Openrice 上見到新餐廳，幾個朋友又推薦，仲要係炮台山，日日經過，無理由唔試。
以魚作為主角，最有特色嘅係用唔同嘅形式做出嘅魚菜式，開飯介紹呢間餐廳就等如一個魚魔術師，睇相好靚好fancy，就搵個下午過左去試。
睇外表好似啲Cafe一樣，個感覺走文青格局，不過你都冇咖啡飲，全場都係食魚多。
枱上有QR code點餐，非常簡單，而且餐廳員工非常快捷點餐到食得，都唔使5分鐘。
先介紹幾個有得色嘅食物，炸魚狗腸，顧名思義，魚肉為主角，扮熱狗，食落去，魚肉彈牙juicy，係我最impressive而好食嘅一個點心。
扮墨西哥魚皮，呢個的確幾有創意，以魚皮做主角，變成墨西哥nachos咁樣，但係呢個魚皮唔會好似你平時食嘅炸魚皮一樣超脆，如果你期望勁脆嘅炸魚皮，可能你會失望，但加上了nachos平時用開的醬汁，幾開胃。
炸魚無薯條，睇個名係十分有得色，可能你會問，咪成碟都係薯條囉？點會無薯條，但係其實薯條全部都係條條魚肉，呢個真係一個幾幽默嘅菜式，味道不錯又夠玩味。
魚湯翡翠苗，清清地食啲菜，唯一不好係魚湯唔算太濃。
另外點了牛魚氏火腿，又係一塊塊薄薄嘅火腿都係以魚肉製成，感覺不錯，不過今次冇食魚麵，轉食米線，配上魚湯，幾清新。
如果你覺得食魚太多，口味有啲悶，川式麻辣鴨絲魚麵撈，就適合你，勁粗嘅鴨絲，配合左超彈牙嘅魚麵，加上旁邊嘅蔬菜。呢個好適合夏天食，好Fresh而且又唔係太過辣。
其實佢幾隻唔同嘅麵都非常吸引，如黑白鴛鴦春卷同魚腐魚皮餃，其他魚製品都好似好好食，一次不能食太多，下次再嚟食過。
呢度嘅飲品都幾靚，我哋選左兩杯花茶，一杯係蝶豆花檸蜜茶，一杯洛神花山楂雪梨茶，兩杯都清新怡人配合，都算係一個幾好嘅配搭。
係呢個時候開新店，坦白講都幾艱難，不過我覺得佢做得幾好幾有特色，就寫返篇文等大家有興趣就去下啦。
沒有留言:
發佈留言