2020年5月24日星期日

瑞士咖啡室:周日床上

星期日的早上,最理想係同一班朋友來個champagne brunch,但今朝朋友個個都唔得閒,兩個人去食好似無咁熱鬧,於是,最好就係求其附近食個最comfort 嘅港式早餐。

東區的茶餐廳冇深水埗長沙灣油尖旺咁多,要吃選擇就無咁多。

剛起床突然想起呢度嘅瑞士汁雞髀,當然就想起在樂富的分店,冇想太多,落床就去食個早餐。

呢間係中環發跡嘅茶餐廳,記得以前喺上環返工一個月至少去食兩三次,平得來又大份,好適合中上環打工仔,排隊都唔知排過幾多次。

樂富嘅分店我真係第一次嚟,原來呢度嘅裝修都非常之靚。


坐低一定要先叫一個雞髀餐,加個麵,再加個奄烈同多士,呢個絕對係港仔最經典嘅早餐選擇,如你說你習慣復仇者的all day breakfast,當然會惹來那些火辣有身材又靚又滿口英文出入蘭桂坊嘅靚女垂靑,但我就不是那種人,最多吃all day breakfast 機會就係倫敦,香港真係好少食,何況主角用上廚師腸。


港式餐廳點可以唔飲奶茶,水準中規中矩吧,冇特別都冇投訴。


瑞士雞脾當然係一貫嘅作風,甜甜嘅瑞士汁加上滑滑嘅雞脾肉,點會有問題。


清湯嘅公仔麵相對真係單調,不過你要識食好容易,只要加少少瑞士汁落個麵度完全唔同晒。


多士同奄烈唔會係世界級好食,但奄烈充滿蛋汁同埋無數咁多嘅火腿都值回票價。



大食少少嘅,XO醬瑞士汁雞翼炒公仔麵是另一佳作,大碟到不得了,又可以食到個瑞士汁,公仔麵一定炒得好,再加上芽菜青椒紅椒等等,幾下就食哂食碟,令人開胃。




呢度好流行食一啲健康嘅餐單,其中呢一個傷風感冒餐又係不錯。




特濃蕃茄湯雜菜火腿通粉,個番茄湯有少少辣,有少少蕃滿門感覺,火腿又係一如以往好似唔駛錢咁成碗都係。

當然個番茄湯冇好似而家幾間出哂名嘅蕃茄湯咁好,特濃也說唔上。


再加一杯菊花薑蜜,強到令你乜嘢傷風感冒都驅走。


接近中午嘅時間,呢度已經有西多士食,口痕食件,厚多士是常識,加上牛油,吃完後靈魂都會賣掉。


尾聲的西多當然要配紅豆冰,是常識吧。


簡單一餐已經好滿足,世界太紛亂,吃完再想想,今日幾點出發。

瑞士咖啡室 
樂富聯合道198號樂富廣場1樓1119-1120號舖


沒有留言:

發佈留言