冠華：六十個蘇麗珍

呢期人人講燒賣，唔通人人都真係好鍾意食燒賣？

如果你睇完TVB講粉果佬，你冒名而來搭一個鐘車入大埔然後用咗一個鐘排佢嘅燒賣，食完後，你可能覺得浪費左你一個鐘時間，因為週末至少排一個鐘，你會覺得係TVB惹的禍。 旭仔一分鐘可以識個蘇麗珍，而一個鐘你可以識60個蘇麗珍，呢串燒賣可能真係壞過凱婷，因為人生時間太寶貴，一個鐘可以做好多嘢。 當然你可以選擇排隊呢個鐘講吓電話，上下Facebook，打下機或者剛剛夠睇一集近期大熱嘅后翼棄兵(The Queen’s Gamebit) ，但係我覺得你都可以換過選擇，唔使排一個鐘，都可以食同樣好食嘅燒賣。

前排我推過紅磡的林記，唔知有幾多人記得，至少唔使排一個鐘咁痴線，今日我講呢間係位於荃灣嘅冠華，完全唔使排隊， $12有七粒，至少唔使浪費你一個鐘頭，以我所知，香港燒賣關注組都有講過，但我唔知有幾多人咁神心好似我咁走過來食。 地方係有少少難搵，不過只要問街坊，街坊就會指導你去呢間專食牛雜粉麵嘅冠華。

門口已經有架車仔賣燒賣，入邊就係粉麵檔。

燒賣比起林記同粉果佬或者其他出邊食開嘅燒賣都大粒，有啲似筲箕灣呂仔記。 呢度有個阿姐，狀似老闆娘，佢話佢日日都包燒賣，好快就會賣晒。 食之前見到隻隻燒賣熱辣辣脹卜卜嘅樣都幾吸引，我老婆仲問我係咪好緊張，因為太期待。 食落口，味道唔會大而無當，有咬口，魚肉味幾濃，又煙韌，由於好大粒，個口感可以維持好耐。 辣椒油係自家炒，唯一唔夠好就係佢嘅辣椒油唔係好辣。 要專程過嚟食，係值得嘅，至少我覺得，係香港頭三甲位置，我覺得佢係大件版嘅林記，即係如果你覺得張曦雯好正，呢度嘅張曦雯個樣會靚啲身材會再好啲。 不過最精彩嘅係佢入邊嘅牛雜檔。 雖然好飽但係見到佢嘅牛雜真係好吸引，忍唔住買咗一碗外賣。

阿姐好好客，力推自己嘅牛腩同牛雜，當場可以試味，食完之後就欲罷不能。

如果你喜歡嘉麗園嘅牛雜湯，有花椒八角嘅藥材香嘅味道，咁呢度正中下懷。

佢係濃味嘅八寶清湯腩，最可惜呢度竟然冇蘿蔔賣。

無論牛筋、牛腩、牛膀，牛肺，都非常出色，最正係個牛腸，你不會覺得肥到完全唔想食。

返到去用牛雜牛腩送紅酒真係一流，出色，$95咁大碗，仲要當場試咗好多個唔同的腩位。

絕對有下次，聽講雲呑都好出色，下次冇咁飽嘅狀態一定要叫粉麵送佢個湯底。 如果你愛好燒賣，又唔想排隊，山長水遠過嚟呢度食應該都唔太過分。

至少，呢度除咗燒賣仲有另外一樣好正嘅美食，愛好牛腩也不要錯過。

食完之後，當看看餐廳嘅外內圍，都像時光倒流般，話唔定你可以搵返係粉果佬失去左的60個蘇麗珍。

冠華粥麵 荃灣石圍角村石芳樓地下7號舖