這一個星期，香港人應該身心疲累吧，排口罩、排紙巾、排出前一丁、排米，連M巾都掃，我想最多問題應該係，是誰把香港人逼瘋了。
上星期，香港周圍都已經有排隊嘅熱潮，不過呢度冇以上所講嘅野買，有嘅係良心同食物。
我也不能說這是黃店了，因為黃到發金，餐廳入去前睇身份證，再有港姐冠軍幫你量體溫，為嘅就係大家吃一口安樂茶飯（不過當然有人唔領情，排完隊仲大鬧店員點解要量體溫點解要睇身分證……）
社會上總係有呢啲咁嘅奇人，無論你係乜嘢政見，我覺得食好嘢都係最重要，只不過在這吃飯就多了一份安心，有一種對香港嘅支持。
我講緊應該係唔少人都認識，而且好期待過去嘅大渣哥。
以前要支持渣哥就係食一串串魚蛋牛丸，你想用錢懲罰佢都食唔到好多，仲要企街邊，但依家係九龍灣呢個大渣哥就可以坐低舒舒服服懲罰佢。
短短開咗幾日已經引來排隊人潮，星期日早上十一點前，來到幸好，只是數十人排隊，也是不過十分鐘的事。
由於這是茶記為主，所以都係講早餐同茶餐嘅部分，晚餐都有好多選擇，我未食就唔講太多啦。
全部餐個名都好特別，歡樂今宵早餐、襟撈任砌，餓底，吞pop，最應景當然係自由西餐同外國勢力早餐，令人感受到09/6後的一點一滴，才發覺我們這半年都是在這運動中長大的。
就好像血洗過後嘅屠城，或者係剛剛有親友走咗嘅哀傷，吃得開心得來都會有點沉重。
早來當然係要食早餐，而且朋友說過這裏的沙嗲牛肉麵非常出色，而且很早就會售罄，當然要早光顧。
我叫了黑牛黑麵餐，當然其實呢個名都好敏感，你諗到就應該明白，不過呢個餐就係好出色嘅沙嗲牛麵。
老實講我自己個人嘅沙嗲牛麵三甲一定係黃大仙某地嘅茶餐廳(呢間有啲敏感想知Pm我）長沙灣嘅新華，仲有長沙灣嘅金園，吃完這個後，都不得不說，味道謹次於呢三間嘅質素。
個沙嗲牛肉好濃郁，唔會好強嘅花生醬味，而且牛肉係鮮牛，而沙爹嘅香，完全散發係個公仔麵上，飲埋個湯直頭係無敵。
我沒有加出前一丁，留返俾有需要嘅人，你知啦而家出前一定都要搶，不過我覺得唔使加，大光麵才是最好的茶餐廳朋友，總覺得沙嗲牛肉係要同大光麵先夾。
另外一讚嘅就係呢個傳統丹麥多士，加上強勁的牛油，焗得精彩，好吃到不得之了。呢個一定一定要食。
我直頭覺得呢個應該要a la carte賣。
炒蛋嘅水準都唔錯，當然沒有澳牛咁滑，而且我嗰碟就份量十足，太太嗰碟就細份一半，係不足之處。
老婆叫嘅係歡樂今朝早餐，佢選擇咗香煎雞扒米粉。
香煎雞扒米粉，睇個樣就麻麻，唔知點解湯好少，但係湯底飲啖都算幾特別。
佢嘅米粉非常煙韌，好好食，係我喺茶餐廳食過最好嘅米粉。
香煎雞扒都煎得唔錯，熱辣辣，吃得出唔係求其整。
不過香煎雞扒係外國勢力，你知啦加隻蛋就變身外國勢力套餐，都係唔好讚太多，費事俾人河蟹。
我哋同樣叫咗兩杯熱奶茶，以茶餐廳來講，呢個真係最一般，冇特別驚喜，無辦法，食物太好，自然雞蛋挑骨頭，正如渣哥燒賣一定冇林記好食。
八十四蚊，兩份早餐，吃的是對香港嘅支持，還有美食。
我想，近來為咗武漢肺炎，我哋都太攰，來這些正能量的地方加下油，才都不錯。
不過，你真係要有心理準備，週末一定好多人排隊，太多人要懲罰了。
如果近排排口罩排得累了，又搶唔到紙巾，不過有良心同耐性，也來試下吧。
香港人，加油，食好啲先可以捱下去。
套用今日張堅庭喺Facebook講嘅故事，我哋全部人都要捱下佢，學阿叔話：香港梗係唔會死，我地全部都唔x准死。
PS沙嗲牛肉麵真係好早就會無，要食趁早。
沒有留言:
發佈留言