Afuri這個品牌，第一次認識應該是在東京原宿，經過兩次也過門不入，唔係時間唔啱，就因為太飽，兩次都叫我遺憾，想試試那柚子之味。
知道呢個品牌係香港落戶都一段時間，本身都一直期待想喺香港食下，但係就係冇一個咁嘅機會。
剛剛三月在北海道的Tomamu星野，竟然會看到Afuri的出現，那個時候剛好冰天雪地，人又肚餓，本來好想食一碗拉麵保暖，但在滑雪場內，吃一碗麵又好似唔係好夠，而且那個牛扒長腳蟹自助餐實在太吸引，最後我們還是選擇了再一次放棄Afuri。
似乎真係好冇緣份，回到香港又不停見到好多人都講呢間，於是返嚟香港點都要試一次，某個星期六的下午，便來了吃個tea。
以拉麵店來講，呢間喺IT shop裏嘅拉麵店，好開揚，好舒適。
勁闊嘅空間感，下午來嘅時候，落地玻璃叫人感受到溫暖陽光，好舒服。
而且好鍾意佢餐廳嘅工整，位置又多，又有電腦俾你自己點拉麵，以香港拉麵店黎講，我覺得數一數二嘅cozy，我覺得呢度似咖啡店多啲。
我們兩人一人點了一個拉麵，加一個小食，一杯飲品，食tea來講，也不算太過份吧。
幾個朋友都推介過呢度嘅唐揚炸雞，熱辣辣又軟綿綿嘅炸雞，點上那沙律醬，非常好食，而且熱度十足，油份又不高，以拉麵店水準來講，呢度嘅炸雞算係超晒班。
呢度而家做緊飲品買一送一，以柚子為招牌，當然要點招牌柚子梳打，係呢個咁熱嘅天氣，消暑解渴一流。
點題作柚子鹽味拉麵，先飲一口湯，柚子的感覺，清新得很。
燒過嘅叉燒不會過肥，薄薄一塊，同個湯一樣，唔會好油膩。
其他紫菜和那件流心蛋，感覺也不錯。
麵條不太粗，但掛湯一流，完全係夏日非常之清新嘅選擇。
我點的一碗柚子甘露沾麵，感覺更驚喜。
上沾麵嗰一刻，連隻碗都係冰凍嘅，剛剛坐低好熱嘅我，直頭係有一個快感。
沾麵也是冷麵上，粗身得多，掛沾麵汁能力更加佳。
叉燒也是大件像燒肉般厚，加上大量嘅蔥同埋筍，更加開胃。
我地幾啖便吃完兩碗麵，有兩個原因，第一，新鮮感，喺香港嘅拉麵店，以柚子湯拉麵為主真係冇乜選擇，第二，好適合而家呢個悶熱天氣，加上，由日本返嚟再去過日本多次，翻來覆去幾次都食唔到嗰個心願完成後，特別難得。
By the way 第一次係香港食拉麵覺得價錢唔貴，因為喺星野度假村一碗柚子鹽味拉麵嘅價錢同香港差唔多一樣，也是因為呢點，三顧草廬的遺憾才更加變得釋懷。
沒有留言:
發佈留言