鼎爺私房菜：味覺視覺聽覺盛宴

幾年前，係銅鑼灣試過嘅私房菜，嗰個年代一位千幾蚊嘅私房菜令市場好震撼，人人都話佢定位貴而質素又唔高，那次自己俾錢食嘅經驗就係感覺還好，但係一啲都唔深刻。

鼎爺當晚都在，但係只係影咗一幅相同講解佢個名菜乞兒雞點整。而其他菜式，唔係話唔好，但係你問我可唔可以有返印象講下餐飯，我又真係冇乜。

搬咗舖之後，有幾個朋友都讚不絕口，特別係佢嘅佛跳牆，人人都話非吃不可，比起皇仁舊生會好十條街，呢個Compliment 係我其中一個朋友講嘅。

我未試過，當日寫菜嘅冇準備佛跳牆，唯有下次吃，所以無可奉告，不過今晚食嘅都的確比起上一次印象鮮明得多。

先來的鼎爺精選前菜，基本上吃的都是手工的菜式，春花卷，龍穿鳳翼，秘製話梅蝦 ，泡椒蓮藕，樣樣都好，我不是阿爺，不用班門弄斧同你講點整，講下食完有乜感受。

鼎爺嘅爸爸係順德大良人，雞卷似乎係屋企人人可以識做嘅嘢，今次認識原來春花卷係因為以前重男興女時，男人先可以食處理方法多好多重的野雞卷，而春花卷就係簡單版。

秘製話梅蝦同泡椒蓮藕相對地比較straight forward，無乜難題，但又感覺唔錯。

龍穿鳳翼其實就係將甘筍、西芹、金華火腿等釀入雞翼入面，我自己個人都幾鍾意呢個。

古法豬網油炸松葉蟹鉗，我諗好多人都未試過咁樣食過蟹鉗，鼎爺話切一半，一半點汁食，一半唔點，就咁食蟹嘅原味當然食到新鮮感，但加了醋之後，那個複雜嘅鮮味仲勁好多，當晚我哋仲試咗芥末點，原來佢自己親手將芥菜子磨成芥末，同一個食物同出邊對比，細心得多。

鼎爺的原個椰皇燉嫩雞湯，聽鼎爺講有好多故仔關於佢，清新甜美嘅滑雞湯，原來好多人為左佢都可以好瘋狂，下次親口告你知。

魚香茄子燴杉斑出場個樣氣勢如虹，魚香茄子用嚟送飯一流，而且肉質非常鮮嫩，杉斑好少見到，個味道同肉都幾特別，再加上用呢一個方法，魚肉更加出味，更好送飯。

紫氣東來呢個名，好靚，說穿就係生炒骨，但感覺同平時食開嘅好唔同，將大家都認識嘅生炒骨加上紫火龍果，青檸，酸梅，片糖等天然食材，最後加上麥芽糖。

珊瑚錦繡球係另一個我好熱愛的菜式，絕對講手工，大大個錦繡球頭頂用上蟹黃來紮。

最重要係蛋白皮，勁薄，外層的蛋白皮已經顯示到功架，入面包住嘅係蟹肉、冬菇、火腿、雞肉、大白菜、芫荽，蝦等等，味味都好令人回味。

鮮淮山杞子浸時蔬，全晚最簡單嘅一個菜式，間間場。

招牌手工脆皮糯米雞，顯示到佢嘅淵博知識，從呢個菜可以將佢雞嘅學識同大家講貨，聽佢講可以點樣將隻雞整得出神入化，超薄嘅雞皮，下層係勁多嘅糯米飯，食到停不到。

鮮果冰花燉蛋，一看你以為係楊枝甘露，準備食先知原來係燉蛋，加上超甜嘅芒果，呢個結尾收得非常好。

全晚你享受到嘅係味道嘅歡愉，視覺嘅享受，全晚鼎爺喺度仲要同你娓娓道來唔同嘅故事，今次搬左真心推薦。

我好想去試佢嘅佛跳牆，有冇人有興趣試吓？

鼎爺私房菜  灣仔盧押道23號鳳凰大廈4樓