個又係大件夾抵食,冇期望,冇失望,但說真, 環球經濟唔好,渣打栽員,中國唔知可唔可以保七,歐洲繼續印錢, 講真,點會有運行,食平嘢,習慣慳錢生活吧,誰知聽日發生乜事。
最後的石鍋湯豆腐,也是窮撚如我之選, 有湯有豆腐有牛肉有菜乜都有,就如一起走過的日子, 有你有我有情有生有死有義,的確, 呢度每一樣食物都令我想起那個美好的八九十年代,那個簡單, 香港經濟起飛的年代.......
積谷防飢吧,這些小店又平又靚,好一餐唔好一餐, 食下呢啲小店都幾開心,從前的香港人吃不到那麼好, 我們好像遺忘了那時代的艱辛,我們都要學習節儉, 為未來作最好的打算。
七福神,請保佑香港,希望我們可以回到那個美好的八九十年代。
七福神和食亭
佐敦彌敦道311-313號1樓
沒有留言:
發佈留言