2020年1月13日星期一

金所: 大角咀的白布烏冬


好多人以為飲食博客有得周圍食又唔駛錢,一定係理想生活。

其實喜歡食又點會唔自己做功課去搵食,同埋,你估間間餐廳都要邀請人去食咩?

Meter Chen,你可能唔識佢,但我相信佢一系列的餐廳你一定會去過,由西九龍沾麵到二郎系拉麵,再到宗像屋,然後steak House和宗像牛肉飯,一個個飲食潮流,而且質素高又唔貴。

今次又有新搞作,我都是第一次寫關係佢的餐廳,但我覺得太特別,無辦法唔寫下。

主角是日本烏冬,但不是到處都有的烏冬,可能你話烏冬有乜特別,這個來自群馬縣的出品,同秋田縣的稻庭烏冬,仲有香川縣的讚岐烏龍被列為日本的三大烏冬。

而係群馬縣的烏冬中,有一間「藤屋」,非常有名,台北唔少博客都寫過,反而香港人就唔多認識,藤屋就是以非常闊身的烏冬麵來造招牌,就好似一塊白布咁,好老實,喺香港應該從未見過。


多得Meter Chen ,我們有幸在香港可以食到這個烏冬,看過佢嘅ÌG就知道佢研發呢個烏冬用咗唔少時間心機同團隊嘅努力,才有成果。

當我從素顏天使 blog知道他有soft opening 之後,第二晚二話不說即刻飛車去大角咀食,因為我知道當個個都知的時候,即刻佢又會變成人氣店,排到排到傻。

去到呢條街,望到非常入型入格嘅門口就知道一定係金所,夜晚去可能會行過都唔覺,因為太黑。


幸好當晚去到,人不多,非常幸運。

餐廳非常簡單有三個選擇分別係熱湯烏冬,沾麵同冷烏冬,配上不同的味道,魚鴨肉、雞肉、梅子、天婦羅和山藥等等。


最重要呢度嘅價錢真係一啲都唔貴,最貴嘅都只不過係$115,佛心價又太誇張,不過性價比絕對高。

今晚來餐廳之前吃了些下午茶,因此不太肚餓,於是簡單叫兩個便算,叫了最愛的冷汁山藥白布烏冬,太太叫了雞肉入沾白布烏冬。



烏冬上場,影相呃like絕對一流。

先講冷汁山藥白布烏冬,素顏天使 blog話呢個最正,而我本身都好喜愛山藥,於是一定叫呢個。


山藥的份量唔多,如果加上白布烏冬係冇乜味,不過第一下係白布烏冬的感覺認真特別,煙韌嘅感覺應該比稻庭烏冬多10倍。


不過山藥加上豉油Wasabi和蔥之後,成件事唔同左,烏冬完全係如虎添翼, 豉油、Wasabi、蔥和山藥配上就如一段平凡的樂章以交響樂的形式在你口中奏起來,層次起伏多變,震動人心。



由於烏冬太煙韌,而且口感多元化,你更加要慢慢細緻品嚐。

雞肉入沾白布烏冬,同沾麵一樣附上一碗湯,聽這裏的員工講,陳生的理念係希望客人可以飲呢個沾麵湯,所以冇平時嘅沾麵湯咁濃,亦都唔使特別加湯就可以飲。




飲一口湯底,非常濃郁,而且大蔥同雞肉嘅香味俱全,員工建議加上七味粉更正,愛濃味更佳。

不過白布烏冬配熱湯更佳,吸盡湯嘅精華。



個人覺得呢個烏冬同泰國嘅闊河粉好相似。


八塊烏冬,瞬間就被消化,雖然很飽,但在熱湯的配合下都好快食完。

相信如果今晚冇咁飽嘅話絕對可以試到熱湯烏冬,唯獨熱湯未試到。

不過如果唔夠嘅話都可以加剩烏冬。


睇到呢到,有興趣嗎?有就要過黎啦。



第二晚晚上,從Meter Chen IG 得知,試業當中嘅金所下午烏冬已售完。

唔想正式開始要排大隊,快點來試下。


金所 
Tel:3689 8807
大角咀利得街52號地下





沒有留言:

發佈留言