有讀者前幾日話我介紹啲唔好嘅餐廳，覺得有問題，講到我好似介紹左人食垃圾咁，然後我思考左一晚，作為一個講食物嘅blog，除咗講好味嘅食物之外，關於食，無論好壞平貴潮流古老高級低級街邊酒店米芝蓮，乜都可以講。
係呢個咁艱難嘅時間，有話題嘅就一定推薦或者討論下，特別呢排大家一定好想睇不同酒店同餐廳嘅優惠。
除左hit嘅平嘅會講下，唔係個個都可以係呢個時候俾得起錢食靚野，而且百貨百客，呢個時候好多飲食業真係靠呢啲package養起好多一家大細。
講美食嘅blog大把，要做到人人覺得好，好有難度，只有忠於自己，就可以了，人人風格不同，至少，食嘅對得住自己就可以。
就如尋日引起一番討論嘅staycation package，基本上日日都有同朋友研究，呢個問我，嗰個又問我，唔通我下下都介紹人去半島去文華咩，咁樣就好離地，加上我都冇咁有錢去呢d，講真，你有冇見李嘉誠分享佢好鍾意食三星餐廳，有錢人使乜推介你，有時間人地都做自己嘢啦，好似我哋呢啲傻仔又冇收錢喺度寫推薦你咩。
所以，我呢類所謂寫下野真係想分享下自己覺得抵食好食又或者覺得係伏嘅嘢，謹此而已。
有人話我唔介紹貴野米芝蓮，咁我呢個post就推介下米芝蓮一星嘅明閣吧。前牌酒店出咗個超正嘅零房價staycation package ，你訂個房錢幾多就可以喺酒店嘅餐廳用返幾多，例如呢個週末我訂咗個可以用executive lounge嘅房，$2500晚，全數可以用返晒喺餐廳入面，呢個咁樣嘅精彩優惠點可以唔推介。
同系嘅The Langham而家做緊一個一模一樣嘅優惠，我係你就會即刻book，到九月底都有，真心值得去。
講返當晚精彩嘅晚飯，我哋六個人分枱，住得Cordis，一定食明閣，我地食咗幾個最出名嘅菜式。
蜜汁叉燒當然完全沒有錯，燒得勁靚，味道甜得黎又吃得出豬肉嘅層次，個邊燒得幾脆，不錯，送飯絕對一流。
朋友C小姐介紹我一定食鮑魚雞煲，平時係酒店我一定唔會叫 ，但係呢個咁平嘅package 下，食好少少都冇所謂，絕對係當晚嘅驚喜，最重要係當晚雞煲嘅醬汁，加上新鮮熱辣嘅滑雞，加上又大隻又做得剛好的鮑魚，點會唔滿足。
酥炸釀鮮蟹蓋，我相信其實睇相都已經勝過一切千言萬語，個澎湃感係視覺上口感都兼備，呢個菜式也是必試，蟹肉多到，你只會顧住食嘢乜都講唔到。
龍皇三弄，呢個非常有名嘅得獎菜式，記得幾年前嘅食過一次，但今晚表現驚艷得多，濃湯蝦米脆球算係最普通，但都做得不錯，個脆米做得乾爽有致，加湯吃一流。中間嘅醬燒虎蝦無論味道同香氣都好得，位上都食得出鑊氣，最尾嘅花雕蝦球更加是精彩，以$188一位有咁精美嘅得獎菜式，絕對抵食。
尾聲叫個勁正嘅啫啫生菜煲，點會唔好食，就這樣完美左成個晚飯。
當然如果有得飲酒感覺會好點，但係呢個酒店package基本上你成個下晝無論白酒或者有氣白酒都任你飲，還記得去晚飯嘅時候都係處於tipsy 狀態，這樣的staycation ，那有不好。
仲唔快啲book ，如果住The Langham，你用兩千蚊食嘅係米芝蓮三星嘅唐閣，如果唔係今個月暫時未有時間，我一定會再去試呢個咁超值嘅package。
沒有留言:
發佈留言