聽過楚撚記呢個大名都知道佢第一間分店喺土瓜灣，你又知唔知呢間大受食客歡迎嘅餐廳剛剛喺西環開咗分店？
想幫襯呢間黃店嘅香港區朋友唔使再過海啦。
上個月尾西環店試業之後，大部分人嘅反應都係同原店一樣，而且仲要出左幾個西環店獨家提供嘅菜式。
剛巧喺西環經過，咁就不如試一試佢嘅水準，當晚呢度依然人頭湧湧，就如土瓜灣店一樣排到七彩。
由於太多人排隊，最後我都係決定買外賣番屋企食。
係等位期間：入咗去餐廳睇咗睇裝修，靚好多，保存了原店嘅風格，而且更加有特色。
有幾個菜式喺呢度先有，其中一個點題作係西楚霸王雞，大量嘅薑蔥加蒜蓉和豉油，新鮮嫩滑嘅雞，吃到又點會唔好，雖然只係叫咗半隻，但份量都好足，送飯一流。
最正係攞蔥來吃，加上炸蒜頭等等的調味，分分鐘好食過隻雞。
如果當場食，一定要叫個豬油撈飯送。
另外煎蠔餅都係呢個分店先有，當然話俾你聽呢度嘅蠔餅好過好多潮州店你都未必會信。其實我覺得表現中等，只不過蠔仔比較少，係唯一致命傷。
試咗呢度嘅新菜式，當然要試吓傳統嘅出品，睇吓同土瓜灣店有冇特別大分別。
我最鍾意係原店食嘅香煎黑松露手打蓮藕墨魚餅，吃下去，比起原店的味道更好，黑松露的幽香和蓮藕滿滿，而且墨魚餅感覺充實，依然是必點的。
最尾係西檸雞，最好係佢個汁同雞會分開，外賣也吃得安心，質素上佳，同係當場食無分別。
雖然我個人唔會讚到呢間野天上有，地下無，但以一個相對不錯的價錢，同朋友用戰鬥碗飲番杯冰涼啤酒，食下小炒係唔錯嘅，而家一路向西之後，港島區嘅朋友都可以嚟呢度朝聖啦。
沒有留言:
發佈留言