Cucina: 白蘆筍我太遲來

有些餐廳，一直都話好食，個個都讚，但你就係未去過，好多原因，就好似呢間Cucina，說去多次還是沒有的起心肝去食飯。

當我去過一次之後，知道原因了，無他，環境無得投訴，開揚海景，服務不錯，價錢唔算係好貴，以尖沙咀酒店餐廳水準來講，好值得推薦。

再睇落去，係呢篇文講今次白露筍主題之前，如你對Cucina有興趣，先講K look呢個優惠，$500 現金卷有7折，有效期內任何時間通用，如果你睇完呢篇文有興趣嘅，只要你買完優惠券去食就有七折呢個優惠價。

就要朋友B先生講，又係有今生無來世優惠系列。

朋友B先生對呢度嘅紅蝦意粉有讚冇彈，係佢個Blog力推，作為朋友日日睇到個blog都睇到真係好想食，不過，突然殺出一個程咬金，叫我暫時唔食住紅蝦意粉住。

係網上見好多人已經先拔頭籌食左時令嘅白露筍，5月6號開始，意籍總廚Andrea Delzanno就精挑細選出德國黑森林出產嘅白露筍入撰，而家cucina就做緊呢個promotion ，到六月五日，仲有幾日，喺屋企用盡所有嘅力快啲寫左先。

白蘆筍係春季嘅當做時份，唔同區域嘅土壤同天氣種出嚟嘅白蘆筍都會有唔同，而據Andrea 講，德國黑森林出產嘅AAA級別白蘆筍係最粗壯，而且質感好嫩又鮮甜，質感很佳。

當然係呢個咁靚嘅環境，食到啲咁高品質嘅嘢當然開心。

枱上嘅麵包，當然不錯，意大利餐廳麵包那會有不好。

先上場嘅烚白蘆筍伴荷蘭汁及巴馬火腿，相信呢個都唔使點介紹係乜，個白蘆筍甜到飛起，香氣撲鼻，而且非常嫩，皇子蔬菜呢個朵，不是浪得虛名。

而且佢無乜用好多調味，好容易散發出嘅果仁香，加上了荷蘭汁就有另一種唔同嘅食法，再加咸香一流嘅巴馬火腿，無得輸。我自己都幾鍾意點厚身嘅荷蘭汁，配上淡身嘅白蘆筍，出奇地夾。

意粉部分雖然沒有紅蝦意粉，但套餐中的Tortellini ai funghi porcini, Prosciutto Iberico 48 Mesi, salsa al madeira, Pure Di Pera，同樣以伊比利亞豬手作的tortellini，入面還有牛肝菌，口感一流，加上以梨和馬特拉島葡萄酒做嘅醬汁，每件也好精緻，雖然每件Tortellini可以一口咬下去，但我會建議每件Tortellini切開慢慢品嚐。

今日嘅主菜係呢個伊比利亞黑毛豬肩肉伴黑醋，白蘆筍及牛油鼠尾草，又係另一個叫你有深刻印象嘅菜式，同樣以豬肉來配白松露，而今次西班牙嘅伊比利亞豬肉，口感更加細緻，但白露筍係豬肩肉嘅助攻下，香氣更㫒華。

而且我特別喜歡那個黑醋汁同牛油鼠尾草醬，感覺有特色，和白蘆筍各有所長。

尾聲甜品係就柚子sherbet，加上Pistachio Mousse，同ricotta cheese Ganache，還有朱古力海綿蛋糕，完美作結，平日意大利菜吃嘅甜品通常都會好濃，作一個強而有力嘅收尾，不過今日呢個就好清新，好有夏天嘅氣息。

