2021年2月23日星期二

金鶴拉麵: 軟殼蟹香辣拉麵

講起金鶴拉麵,大家都一定會諗起雞白湯拉麵。
今次再來的原因,卻並非一如你所想,又吃雞白湯,因為有座銀在前,未必做到最好,再來這分店,為的是這碗酥炸軟殼蟹香辣拉麵。
除咗呢個新拉麵,見到新推薦仲有綠茶雞湯拉麵。同樣是新嘗試,可惜,我地為左軟殼蟹以來,目標正確,下次先食綠茶。 和朋友來到自然可以分甘同味,當然要叫多一下餃子試試。
感覺不錯,美味得來不會太過熱氣,有點大阪王將feel。
我哋叫咗一人一碗軟殼蟹拉麵,朋友大食,話一定要叫兩隻,點知上場嚇親。
見到咁大隻軟殼蟹,自然非常吸晴。 同個名一樣,非常酥軟,香口又夠野味,絕對像大型居酒屋般做得非常對辦。
另外附上一條腩肉,經燒過後,又係香氣撲鼻,肥脂嘅部位更加係非常吸引,好食到就算肥都唔驚,成條入哂口。 麵條可接受,不過最重要係佢個香辣湯底,冬天食就最啱,整碗湯,一滴也飲完。
唯一不好嘅就係麵條唔夠掛湯,有美中不足之處。
整體來講,我覺得金鶴拉麵感覺唔錯,上次叫外賣水準都係仲爭少少,但試過堂食之後,至少感覺不差,說係城最好嘅拉麵,當然太過誇張,但來吃過簡單午餐就絕對不會失望,至少係中上水準。
金鶴拉麵 (和富道) 北角和富道6號嘉洋大廈地下A舖

2021年2月20日星期六

蛇王易:welcome back

去年蛇王二關門的消息,令不少粉絲傷心得很,為左朝聖,曾經晚飯時間要排兩個小時才能上到尾班車。
差不多一年過去,想不到有些東西能夠失以復得,原班人馬係灣仔開左蛇王易。
想不到為什麼名字同音但轉左字,但我send呢幅相俾朋友,佢就立刻知道係蛇王二嘅出品。
新店就係vtc附近,食唔飽附近也有元朗合隆。
老實講,味道同成個setting都完全一樣。
這個晚上,一個人獨自來到吃晚餐,最好係叫個蛇羹套餐,捉緊冬天的尾巴。
記得之前蛇王二人情味一流,呢度還是同樣感覺。
臘味飯的膶腸同臘腸,同樣精美,可惜,當晚糯米飯已經沽清,下次再吃。
蛇羹當然精彩,加上薄荷葉和脆脆,份量還是咁勁。
加一碟油菜,均衡飲食,來個清清地尾聲。
我已忘記了當時阿二的價錢,但聽講呢度減左租,得益者當然係消費者,而家只是$110一個餐,算係幾超值。
最少,蛇王二的味道,還可以承傳下去,welcome back 。
蛇王易 灣仔灣仔道218-220B號利昌大廈地下4號舖

2021年2月3日星期三

十里洋場:下午茶巡禮 2

如果近來你Facebook 被W酒店嘅靚靚蒸籠下午茶洗版,忍唔住想試下靚靚中式下午茶,打下卡,呢到有個更好嘅提議。 呢一個下午茶set,雖然無魚子醬呢啲名貴菜式,但係味道來講,好食好多,性價比仲要好高。 無錯,又係1957 & Co嘅十里洋場,唔好話我悶,只係以呢個價錢,呢個地段,高質得很。
話說呢個咁靚嘅下午茶兩位用都係$338,有點心,麵食,仲有乳鴿,加上滋潤飲品,靚到不得了,食得好飽又好滿足,有興趣知?就一齊睇下有乜咁好。 先有淮揚小品,小吃有陳醋海蜇頭、水晶肴肉、金絲小排骨、黃瓜、四喜烤麩同黑松露珍珠溏心蛋。
個人最愛海蜇頭同烤麩,次次都食到停不到口。
黑松露珍珠溏心蛋,永遠都係咁正,嗰個溏心,見到都心花怒放。
吃過十里都知,呢度嘅上海野十分精彩,特別係前菜方面嘅淮揚小品,絕對適合做下午茶。
每人有各兩件精緻點心,金牌生箭包、帶子鳳眼餃、鮑魚火腿酥同黑金流沙包。
樣樣都好睇好食,當中流沙包不能錯過,早食早享受,凍左就無流心。
帶子鳳眼餃同鮑魚火腿酥好impressive,最緊要好精美得體。
最搶鏡的脆皮煙BB鴿,每位有半隻,熱辣辣食最正,我錯過了最佳狀態,但味道還是可以的。
湯麵任選兩碗,嫩雞煨麵同雪菜筍絲肉絲湯麵,雪菜筍絲肉絲湯麵出色到一個點,想自己叫多一碗食。
飲品有四款選擇,楊枝甘露,菊花蜜桃柚子蜜,紅棗圓肉杞子茶同麥米薏米檸檬水,每一杯都好適合冬天,滋潤一下。
1957 & Co基本上間間都有震撼下午茶優惠,呢個只係其中一個,stay tuned,我再有貨,今個星期尾,再介紹你。 十里洋場 銅鑼灣恩平道28號利園二期1樓101號舖

