WHISK:久違的late lunch

呢排人生太過苦悶，兩個月冇得堂食晚餐嘅日子，出街食嘅數目都寥寥可數，最多都係食下外賣。上個星期周末，睇到朋友推介嘅WHISK有個late lunch TASTE OF CRAFT AMUSE ，就去試下。

先簡單介紹吓，由前菜，湯到兩個主菜再到甜品，五樣野，都係$598兩位，以lunch又或者下午四點先食嘅late lunch來講，都好化算。當然如果你想係menu入面選特別菜式可能要加錢，點都好，呢個價錢平時絕對唔會喺酒店食到。

宜家呢個餐由星期一到星期六都供應，由二點半開始到六點，都有得食。最重要而家餐廳完全唔多人，上星期六下午四點都唔算full，更唔需要太擔心，係公司食飯可能仲多人仲危險，或者咁講呢啲時間黎呢d地方食飯相對好似仲更加安全。

三點來到，餐廳非常舒適，陽光照射入餐廳，享受嘅唔止係食物，仲有嘅係片刻嘅寧靜和餐廳絕佳的空間感。

坐低先有麵包送俾你，麵包可以話係呢度嘅必食推介，當然唔會好過Joel Robuchon，但加上那個海苔牛油，食咁多次都覺得好，之後加碼，麵包即叫即上熱辣辣，更精彩。

接著就有杯welcome drink，cranberries juice加左薄荷葉，唔講以為係酒，那種粉紅色的少女心，女性一定會愛上。

Amuse Bouche係田螺肉，加上外層滑滑的忌廉，灑上蔥花同炸藜麥，無話用酸用開胃的菜式，給你另一種絲絲的暖意。

前菜有兩個，當然一人一個，FOIE GRAS要加錢，不過無乜所謂，加HKS140都可以，鴨肝，竹笋，大黑占地，鴨肝配上川椒汁當然夠香，但最特別係大黑占地，未試過呢種菇原來同鴨肝都幾襯，竹笋在尾，更揮發到鴨肝的餘香。

我反而選擇嘅係松葉蟹濃湯，湯入面有日本米，福岡水煮蛋仲有大大啖的松葉蟹肉，飲口湯，絕對濃烈，最精彩係濃湯溫度非常夠熱，呢個選擇絕對不錯。

之後放上一枝sake，加上高砂山廢純米吟釀同勁靚嘅鍋，呢個就係岩手縣陸前高田牡蠣，將支酒到落去個鍋入面，嘩啦嘩啦的香氣，攞出嚟就係大隻嘅高田牡蠣，加上勁靚嘅蔥花，一口食落去又甜又多海水味，唯一唔好就係成個感覺太短，太可惜了。

不過呢個又睇得又食得又夠香，真正色香味俱全。

鮑魚椎茸茶碗煮簡單一點，鮑魚唔係太大粒，切成一粒粒，加上上湯整個嘅滑滑燉蛋，上面灑上超香嘅黑松露同蔥花，下面又有勁鮮甜的椎茸，又係暖意上心頭。

兩個主菜，和牛龍蝦同黑豚俾你選擇，前者要加錢，當然出色得多，和牛龍蝦應該唔使點形容，個和牛剛剛好，油香肉香都好夠，點上黑椒汁，夠野性。龍蝦就不用多說，夠爽夠甜。

黑豚慢煮過後，外表夠脆，吃下去加上了黑椒汁，另外大蒜絲包青蘋果，加上了小茴香籽，芫荽籽同豬肩肉，出奇地呢件野配搭更好食。

甜品一人一個，芝士松露雪糕食過好多次，實在太正，加錢都要食，我推薦老婆食，芝士迷當然愛上，fromage好濃烈，我個人就普通，但松露雪糕真心好食，攞埋一齊，係不能說的夾。

絹豆腐，抹茶鳳梨及芒果就更合我心意，豆腐雪糕又滑又香，剩係呢個絹豆腐都值回票價，再加杯咖啡，剛剛好。

如果你同我一樣，好耐冇試過fine dining嘅感覺，來呢度一定冇錯，暫時而家供應到三月底，mark實時間訂位啦。

WHISK 尖沙咀彌敦道118-130號美麗華廣場The Mira Hong Kong 5樓