尾聲當然要飲番一杯signature伯爵冰茶，我諗都唔使點樣介紹呢杯野，望著海一片，吃粒土耳其軟糖澎，陶醉於冰涼嘅伯爵紅茶中，還在懷念剛剛白蘆筍嘅香氣。

當然最緊要同啱傾嘅人一齊食，特別係好酒之S小姐，期待下次有酒局同你飲。

幸好雖然遲到，都好過冇到，說了多年，終於吃到聞名已久嘅白蘆筍，係K look買番張現金卷，下次我想真係要食紅蝦意粉了。

Cucina 

尖沙咀廣東道3號海港城馬哥孛羅香港酒店6樓

Brew note Coffee Roaster: 冇後數

星期五，香港人經歷了平靜而恐佈又可怕的一天，也不用談發生過什麼了，要知的當然知道。

在這非常時期，更加要支持同路人，前排G phone推薦的三間黃店認證，其中一間就係公司後面，放工食飯時間有需要就可以支持。

呢間咖啡店其實已經出名左好耐，都唔駛點介紹，我諗北角嘅朋友都應該認識。

先講規則，雖然呢度嘅檸檬水非常出名，但都要同所有嘅客人講聲呢度冇後數，冇事後還款，亦都冇人會之後幫你用八達通找數。

前日先見唔飲咖啡嘅潮童大讚呢度嘅咖啡同意粉，幸好我都唔執輸，食完即刻寫返篇文。

呢度嘅鐵三角，咖啡，意粉和多士，講起就想去食。

這個下午，和朋友J小姐食飯，佢問我食乜嘢，毫不猶豫我就揀咗呢間。

因為疫情的關係，餐廳的位寬敞左好多，咖啡店來講係前所未有嘅舒適。

天氣太熱，飲咗杯凍嘅Green Tea Latte。

記得千祈唔好一入嚟就搶，因為呢個係玻璃杯，整到手就唔好，當然綠茶latte應該唔係好解渴，係大熱天時，帶咁多野出街又着咁多衫，就唔係好啱飲。

仲有呢啲文青飲品，有燥狂、焦慮情緒嘅人都不太啱你地。

J小姐的iced Americano with organic honey，我冇試飲，不過睇個樣都知道對辦，喺呢度飲咖啡，邊會有錯，就正如，要人後數嘅大都冇乜好人。

Avocado toast with sunny side up，我相信我老婆一定會好鍾意食，牛油果嘅香氣，配合超脆多士，煎得靚靚嘅蛋，絕對係健康又好食嘅早餐選擇，好多女士都一定會大愛。

名叫chicken嘅炒意粉，個樣真係超級正，就如Netflix嘅too hot to handle嘅俊男美女般，秀色可餐。

用上peri peri醬，加上蕃茄醬，pesto 和parmasan，吵到條條意粉都像藝術品一樣，未食過你好難想像呢度嘅意粉有幾好，當然個水平冇係英國倫敦Padella或Pastaio咁好，但以呢個價錢同格局，我覺得已經可以留一個好深刻嘅印象。

可能奇怪你問我點解會攞呢兩間餐廳同佢比，唔知點解喺呢度食完呢個意粉，就諗起呢兩間意粉店。

咁就一餐，在忙到爆的工作中絕對能幫下手叉電，怪不得同事H小姐話佢得閒就一定會去飲杯咖啡加下油。

下一間，我一定要去Rest coffee Gin。

又或者，明天愁雲慘霧嘅星期一，就黎來一杯lemomade吧。

因為，呢排人生俾太多檸檬你。

早抖，明天又係另一個荒謬嘅星期。

Brew Note Coffee Roaster 

北角堡壘街19號地下

奔之食堂：讓我們在末日前吃一碗牛肉麵

上星期放假之際，本身係whatsapp約朋友F先生食晚飯，佢知道我放假，問我下午有冇空都一齊食個飯。

佢話佢約左瓜爺同龍小菌食個午飯，碰巧有時間，當然不會錯過，年前喺F先生嘅教父飯局都見過一次小菌，不過上次只有匆匆一見，又冇特別傾啲乜嘢同打卡，今次正好，無理由唔去。

