王家沙: 花樣年華

我都係前幾日先知王家沙係Gaia group的，原本呢間咁傳統嘅上海菜店，有著一股外國嘅色彩， 個人覺得都幾特別。

雖然以花樣年華為題材，但我都係覺得感覺有強烈外地氣息，就好像上海灘的感覺。

今晚兩個人去開九龍塘行街，係zara home買完野，唔駛排隊，咁就試吓。

先來點小吃，三絲粉皮，呢度嘅出品竟然有火腿，好特別，不過喜歡與否就見仁見智，我老婆就話加火腿有啲怪，我還可以接受吧。

紅油抄手，小小一粒，一口一啖，好食，又唔係太辣，包得幾好。

我係酸辣湯嘅粉絲，正宗酸辣湯係唔係正宗我唔係本幫人唔夠膽，但講感覺，辣度適中，和我平常喜歡嘅味道都好對辦。

賽螃蟹見得多，以溫泉蛋來配合賽螃蟹係第一次，又做得幾好食。

馬拉盞通菜，少咗啲鑊氣，以上海菜來講，正常嘅。

我最想食嘅一定係四川麻辣水煮牛肉湯麵，個四川麻辣做得幾得體，牛肉唔會好老，湯麵掛湯亦都掛得唔錯，最好嘅係佢有大中小辣揀。

老婆點的韭黃肉絲兩面黃，以為係沙糖版本，鹹鹹的，說穿了根本就係肉絲炒麵。

一人一杯的羅漢果茶，解膩又滋陰。

甜品好多選擇，我們點了貴妃紅棗糕，全晚最驚喜的就係呢個。

簡單一餐，雖然無驚喜，但都吃得過，又唔會話要瘋狂訂位，商務朋友傾偈一流，雖是花樣年華，但不一定係好藝術的。

王家沙．花樣年華 (又一城) 九龍塘達之路80號又一城G層23號舖