紅糖: 美麗有罪

上次因工作關係，到過Kerry Hotel渡過三日training，非常愉快，回憶總是最好的，可惜卻一直遲遲未有機會再踏足呢間酒店嘅餐廳。

本身有諗過嚟呢度staycation，其後疫情反覆又太多其他選擇，最後都係無去到，可能我不夠愛這裡，雖然我念念不忘Red sugar嘅景色，當晚training 係呢度free flow 香檳，食住呢間餐廳唔錯嘅小食，望住個海，非常寫意。

因此F小姐約我來到吃午飯嘅時候，我一點猶疑也沒有就答應了。 當然呢個選擇完全冇錯，呢餐可以話係近期吃過最驚喜嘅午餐。 中午12點多，餐廳都非常多人，F小姐預留了非常好嘅海景位，四個人，剛剛好，當中還有很久不見的M小姐，一次瘦過一次，真係又靚又叻。 呢兩位靚女好襯第一個前菜，三個前菜分別係玫瑰水晶南澳洲龍蝦凍，一品燒鵝酥和楓糖黑豚肉叉燒。

點解會襯？你淨係睇過一品燒鵝酥靚到一個點，同同枱食飯兩位靚女一樣搶鏡非常。燒鵝酥吃落去都唔失禮，不過真係要細心欣賞呢件咁靚嘅製成品，用上接近150摺所造成嘅燒鵝酥身軀又鬆脆又可口，入面淡淡都係粗壯嘅燒鵝肉，剩係呢件都值回票價。

還要讚係燒鵝下嘅裝飾品，貌似一塊樹葉但係原來係一塊像薯片咁嘅脆片，靚到不行，咬下去一刻都唔捨得。

另外賣相同樣精緻嘅玫瑰水晶南澳洲龍蝦凍，鮮甜嘅龍蝦肉加上那件好似啫喱咁嘅水晶，就好似藝術品一樣，相信無人會有異議。

叉燒相對最普通，呢個基本上係中餐必備嘅選擇，但係梅頭肉真係非常好味，而且用上較特別嘅楓糖醬來調味，絕對係平凡中帶點驚喜。

到呢個紅糖金魚餃出現嘅時候，我真心覺得呢間餐廳令我欣喜嘅程度直逼澳門嘅8，當然你會覺得我有啲誇張，但係點心嘅靚嘅程度絕對唔輸蝕，配合呢度嘅環境，特別好似今日陽光普照，喺呢度飲茶特別開心。

金魚餃真係靚到不得之了，入面係好大件嘅鱈魚肉，加上少有配搭嘅欖菜，口味有新鮮感。

另外雙籽鱈魚蟹肉餃，冇頭先個金魚餃咁搶眼，但係味道都好出色，雙籽又增加了味道嘅多元性，幾出色嘅實驗之作。

有睇開我食評都知我對炸嘢其實一般，但係呢個蘿白絲酥餅同香梨鹹水角，都令我對煎炸野改觀。

蘿白絲酥餅，個樣好有復活節氣氛，外層又唔油膩，入面全部係清甜嘅日本大根，底下嘅泥竟然係OREO，配搭好有驚喜，而味道又好好。

香梨鹹水角，又係出色到不行，基本上係我當日嘅Favourite，入面係滿瀉到爆炸嘅豬肉蝦肉同埋各種唔同嘅菇，熱辣辣嘅外層咬落去又唔會太過熱氣，正到不得了，絕對像全盛時期嘅8。如果一大班人嚟柴娃娃飲茶，見到心花怒放嘅點心一定好高興。

小籠包大家食得多，呢個應該都會有驚喜，小籠包入邊唔會全部都係肉肉肉，主角反係矜貴嘅羊肚菌，唔會令到你覺得太過油膩。

食咗咁多點心，當然要食返少少菜，呢度嘅菜式咁講究就算食時菜都要有啲特色，桃膠山藥魚湯泡時蔬，淨係聽個名已經知道有幾特別，料靚唔使講，最重要係個魚湯，鮮甜美味。

最後嘅龍門炒鴛鴦米，更加食得出除咗點心之外，炒野都非常之有功價，簡單吃得出來嘅美，同樣容易令人犯罪吃得多了。

甜品又係有三款，奶黃小柑桔，青蘋果菊花凍及琥珀合桃酥，學九品芝麻官入邊嘅對白，又係靚到dump一聲嘅dump dump dump dump，基本上真係唔捨得食。

我最鍾意嘅一定係青蘋果菊花凍，好適合夏天吃嘅甜品，至於奶黃小柑桔就樣子可愛，口感一流，琥珀合桃酥就送咖啡茶最後嘅小甜品。

如果美麗真是有罪，大概呢度嘅點心同我前邊兩位美女朋友一樣，太易令人看多吃多了吧。

食完念念不忘，想試其他嘢食，本身上個禮拜已經想再嚟同屋企人食飯，可惜已經full左，如果你睇完有興趣，仲唔快D黎睇下美麗點樣有罪？

紅糖

紅磡紅鸞道38號香港嘉里酒店7樓