帝京軒：怎能不吃大閘蟹

11月的時份，除咗吃秋刀魚，白子外，中菜代表當然還有大閘蟹。

今年大閘蟹嘅熱潮比往年任何一年都要強，餐廳亦都破天荒咁瘋狂推出大閘蟹套餐。 最重要今年嘅大閘蟹套餐比以往一年都化算，前牌介紹咗十里洋場嘅套餐，今日就講吓帝京軒。

大家見過我寫過咁多次帝京軒，應該都冇乜需要我再介紹呢間餐廳，不如直接睇吓有啲乜嘢食。 睇完有興趣，可以上網訂： https://www.royalplaza.com.hk/hk/di-king-heen-online-table-reservation/?fbclid=IwAR3DoA3bNDILeWSD4xZ-Erers9gptqCus9MzX8nhT0MOIxoIqlUwjF4e8Aw

而家你只要夠六個人訂位，仲會有個神秘優惠，想知係乜就留名大閘蟹，即刻話你知。 前菜有古越龍山醉轉彎、雙冬小耳烤麩貴妃、椒香黑豚叉燒，三個前菜雖然同大閘蟹冇乜關係，但質素取勝，特別係烤麩貴妃同叉燒，為今晚揭開一個不錯嘅序幕。

當晚最愛係松茸蟹粉燴拉絲雪燕，蟹粉鋪滿成個碗，樓下嘅雪燕叫所有女人愛得津津樂道，又過口癮又養顏去邊搵？如果你冇興趣飲呢個，你仲可以叫清燉姫松茸螺頭燉花膠，同樣係養顏之選，但要精打細算，當然係蟹粉雪燕抵食好多。

兩弄六頭老虎蝦皇，避風塘炒蝦球，加上白松露油點睛後，成隻老虎蝦皇，即刻變得龍精虎猛，特別係個蝦頭，咬下去 ，成個頭嘅蝦膏係咁瘋湧而至。

呢度嘅清蒸太湖大閘蟹，係我今年食過最好，雖然重量只係五両以內，每隻大概四兩半左右，但係無論蟹膏同蟹肉嘅質素，都係今年食過數一數二。

香煎鳳凰糯米雞配蟹粉灌湯小籠包，個糯米雞煎得非常之香，不過外層略嫌唔夠脆，而灌湯小籠包入邊嘅蟹粉多到不得之了，又係是晚最精彩之一的食物。

朋友F先生上次吃過另一個menu，推薦了客家煎釀山水豆腐同娘家黃酒釀開窩雞，各有所好，個人愛好黃酒釀開窩雞，外間少有做到酒味咁濃咁香，山水豆腐相對出邊容易搵到，呢度較做得高貴，豆腐亦都特別滑。

今晚食物質素好唔錯，同上次喺十里洋場食嘅，風格有點不同，呢度再高貴一點，當然價錢也貴少少，豐儉由人睇你選擇。

當晚有點涼意，朋友建議再食砂鍋古法扣雙冬羊腩，打開了今年第一次食羊嘅大門，羊腩非常肥美加上枝竹和筍，送上羊腩煲個汁，送碗白飯最好。 不過，由於叫了青葱蟹油蒟蒻麵，上次食過已經拍案叫絕，今次食更加精彩，青葱蟹油又熱又辣，唔知係咪遇上蟹當旺的季節，個蟹油更香更正，蒟蒻麵吃下去完全沒有罪惡感，呢個a la carte絕對係帝京軒暫時我心目中數一數二嘅favorite 。

甜品黑糖薑母茶桃膠湯圆和五仁合桃酥，相對唔大驚喜，但係最尾再飲嘅玫瑰花鵰，就十分精彩，平時出邊飲嘅花鵰都係以熱飲為主。而呢度嘅花雕係凍飲，飲落去一刻，感覺似Cocktail多一點，嗰種玩味令到成件事都好後生，個人都非常喜歡個花雕，為咗呢杯花雕，我可以再吃多次大閘蟹。

帝京軒 旺角太子道西193號帝京酒店3樓