下午食飯地點正是奔之食堂，兩個多月前同和另一班朋友去過銅鑼灣嗰間分店，當天還帶了些手工麵回家，第二日即刻煮來吃，全家都讚好。

可惜當天上午有事，去到的時候，大家都吃左一半，不過當然，飯局之事，吃東西為次，傾吓計交流吓才為主。

尖沙咀的分店更加靚，而且非常方便，喺海港城呢邊吃台灣小食牛肉麵嘅選擇唔太多，呢到絕對係午飯嘅好選擇。

當然如果你夜晚喺附近行街簡單食個晚飯都好，價錢來講相對好平。

坐低先食小吃，瓜爺點了南投竹山雲筍，新鮮到不行，雲筍的香氣在口腔內非常四散，那種爽脆，叫人非常開胃。

士林炸花枝丸，五粒只售$38，喺尖沙咀來講價錢算非常超值，當然不能來跟士林夜市比較，炸得香，花枝彈牙夠緊致，就夠了，好吃。

叫了件滷蛋，試下呢度個滷水，也是不錯，此刻搞到我好想吃一碗滷肉飯，不過早餐剛剛吃完不太肚餓，所以過下口癮便算。

食開台灣野，一定會講起台灣嘅文化和交流，講起宜蘭嘅陽光與海灘，講起台灣人嘅慢活style，再講起那邊的文化，在桌上嘅幾位朋友大家都非常想念台灣的天空。

在香港，大家都追尋想搵多啲錢，但係搵咁多錢又點，我們沒有快樂，也沒有人生的滿足。在台灣的天空，有嘅係自由嘅空氣，就算搵錢冇咁多，但嗰度嘅人點都開心啲。

“若這天來臨誰會敢猜想天空變了樣” ，在紛亂的社會，記得星期三這個下午還未有什麼消息，大家還在談天說地，講吓旅遊、講吓音樂、講下滑浪、講吓食，幾天後，人人卻都查詢移民台灣，活在這個大時代都不知是好還是壞。

特別呢幾日，末日咁特別重。

還記得吃主食前，那天還有個朋友短訊給我講股票，那天歌舞昇平，什麼港交所、平安好醫生、阿里巴巴Gogogo ，那刻我記得我還在吃犇之三寶麵。

銅鑼灣試過呢度嘅紅燒牛肉麵，水準當然好高，今次試三寶，感覺更不錯。

以牛腩、牛筋、牛肚三個主角，加上清湯的味道，試一下麵條，彈性十足，和香港人一樣，堅毅不屈。

牛肚的味道很好，好淋好好食，係少見的高質。

牛筋淋到不行，牛腩又係，煙韌到捨不得呑落肚，係一吃自然會愛上的種類。

記得一定不能錯過嘅係呢度嘅酸菜同埋辣椒油，那辣油有點在林東芳吃到嘅感覺。

瓜爺叫的傳統清燉牛肉麵，我上次也有吃過，那個味道，絕對令你想起西門町洛陽街附近嘅牛肉麵激戰區，食完去橡木桶飲威，那個簡單不過的幸福，現在卻是多麼遙遠。

估不到兩日後，因為一單人所共知嘅新聞，香港就似末日般，大家都像結咗婚嘅人，一樣從城裏逃出來。

我想香港不像婚姻是一座圍城。因為至少城裡的人想出來，城外的人都會想進去。然我們這孤城，人只想走，有出無入，我諗沈從文也沒有想過，東方之珠會變成咁。

當然那一刻我們沒有傾談政治，反而繼續講音樂，由David bowie到britpop到durian durian 再到Morcheeba，我們的生活可以有很多美麗嘅事物可談，人生還是可以很正面的，是把我們趕上絕路？

