安南:新三層架下午茶

都有一排無去過安南，1957達人又係時候出發，介紹下新嘅三層架下午茶。

每天下午三時至五時三十分提供，係我食過最平嘅下午茶，多個不同的鹹點如安南春卷、嫩豬肉木瓜沙律、越式蔗蝦 、炭燒豬肉棒濱海、鮮蝦豬肉米紙卷，樣樣都做得唔錯，個人特別愛豬肉棒濱海。

不過最好食係越式大頭蝦扎肉炒粉絲，平時通常都係食越式牛河，呢個炒粉好有火喉，最重要個汁好正，大頭蝦又勁新鮮，淡淡係新鮮嘅蝦肉。

甜點係椰汁糕、斑蘭拉椰糕、越南咖啡奶凍，仲有椰汁粟米糯米，樣樣都非常好食，加上可以係荔枝特飲、熱情果梳打 、越式清補涼同越南咖啡選兩杯指定飲品，每人都係百幾，仲要有非常舒適嘅利園入面有舒服嘅環境，點可以唔去。

安南 (利園) 銅鑼灣希慎道33號利園一期4樓