2020年1月29日星期三

方榮記: 勁哥和肥沙


你有沒有遇過一些良師益友?他們總會在你身邊,支持你無論對與錯佢仲會幫你唔少,就是對你將仔女一樣。

在我工作十多年,我遇上一位朋友,好多人叫佢勁哥,還記得在幾年,佢照顧左好多。

到現在久不久,還是會見到他,我們還是非常好的好朋友,印象最深刻的是頭三年,我工作無憂無慮的日子。

就是那個時候,佢帶我認識方榮記。

自上次我同佢食過方榮記之後都冇再嚟過,應該都有十年時間。

今晚來到,感覺更深,原來時光這樣飛逝。

那個年代,還沒有什麼咁多飲食博客,依家求其一個人寫下都可以話自己係,老實講,識飲識食,傾兩句就知。

我寫呢篇都唔係話想介紹你方榮記有幾好食,要推薦你,(老實講喺香港活咗幾十年喜歡打邊爐嘅人又點會唔識放幾) ,正等於我唔會好似柒婆政府做嘢永遠遲十拍,仲要馬後炮,前日同你講社交場合唔應該帶口罩,今日記者會冚家都戴口罩。

相信呢間野就好似一個公開嘅秘密,情況就如麥字頭嘅雲吞駛乜飲食博客介紹。

我成日經過九龍城都同我老婆講,我好想去方榮記打邊爐,不過講咗幾年,都冇一次成事。

今晚寒冷天氣警告,然後前嗰排因中國冰室睇開《PTU》的關係,突然好想食方榮記。

於是就決定來同肥沙聚下。

這裏的沙嗲,我想到不用多講,嗰個濃度真係好似周華健話,情越濃,越會化不開,看不清那未來。

嗰個味可以話係香港最正最有實力沙爹。

我同阿爸講唔使叫得多,一碟牛,一個公仔麵一個枝竹,已經可以好滿足。


每枱都有一個菜,今晚有生菜和西洋菜,幾靚,只係$40,打邊爐嘅鋪頭來講算好抵。



我冇錢叫$2500個隻牛,但係要左佢哋嘅皇牌牛,味道當然正,老實說喺隔離李輝記買都差唔多,喺呢度食到咁嘅質素算幾抵。



枝竹同響鈴咁搶湯嘅嘢,冇乜理由唔食。






另外叫了黑毛豚肉,味道就不過不失。



同場一定不能錯過魚皮,呢度嘅魚皮非常勁,炸得好脆,好大條,直頭係有魚骨嗰隻,係沙嗲湯浸個你死我活才吃先得。



當然不能錯過公仔麵,方榮記用的是大光麵,絕對係要呢隻麵先好食,我自己今晚偷偷地攞咗一包韓國麵來煮,個感覺就係冇咁好。




大光麵個密度同呢度嘅沙嗲係完美配合,就係說不出嘅夾。

我未試過用出前一丁,如果有愛麵人士下次自己偷偷地攞包出前一丁來煮,記得話我知。


就係呢碗沙嗲牛肉公仔麵,就已經值回票價。

不過真係老了,個湯越滾得耐,就會吃得越嚟越飽,可能太杰嘅關係,你會覺得有點滯。

以前十年前係咁食蠔,一個人食兩碟牛都得。

但吃到每一條麵被濃濃嘅沙嗲汁包著就真係好滿足,作為這個假期的完美句號。

突然我又想起勁哥,然後我WhatsApp佢,我話:突然想起你,幾時見下面。

我想這大概就是brother romance

就如肥沙搵唔到支槍,兄弟一定撐。



雖然佢哋嘅職業而家人見人憎,但無辦法 ,講起方榮記我就一定諗起呢套戲,勁哥同埋肥沙。

沒有留言:

發佈留言