同朋友講我前排係元朗半日內搞左個美食團，總共食左八間店，個個都問我攞路線圖，諗諗吓不如寫出嚟啦。
諗左好耐，我呢個元朗半日遊應該點樣落筆寫，由開始到結尾間間都寫，定係一篇一次過寫出黎。
最後我都係決定，每間寫一篇啦，第一篇由最尾一站開始，我來到了好朋友的店，火紅的番茄師兄。可能你會話師兄唔係喺深水埗嘅咩？點解會去咗元朗。
冇錯番茄師兄剛剛喺元朗開咗第二間分店，呢個五一黃金周你去咗未？
當日拜訪嘅時候，還未到黃金周，已經五點多，幸好人不多，等左一陣已經入到去。
新店嘅裝修更加精美，更多文宣，而且感覺好像舒服過深水埗分店。
食咗七間小店後，講真都冇乜位再食落去，不過試下分店的水準，而且仲有啲未見過嘅小食，我身邊幾位朋友都未試過，所以最後一站壓軸出場就最好。
未食過就當然要食最出名嘅嘢食，師兄為我地選擇咗犇犇有禮番茄濃湯麵，有新鮮牛面頰，加新鮮牛坑腩和新鮮崩沙，咁強勁嘅陣容，加上了上海麵，雖然我哋食到好飽，但係都好可以好開胃。
大家都知道呢間鋪頭用嘅牛肉全部係新鮮騸牯牛，個肉味強到個個人都叫好。
然後呢個湯，加咗芝士再加滑蛋，直頭係完美。
用上了五大材料去做嘅番茄湯，算係好濃，但係好似冇深水埗嗰種濃到有餘韻嘅感覺，同深水埗好像有點距離，不過新開店水準有點不穩定，是可以原諒的。
W小姐自己都飲咗一碗湯，好難想像佢去到深水埗店，應該會更著迷，飲多一碗。
另外仙氣逼人番茄濃湯麵，有鮑魚，大蝦和鮮制麻香墨魚滑，又係食得非常滿足，今次加上了日式拉麵，個效果更好。
P先生話墨魚滑有點鹹，我覺得還可以，但配上了海鮮之後，湯好似更加提升到個鮮味。
由於人多一點，我哋可以試到唔同嘅小食，沙嗲味嘅豬頸肉非常惹味，以前菜來說絕對一流。
麻香瑞士汁嘅雞翼係個個都說好嘅佳作，一點要叫。
最後酸辣涼拌牛脷，係呢個炎夏天氣絕對係醒神開胃之作，其實我哋個個食咗咁多間之後都真係好飽，但係食完呢個涼伴菜式之後成個人回魂不少。
見到朋友開頭剛剛做得好辛苦，到而家上左軌道，再到而家喺社會運動期間支持不少，真係好欣賞佢嘅勇氣和決心。
剛剛呢個黃金周佢舉行左你食$5佢捐$1嘅活動，真係好有心，支持有關機構，加上佢專心一意做好嘅蕃茄湯底，你能唔過來支持他嗎？
PS希望師兄生意蒸蒸日上，為你打氣💪🏻💪🏻💪🏻
沒有留言:
發佈留言