樂湯雞麵館：下次銅鑼灣見

相信呢間樂湯雞麵館都非常多人認識，都唔需要點樣介紹，適逢佐敦開咗新分店，佢嘅期間限定，鮑心翅肚餐，引來一番熱烈話題，雖然唔係忠粉，但似乎唔試吓唔得。

呢個$168一位用套餐，有金湯花膠翅，包左鮑魚、海參、花膠、瑤柱、花菇等嘅海味一品煲，太白醉雞，仲有最後嘅鮑汁海味飯。

三個朋友過嚟一齊食，當然唔可以就咁食佢一人餐，先點了個前菜麻辣海參，辣就唔夠辣，但係幾彈牙，以呢個價錢收貨，不過略嫌青瓜好多。

我自己叫咗個XO醬雞絲撈出前一丁，上兩次我都好想試佢個撈麵水準，都算幾對辦，了咗個心願。

講返個餐，金湯花膠翅夠濃夠甜，好似南瓜湯一樣咁杰，好足料，當然唔係啲乜嘢超級幾靚翅，但呢個價食得開心。

海味一品煲擺盤唔係好靚，但係就真係好似寶盒咁乜都有，樣樣都係靚嘅嘢，特別正嘅係花膠，大件到不行。

太白醉雞，水準依然試過幾次，呢度嘅雞都真係冇得投訴。

相對尾聲的鮑汁海味飯就普通左少少，我覺得叫一碗白飯，然之後送花膠翅個湯或者海味一品煲個汁仲正。

三個人當然意猶未盡，叫咗一個砂鍋雲吞花膠雞。

難得多人先至可以叫到呢一個主菜，由於好大碗，足夠四個人分，仲可以每位加錢要米線，飯或者刀削麵。

先飲一碗湯，當然冇花膠翅湯咁濃，但都夠照。

最重要係，隻雞，足足一大隻，而呢碗湯裏邊有無數咁多花膠，魚肚同翅。

你以為頭先個一人餐好抵？我個人覺得呢個砂鍋花膠雞先至係超值。

以呢個份量如果你係普通酒樓食，冇$400都唔使落樓。

唔怪得分店越開越多，呢間佐敦店都幾好坐，下次有機會一定要去埋銅鑼灣店。

樂湯雞麵館 (庇利金街) 佐敦庇利金街61號地舖