愛川菜食過雲陽又支持德哥嘅朋友，當然一定吃過川流，前排餐廳推出過任食點心已經非常震撼，這裡的型男經理Edward話日日爆場，但估唔到餐廳再下一城，推出一個更震撼嘅優惠。
呢個飲食川式滋味每位$298，任食多種唔同嘅川菜 ，90分鐘內可無限享用，再加前菜，一個主菜，同一款麵食。
一年之前我試過呢度嘅文殊院甜水麵，呢個來自成都非常特別嘅麵食，一整條長長又煙韌嘅麵，又好食又呃like，當我知道係呢個飲食川式滋味嘅麵食主角，平時單點都接近一百，依家有得食之餘，仲要無限供應其他菜式，加上我最愛的醋椒胡辣羹，唔食真係對唔住自己。
當晚嚟到，和很久不見的朋友Z先生和C小姐見面，但係我哋都冇噓寒問暖啦，食咗先講。
一坐低當然要飲番碗醋椒胡辣羹，有食過川流應該都會有飲過呢一個羹，正到不行，加上川流獨有嘅辣椒粉，包你食到成身汗，出番身汗，乜濕都去到。
另外一個招牌菜家鄉燻臘肉胡椒餅，又係好多人最愛，那個臘肉嘅肉香，加上胡椒餅的熱辣辣質感，無得輸。
自選一款主菜有水煮魚片同豆酥桂魚，各有愛好者，我自己較為鍾意水煮魚片，加上芽菜和寬粉，完全係無得彈。
豆酥桂魚也是P先生大愛，送呢度手工啤酒，一流。
好啦，要講下無限量嘅川式滋味有乜嘢可以任食，呢班先至係靈魂人物。
來食過咁多次晚飯，都未試過一啲家庭菜式，今晚竟然有宮保雞丁、乾煸四季豆、魚香茄子和麻婆豆腐。
當中我覺得最好食係麻婆豆腐同宮保雞丁。
就好似C小姐話齋，完全冇諗過可以食到呢類菜式，好想即刻嗌碗白飯。
呢幾個菜式都冇乜嘢好講，因為全部水準好高，出自德哥廚房，又有得任食，想點？
另外蒜泥黑毛豚白肉，基本上係呢個半鐘，枱面一空閒就會想叫多碟， 蒜泥之香，白肉又入味，多多都殺。
然後有個回鍋本地黑毛豚都係同門之作，又係送飯佳品，個惹火程度爆燈。
雖然我哋幾個大男人好鍾意食肉，但係同時間又好鍾意呢一個花生芽，又係點十次都食得哂， 花生芽嘅爽和油香，你會想立即想飛奔上四川同成都。
仲要有呢一個點題作小籠包俾你食，之前有睇過我嘅文都知，介紹過好多次，都唔講啦。
尾聲嘅麵食係擔擔麵同文殊院甜水麵，先講擔擔麵，辣度適中，麵條彈牙，無太過多餘嘅花生醬味，不會搞到你好飽，我覺得係香港頭三位好味嘅擔擔麵。
頭先介紹左文殊院甜水麵，呢個別緻的四川小食，又韌又彈牙又好食，同日本嘅拉麵同烏冬有異曲同工之妙，如果呢個都有得任食就真係完美。
臨走之際，你以為我哋點甜品，食雪糕，點知我哋唔夠喉，單點了一個百花煎酿蘿蔔糕，這個是百吃不厭，你睇任食完都唔夠，我哋呢班人真係愛川流愛到一個點吧。
都冇問到依家餐去到幾時，我淨係知道好爆，有興趣嘅快啲去book啦。
沒有留言:
發佈留言