廣場葡國餐廳: 冷門的精彩

要講澳門的葡國餐廳，我諗你應該睇都睇到厭，就算自問唔係乜嘢澳門達人，可能你都會有三四間如數家珍係個袋裡面，好似澳門的士佬一樣。

我自己最愛其實都好膚淺，媽閣三寶係我必然的一個選擇，可能細細個第一次喺澳門食嘅餐廳就係船屋，有種情意結，氹仔就更加係葡國菜的集中地，睇KC介紹應該都夠你去十次食都唔重覆。

相反，有間冷門一點嘅選擇，冇乜香港blogger講過，但我去過兩次，覺得水準非常不錯，也比我剛提過好的葡國餐廳平一大截，而且仲要係酒店裡面，呢間係廣場葡國餐廳。

湯類選擇很多，你想叫湯，侍應第一個反應就係話：我哋呢度個湯好大碗，你可以share來飲，的確令我覺得好驚喜，好難相信呢度係一間酒店嘅餐廳。

葡式薯蓉青菜湯和葡式香濃牛尾湯和朋友share來飲，薯蓉青菜啖啖足料，香濃牛尾濃到可以用來送飯，仲有件件牛尾增興。

友人吃素，忌廉野菌湯和西蘭花湯都被她大讚特讚，可惜因為太多菜式關係在後面的關係不能吃到其味道。

凱薩沙律絕對係大件夾抵食，樣樣都大份過人，愛沙律的朋友，必定喜歡。

炸馬介休球係澳門嘅名物，呢度最好係做得不會太過油和熱氣，馬介休鹹香一流，可以用來送飯。

主菜才是驚喜處處，上次吃過的葡式白酒炒蜆，隻隻鮮甜肥美，而且充滿酒香。

葡式牛肋條係上次食過最深刻的一味菜式，今次還是沒有失望，燒得勁靚的牛肋條，有炭香有肉香有嚼勁，每個位置都有其美味位，完全不能抗拒的作品，當香港食一條咁嘅牛肋條起碼收你$400嘅時候，你就明呢度有幾正。

欖油焗烤馬介休魚更加嘗到馬介休的鮮香，欖油的配合令其昇華到另一個層次。

惹味伙頭豬扒入口個種柔軟，你完全感受到肉香，而且冇用鬆肉粉，惹味個名改得好好，如果剛才的葡式牛肋條有十分，這個實在過之而無不及，力度同樣強勁。

葡國雞無得輸，滑滑雞件加上其他配菜，你就知道係飯盜，你煩惱嘅係唔知吃雞好定係配菜好。

葡式咖喱牛腩，可㨂不同辣度，小辣中辣大辣任你選，選了小辣，牛腩有點大件，相對較其他失色，始終香港做咖喱牛腩出色的地方實在太多。

要吃點蔬菜，蒜蓉炒西蘭花，不油不膩清新不二之選。

素食的朋友也有推薦，時興新豬肉，同樣係自家製的漢堡肉，磨菇紅菜頭醬漢堡，紅菜頭醬sharp得來好有個性，舊肉又做得好，好奇嘅我試咗兩啖，絕對和街外嘅漢堡可以睇齊。

甜品選擇又係又平又靚，上次已經試過，今次當然又係要掃餐牌，經典澳門甜品如木糠布甸，焦糖雞蛋布甸不在話，最搶鏡是手工牛油果雪糕和愛馥卡朵奶凍。

最後，我沒有飲咖啡，反而來一杯Sangria，無辦法，來親澳門都會食食食，飲杯再為下一餐暖位，都很合理吧。

可能呢個推薦同你看過之前嘅澳門葡國餐廳推介來得冷門一點，但以價錢和性價比來看，是不錯的選擇。

有時，冷門都可以很精彩的。