朗豪夜市：吃在第一發TG時

鼠年新一年，第一篇一定要寫下應節野。

今年的農曆新年，大概是同傳統最大分別嘅一年。

沒有什麼煙花，花車巡遊，公眾活動改得就改，街上開始多嘅係戴口罩嘅人，應該係最冇氣氛嘅一年，雙管齊下，政府嘅管治能力認真強。

今年花市已經改得夠精彩，應運而生嘅係新式和你宵舉行，香港係我地管治能力特別佳嘅政府真係變得越嚟越唔同。

不過幸好，年三十晚看到面書上面都有個好消息，朗豪坊嘅夜市依然繼續。

四年前的魚蛋革命事件之後，基本上新春期間，每年都會過來食下野，也成了自己的新春傳統。

睇報紙話，有檔主話今年嘅生意不跌反升，我自己就有點保留，因為首先擺檔嘅檔口係歷年最少。

其次係短短的一條夜市街裏面，當你見到無數咁多次防暴，你都真係會冇乜胃口食嘢。

算啦都唔理，同大家睇吓有咩好食。

我今年應該係最多外藉人士擺檔嘅一年，可能社會運動關係呢邊嘅檔口特別多人幫襯，幫襯左其中一間$10一隻雞脾，配合了獨有的巴基斯坦白色酸酸醬汁，好味。

我知道，千年油好唔衛生，但係一年一次你先至會見到呢啲白色嘅炸魚蛋，每年吃一次啦，往年喺朗豪坊嘅檔口都麻麻哋好食（最好食一定係黃大仙嗰邊嘅夜市），不過今年呢間炸魚蛋做得不錯 ，我都唔記得咗係咪同之前一樣，但係吃完值得推介。

年年都一定要幫襯愛護流浪貓嘅我要辣魚蛋，又係社會運動嘅關係，呢個辣魚蛋今年直頭要排隊，最後選擇捐錢唔食辣魚蛋。

如果你有機會又想排隊，一定不能錯過呢度嘅麻辣好惹味好香口。

令我覺得生意差咗嘅原因，係呢度嘅價錢部份都平左（往年好似都要$15到$20），特別係臭豆腐， $10一件品質尚算優良，又係引來不少人排隊。

今年仲有不少懷舊小食例如飛機欖、龍鬚糖和糖蔥餅。

當然仲有經典嘅雞蛋仔同夾餅，不過品質好像良莠不齊。

相反唔算太多港式經典小食，我行咗成條街都見不到有人買燒賣，凍生腸個類，淨係見到有人買傳統嘅魚蛋。

串燒就好多，肉肉肉，全部都係肉。

唔知係我發雞盲定乜嘢，平時我鍾意食生菜魚肉碗仔翅，今年一檔都見不到。

不過好彩仲有經典嘅豬大腸，可惜無人問津，唔使點排就食得。

冇左之前見過嘅土耳其咖啡，亦都見到好多去年的海鮮檔，相反都有好多新面孔出現。

例如有來自偉大祖國嘅汕頭牛丸，好彩冇武漢嘢食。

吃完炸魚旦和臭豆腐，都覺得今年有點失色，正想離開，突然有人大叫光復香港時代革命嘅口號，然後就發了第一下TG同大家賀新年。

新年快樂，咁樣過年，真係應節。

希望初二到初四，你哋可以安心係夜市行下食下野，同祝大家可以遠離TG啦。