2021年1月28日星期四

權八居酒屋: 下午茶巡禮

差不多個多月無堂食,食肆為自救,大家都進攻外賣或者afternoon tea/early dinner 嘅戰場。
上星期介紹完1957 & CO嘅十里洋場盆菜,今日講下佢其一個brand,權八居酒屋,一個精美又抵食嘅下午茶。
冇錯,嚟緊仲有幾個1957 & CO下午茶巡禮可以推介,因為實在係超值抵食之作,唔推都對唔住自己。
星期五嘅晏晝同屋企四個人四點幾食下午茶,碰巧假期,感覺特別休閒,同平時權八居酒屋嘅感覺截然不同,多了一份懶洋洋嘅感覺。
聽朋友推介食呢個下午茶,$388二人份,非常豐富,於是乎午餐都冇特別食得多嘢,集中留肚試下呢度嘅出品。
先來兩杯飲品,咖啡、奶茶、可樂連酒精都可以揀,選了一杯手工啤酒再加一杯清酒,happy Friday就是這樣煉成,平時係老銅,兩杯酒加埋都要百幾蚊。
下午茶分三部曲,先睇第一份。 先上場的日式小食有枝豆、飛魚子蟹肉沙律、三文魚壽司丶吞拿魚壽司丶芝麻炸蝦反卷。
本來想等成個set單影相,但呢度上菜十分井井有條,你食完頭款先會上主菜,咁我就唔客氣啦。
枝豆和蟹肉沙律當然係正常水準,最鍾意嗰舊吞拿魚壽司,超級肥美,反卷嘅炸蝦,乾爽彈牙,雖然不是什麼特別前菜,可能你會覺得冇乜新意,好似好普通,但係你都吃得開心。
, 第二盒嘅鹹點同主菜上場,有炸鮮蟹肉餅,唐揚雞柳、串燒燒雞翼、蒜片豬頸肉、日本番薯、杏鮑菇拼車厘茄燒粟米等等,陣容鼎盛,樣樣有返咁上下水準。
當然先要講串燒,呢個係權八嘅得意之作,次次食串燒都完全冇失望,無論雞翼、豬頸肉,甚至粟米等等,都絕對係平時夜晚晚餐吃到嘅水準。
唐揚雞柳,送酒一流,夜晚你咁樣食絕對唔係咁嘅價錢,就係呢一點已經值回呢個下午茶嘅價錢。
炸鮮蟹肉餅,出奇地好食,不過食完就非常之飽。
尾聲的甜點有椰汁南瓜白玉子丶蜜瓜糯米糍丶芝士蛋糕同是日精選蛋糕,特別喜愛椰汁南瓜白玉子,食到泰國甜品嘅清新風味,不會死甜。
蜜瓜糯米糍同芝士蛋糕都小巧精美,味道當然也不錯,可惜前段食得非常之飽,甜品都已經冇乜位吃了。
不過係咁舒適嘅環境,坐低慢慢食,又點會有壓力,飲多杯都仲得,直到六點,飽暖滿足才回家。
返到屋企飯,都唔使食,大概呢個應該係個多月來不少朋友嘅寫照。


老實講,呢個價錢呢個陣容,睇完唔係唔book呀,食過下午茶又好,early dinner 又好,總之,無得蝕底。


權八居酒屋 銅鑼灣希慎道33號利園一期4樓