賀歲號外：再遇旺角夜市

成日都話，農曆春節係香港最悶，乜野餐廳都休息，起碼初四先啓市。

再唔係，就算餐廳開門，有加二甚至有特別的餐牌，比平時的價錢貴20%，司空見慣。

就好似剛剛今日下午去金園茶餐廳，茶餐常餐都不會提供另外有新春Menu只有單點，農曆新年的香港，大約呢十年都係咁。

不過，幸好，香港人農曆新年呢幾年多種個習俗，就係掃街，熱愛街邊嘢食嘅你我他都會空群而出，為的就是吃到那些平日吃不到的街邊小吃。

還記得幾年前曾經因為這些街邊檔而搞到好大件事，成街差佬嘅旺角朗豪坊上海街一帶，現今，由初一到初三，基本上都成為了很有秩序的街邊小食天堂，今年我相信是最誇張最有規模的一年，呢個就係旺角夜市。

本身都沒有特別想去旺角，因為驚太多人。初一晚飯之後，個個都話去保安道夜市行街食野，於是去行下，規模不大而且食物十分不吸引，行行下心癮起，於是便去旺角睇下有乜特別。

往年朗豪坊對面一整條街最多嘢食，但今年的陣容延伸到去到豉油街口對開的空地，食物選擇之多應該係呢四五年之冠。

立即分享下初一晚見到有咩特別野食。

如果你最記得朗豪坊最出名嘅就係一班印巴藉人士的燒雞和燒薄餅，鑊氣火候樣樣都夠，今年更加係短短兩條街基本上有起碼十檔買同樣的燒雞，薄餅和咖哩之類，每間的味道坦白講應該差不多，看邊間合眼緣吧。

燒海鮮永遠都有支持者，今年除了依然有勁多燒蠔和燒元貝之外，仲要有誇張的燒龍蝦，我自己就冇食，不過我見好多人企係度食得津津有味，只不過有少少論盡。

如果你有車，坐喺車度食，感覺應該會良好一點。

我自己永遠最愛碗仔翅溝魚肉，但每一年吃到的感覺也不太對勁，今年也一樣，只不過$25，相對超值，一年吃一次開心一下。

臭豆腐和炸大腸係必有嘅項目，朗豪坊中間對面的那檔大腸非常肥美，一定要支持下。

小食檔好多人都要係呢個時候食懷舊炸魚蛋，黃大仙都有呢檔野，這幾年在旺角吃過幾次都覺得一般，本來諗住排隊買，但$30十粒呢個價錢令人絕對想打退堂鼓，幸好，之後其他食友都在網上看到這個砵蘭街小食天堂的炸魚蛋係非常難食的消息，沒有食，係正確選擇。

魚蛋有勁多檔，當中搶鏡有呢個爆發魚蛋，任你試，然後仲有年年有幫襯嘅我要辣魚蛋，主要幫流浪貓籌錢，好有意義，其他魚蛋都係多到不行，當然仲有燒賣啦。

喺豉油街隧道附近的空地，有這個比較特別的土耳其咖啡，還要有傳統的土耳其糖果和無花果配咖啡飲，幾正宗，價錢$40一杯，可以一試。

另外一定有民族色彩的當然仲有呢個土耳其kebab，竟然都有三四檔，可以過一個土耳其新年。

還有無數咁多嘅串燒同腸仔，食肉獸最愛。

當然唔少得來自東門嘅阿拉伯燒肉，長長的一串，新年食，好意頭。

潮汕牛肉牛丸呢期非常流行，潮汕牛丸都有三四檔，我試過當然和深圳的冇得比，不過如果你未食過想試乜嘢味道，也是幾好的。

生腸和鹵味檔不多，一檔半檔，也是我覺得比較奇怪的。

還有港式雞翼尖，豬腸蘿蔔豬腸，戲院門口嘅魷魚，仲有夜市年年都見嘅深水埗桂林腸粉。

甜品檔都有，不過最出名最多人排的就係呢個薄餅，我冇呢個耐性排隊，你有興趣時間就排下啦。

可能你初一晚未必有時間來行下，初二初三時間許可，一於同親戚朋友來到這裏熱鬧一下，感受獨有的新春氣氛吧。