那刻才突然想起，小菌也是香港大學中文系嘅人，多觸覺和特別多愁善感，相信這才是創作靈感的來源吧，正如我食餐飯，都咁多嗲，可惜沒有立即相應，下次吧。

尾聲飲杯季節限定的愛文芒果沙冰，那種甜，有生之年屬於我，那刻幻想下自己在台灣，看著海，聽著達明一派的歌，恐怕這個璀璨都市光輝到此，聽到這句，特別唏噓。

如果這個末日之前吃一碗牛肉麵好嗎？好呀，因為呢碗牛肉麵令我想起嘅台灣自由自在嘅氣息。

瓜爺講到一月選舉時佢喺台北，才驚覺，原來已經過了半年，但我們的命運卻走越遠。

我也想好似奔之食堂嘅理念，對人生，還有希望，還有活力，還有期待。

只要我們尚有一口氣，我們還要堅持，你聽過阿信的故事嗎？

小菌，不如你唱下。

PS希望下次去可以聽到你首主題曲。

奔之食堂 

尖沙咀廣東道28號力寶太陽廣場LG樓LG07-08號舖

蛇王芬：二人價錢，四人享受

中環老號蛇王芬大家又點會無聽過，當我看到C小姐的Facebook講開呢到有新promotion，買一送一後，星期六晚上，二話不說就來了。

上次朋友C小姐係呢度搞個一局，食蛇羹小菜，到現在依然回味無窮，年多過去，都一段時間冇來過蛇王芬，見到咁吸引嘅價錢，唔係唔黎啊。

其實前嗰排都特登過嚟買潤腸，仲碰巧仲撞見Paulina，可惜潤腸都賣晒，你可想而知有幾受歡迎。

講番今次呢個招牌小菜燉湯二人套餐$648，仲有買一送一優惠，四人行也是$648，平均每人只需 $162就可以品嚐到蛇王芬嘅足料燉湯同功夫紥實的風味小炒，基本上呢個餐你可以吃盡幾個特色美食。

Paulina whatsapp我，佢話我知原來我係第一個人食呢個餐，作為一個鍾意食又無聊會寫下嘅人，當然要寫下同大家分享下呢個咁正嘅offer。

星期六晚上來到，人竟然不多，原來星期六晚中環區嘅中餐廳可以咁舒服，當然可能係疫情影響，但更加支持推動下本地經濟。

先來潤肺天山雪蓮茨實蓮子百合豬𦟌燉湯，我相信呢度嘅燉湯有幾足料都唔使講，啖啖雪蓮都甜到震，飲一口湯都知道有幾咁潤，而且仲有好多湯料附上，飲完個湯都好滿足。

然後係招牌雙腸炒芥蘭，我相信係人都知道蛇王芬最出名嘅就係潤腸同臘腸，加上甜美嘅炒芥蘭，還有蘑菇和其他配菜炒呀炒， 潤腸入口口感好強，溶化係口嘅都係美味，當然佢冇蛇王二嗰種脆皮感，但味道相對取勝。

臘腸不用說，咬下去感受到係油香和肉汁，這個絕對和意大利嘅莎樂美肉腸有異曲同工之妙，呢一刻多想飲杯威士忌去送啖啖美味。

秘製風味西檸雞又係這裡的signature dish，風味一流，而且碟頭大，西檸個醬汁酸甜適中，雞肉剛好大小，送飯是絕對一絕，四個人兩碟一定食唔晒，除非你係四個大男人過嚟。

吃主菜之前，因為爸爸媽媽都冇食過呢度嘅蛇羹，於是當然要叫一碗，蛇羹足料得過份，上枱嗰陣時差唔多到倒瀉出嚟咁滯，絲絲蛇肉叫人吃得高興。說起蛇羹，不得不提提中環國金軒的「太史五蛇羹」，也是我的愛店之一。

最後的蒜蓉鮮蝦粉絲荷葉飯才是迷人，唔記得上次嚟食有冇食過呢個荷葉飯，以蒜蓉粉絲入撰，三隻蝦都好大隻，蝦頭又有勁多蝦膏，個飯蒸到真係粒粒靚，每粒飯都有米香蒜蓉香和蝦膏的香氣，每啖都要慢慢咀嚼才感受到那幸福感。

四人用$648，就可以食到咁多野，我話你知，我哋成個飯同西檸雞同雙腸都有打包回家，當然如果我哋冇食碗蛇羹可能會開胃少少食多少少。

呢個餐有一點可以毋庸置疑，就係超值，平日來蛇王芬一定唔會係呢個價錢。

睇完篇文你可能你會覺得咁平，點訂，即日起預訂只要Inbox蛇王芬 Facebook page就可享買一送一優惠。二人價錢，四人享受，那有不吃的理由。

蛇王芬 

中環閣麟街30號地舖