2020還有一個月便過去，問自己今年做過啲乜嘢，我諗大部份人都答唔到。
今年因為冇得出遊，反而留喺香港嘅時間好多，本身雖然有好多限聚令同疫情關係，但係始終喺香港多，食唔同餐廳嘅機會同埋翻卓嘅次數都比往年多。
屯門三聖邨就係一個好例子，冇錯我又來到泰海鮮。
永恆的7:30，放工後入到來剛剛好。
先飲碗海鮮湯，不過，從來重點都係個盤材料，煲得夠亇鮮夠甜，有蝦有瀨尿蝦有蜆有魚有豆腐，有你有我有情有天有海有地，加埋哂咁嘅陣容點會唔得。
泰式香茅瀨尿蝦，大隻到成隻手咁，好多人講起瀨尿蝦都會推介長沙灣嘅禤師傅，我無食過，今日呢隻都已經心滿意足。
豉油皇鮑魚，最重要係料夠靚，不過我自已最鍾意嘅做法都係六福嘅椒鹽鮑魚，講起就好掛住，當然價錢高一大截，係咁窮嘅日子，都係喺屯門食好過。
朋友係油鹽焗奄仔蟹的粉絲，佢次次都點呢味菜，我幾鐘意佢油鹽焗個種焦同燻香，膏又夠多。
黑椒薑蔥桶蠔煲，普通左少少，不過幸好桶蠔夠大隻，掩蓋了黑椒同薑蔥味都唔夠嘅弱點。
辣油煮花螺，係我每次必點嘅菜式，從前老是常出現的朋友F先生過來嘅時候，我哋都會建議送公仔麵，今日就送米粉，辣酒加上米粉 ，基本上花螺只是陪襯。
白酒忌廉煮花甲烏冬底，基本上對泰海鮮有認識都會知道呢個菜式，都冇乜嘢好再介紹，講嚟講去都係咁軟弱冇力嘅point ，學李臻話齋，第二節我會硬啲。
當食飯睇到呢段有線嘅新聞，你會覺得人生真係好灰，所以話點唔可以及時行樂。
我期待下一次再嚟食其他嘢食會有驚喜令我枝筆嘅point可以硬啲，玩得食得就多玩多食，誰知道下次仲有冇得玩。
就好似李臻，下次再硬都唔知係幾時了。
泰海鮮
地址: 屯門三聖街6號三聖商場地下5-8及14-16舖
沒有留言:
發佈留言