中庭：去年同樣時間

對上一次來中庭，應該是去年同樣時間吧。

我諗大家都諗唔到一年後嘅今日，我們還是留在香港。結果係每個星期，要搵新餐廳或者酒店staycation先搵返啲人生嘅意義。

諗起都覺得可憐，看到一年前嘅相簿就想起會展嘅呢間餐廳，回想以前一年一定會去會展幾次，書展又好、藝術展覽又好、演唱會又好，而家會展好似好少機會去。

見到中庭有優惠，無想過要有展覽才來了，立刻起行。蘇志輝師傅的新經典系列，由頭盤、燉湯、主菜到甜品一共八道菜，都只係每位港幣$508 (兩位起)，如晚上惠顧更可享某些信用卡優惠，我唔賣廣告係邊張信用卡啦 ，自己搵下。

前菜先有鹽焗鮮鮑魚，走地醉雞同涼拌蜜荳蟲草花，最賞心悅目嘅一定係擺盤同造型，鹽焗鮮鮑魚做得不錯，走地醉雞可以成件食係最令人欣喜的滑度。

潮流興ABC，紅菜頭好流行，師傅都準備左螺片白玉紅菜湯 ，以冬瓜，紅菜頭，螺片紀子菊花，螺頭湯入撰，感覺非常不錯，如果你飲開紅菜頭湯，呢個你一定會覺得好正，最重要係連少少嘅草青味都冇左。

荷香富貴鴿，靚到不得了嘅造型，以荷葉包住頂鴿，鮑汁勾過後，加上花菇，雲南大頭菜調下味，再焗完加上紅菜頭粉，你會食得出師傅嘅心機同富貴鴿的嫩滑。

全場嘩然的香蔥烤油甘魚鮫，你以為油甘魚鮫嘅油份同埋肉感最出色，但我告訴你最精彩嘅係伴碟嘅香蔥，絕對可以送一碗飯，那股香，到今日都記得。

中間要吃點清清地嘅野，羊肚菌竹笙卷素千層用上少見的BB西蘭花，幾好，特別記得還有竹笙卷的滑同羊肚菌的香。

邪惡萬分的慢煮豚肉腩，我想你唯一擔心嘅係食完有嘅罪惡感，或者諗緊嘅係究竟食唔食頂層最好食嘅肥膏，那個慢煮後嘅醬汁，送飯又係一流。

尾聲的手切牛崧黑松露炒飯，大碗到不行。基本上女士一定食唔晒，因為已經飽到雙手投降。

甜品係合桃布甸拼黑糖桂圓紅棗餅，個人來講相對最冇感覺嘅一道菜色，可能我自己本身對甜品真係唔係特別鍾意，不過擺盤又真係靚到一幅畫咁，欣賞下都幾好。

以呢個價錢食咁多道菜，點會唔值，最重要係地方大又唔算難book枱，有興趣試下。

中庭 灣仔港灣道1號香港會議展覽中心1樓