樹熊の食桌: KIDO：木戶的煙花

2021年3月7日星期日

KIDO：木戶的煙花

老實講，當我行入去餐廳嗰刻，我真係以為自己去咗日本。

以明爐炭火炮製串燒的地方，應該唔多，呢度係城中其中一間，日藉總廚木村潤一朗先生以其祖傳秘方推出嘅南蠻雞同埋招牌雞肉串燒，都非常出名，因此呢間餐廳一直係我口袋入面。

是晚，朋友B小姐安排了宮崎縣食材特別炮製嘅料理，仲可以順便食下呢到其他出色嘅串燒。

呢個咁特別嘅料理，供應到3月22日，如果你都想以舌尖味遊宮崎，不要錯過。

先來推薦一定有最出名嘅宮崎牛，炭火燒香辛宮崎和牛，加點青檸，wasabi，蔥香，薄薄又燒得勁香嘅和牛，油份和脂香非常豐富，一碟實在太少，最後我哋要再叫多碟encore。

宮崎Marumi豚肉日向夏胡麻沙律，可能你會問有咩咁特別？日向夏係宮崎獨有嘅特產，入面果肉和白色內衣一齊食，內皮質地柔軟，略帶甜美，點點酸酸嘅香氣，又有清爽嘅口感，滲入去胡麻沙律特別好食。

擔擔味噌宮崎土佐原茄子拌Marumi豚肉也很出色，主角當然係來自宮崎，口感非常滑又多汁嘅茄子，擔擔味噌當然也搶鏡，同胡麻沙律，前後一清新一濃郁。

燒風乾宮崎產潤目鯧魚，燒過後，陳陳幽香震懾嗅覺，加點檸檬香，個魚頭非常之甘甜美味，愛魚嘅人士不要錯過。\\

另一個唐揚宮崎目光魚，送酒更佳，我個人較鍾意呢個，因為前者有點腥，唔係人人可以接受到。

送清酒，剛剛好，唐揚宮崎目光魚，又係停不到口要食幾碟。

我諗無乜地方可以食到呢個元祖Ogura南蠻雞頸肉，豬頸肉食得多，原來雞頸肉嘅肉質係更加之爽，旁邊嘅醬汁同檸檬汁點過後，係兩個唔同嘅世界。最後吃到的味增豬扒汁佐香炸宮崎和牛Marumi豚肉免治扒，同樣幾特別，吃的那件放涼了一會，還是咁好吃，但吃過後完全唔覺得似食緊豬扒，似牛肉多點。既然嚟得，梗係唔止淨係食宮崎菜，當然也要叫串燒試試。