板神: 鐵板燒新寵

近來鐵板燒嘅市場非常多姿多彩，記得之前通常都係去萬麗海景松菱同秋田等高質嘅鐵板燒，但呢幾年有好多好出名嘅品牌突然紅咗起黎，板神就係其中一間。

之前聽過朋友推介觀塘嘅分店，喺工廠區竟然有一間出名好好食嘅鐵板燒，仲要話好過前排我推薦過荔枝角個間，講到咁一定要試下。

適逢銅鑼灣嘅旗艦店開張，更加要去試吓佢嘅質素。

不過，去到呢間旗艦店就覺得真係唔係頭先我所講嘅鐵板燒可以媲美，呢度有好多唔同形式嘅房間，仲有一個有富士山景嘅鐵板燒房，私隱度高，又非常舒適。

而且呢度除咗鐵板燒之外，仲要有壽司omakase枱，仲要有串燒，任你選擇，所以基本上如果你愛好任何一種嘢食都值得去板神。

今日嚟到就係食呢個值錢商務鐵板燒套餐。

先來前菜同沙律，基本上鐵板燒提供得嘅前菜沙律都非常之精彩，特別係個明太子西瓜仔，好得意，仲有其他蜆肉鴨胸等都幾好。

三款嘅刺身，非常出色，呢度有埋日本廚師發板師傅你都估到係咩料。

鐵板燒開始，見師傅開始準備就覺得非常興奮，先放上堆對海鮮，就係開始海鮮時間。

基本上海鮮係最賞心悅目嘅一part，無論龍蝦，鮑魚，帶子都令人覺得好精彩。

個人覺得最好係鮑魚，鮑魚好淋好軟熟，好大隻。

龍蝦都係煮得剛剛好，最重要佢個龍蝦汁，加咗蝦頭同用龍蝦嚟整，個汁非常好味，搭上個龍蝦啱啱好。

帶子用木魚湯上，加上蔥花，溫文爾雅。

牛肉時間，由於多人，當日食左幾種唔同嘅和牛，第一種就係美國嘅薄燒。

薄燒加上蔥花，又係屈機。

我哋常常會討論究竟厚燒定薄燒好，今日我始終都係會鍾意薄燒，厚燒雖然味道濃厚，但係口感冇咁多元化，肉味始終較強。

季節野菜相對來講冇乜特別，不過係你面前炒又係有得欣賞。

當晚我哋再加點日本和牛，又香又多油花自然不在話下，入口溶化，其他肥肉位置用嚟炒飯，成隻和牛更加用得其所。

個炒飯先精彩，可能我哋咁啱四張枱一齊入咗，師傅即席表演差唔多成12個人嘅炒飯，好似睇戲咁樣樣嘅藝術感，先至係鐵板燒嘅精髓。

尾聲用上龍蝦頭整麵豉湯，點會唔得。

甜品就係最hit嘅蛋卷，食完最完滿。

最重點嘅砂糖多士，完美得可怕。

期待下次再可以食廚師發板或者串燒，絕對係近來餐廳嘅新寵。

板神鉄板燒日本料理 (信和廣場) 銅鑼灣告士打道255-257號信和廣場1樓103號舖