中環街市：酒友出沒注意

相對冇咗開幕時嘅熱鬧氣氛，終於有時間可以發掘下中環街市入面嘅寶藏。

記得開幕嘅時候，水洩不通，個個爭住打卡影相，你想俾錢飲酒食飯都冇地方，相反而家，兩個世界，你地想去邊就去邊，坐邊就坐邊。

就好似今晚與很久未見嘅朋友H小姐見面，帶我黎到白蘭樹下威，飲cocktail ，食中式小炒，再轉場飲啤酒，可惜人腳同時間都太少，無得再食其他，到今日仲未食到傳說中好美味的叻沙。

兩個人坐低白蘭樹下，先點杯cocktail，一堆signature cocktail ，看得令你眼花撩亂，我選了IG，健康一點的菠菜蓮，另外她點了生果飛，冇夾過，但顏色極度襯托。

我個杯好適合夏天飲，如果你鍾意類似五青汁，就正中下懷，只不過Gin的強度不太高，如果好strong 嘅Gin，可能要叫佢地加大力度。

六點後，只要坐在白蘭樹下飲野，你就可以叫其他餐廳嘅嘢食過嚟，當晚選擇一喜，主要吃中式嘅小炒，基本上你講得出嘅嘢都有。

當然其實係白蘭樹下都可以叫其他嘢食，薯條漢堡都平到傻，不過今晚想食中式嘢。

豉椒炒蜆，完全同平時喺大排檔食到嘅風味差唔多，有鑊氣而且粒粒都都炒得好好。

H小姐點的黃金炸魚皮同和牛粒，兩樣都係送酒之選，喺嗰刻我已經想去麥子叫啤酒。

我們也愛好辣，喺水煮魚同肉之間，食左水煮牛肉，牛肉當然幾好，用上鮮牛，完全同水煮味道融為一體，仲要有寬粉，$108一碗，平時茶餐廳個價錢都唔得，仲要呢度係中環街市，又有得飲酒又有得坐低舒舒服服咁食，夫復何求。

我愛澱粉質，當然要叫多個煲仔飯食，點了個梅菜排骨飯，如果話俾你聽佢質素超越坤記就當然無可能，但一百蚊內咁平，絕對收貨，特別係肉多過飯。

食飽意猶未盡，再去下場，係wine同啤酒之間，我都係prefer啤酒，點了個甘蔗黑啤，朋友點了經典的手工啤，走出去大堂原來有我有得坐，enjoy聖誕燈飾，都唔錯。

就這樣連環試左三間，就結束是次中環街市之旅，感覺不錯，特別係好似我哋呢類乜酒都好嘅人，不停試就最好，下次再試飲wine同上去食意大利菜ION，當然仲有叻沙。

中環街市Central Market 中環皇后大道中93號